ޓެރަރިސްޓް ހަމަލާއަށް ފަހު ތުރުކީން އިރާގާއި ސީރިއާގައި ކުރުދީންނަށް ހަމަލާ ދީފި

ތުރުކީގެ ޑިފެންސް ފާމަކަށް އިއްޔެ ދިން ނުރައްކާތެރި ހަމަލާގެ ފަހަތުގައި އޮންނާނީ ކުރުދީ ހަނގުރާމަވެރިން ކަމަށް ބުނެ، އިރާގާއި ސީރިއާގެ ކުރުދީންނަށް އަމާޒުކޮށް ތުރުކީން ބޮން އަޅައިފި އެވެ.

ތުރުކީ ސަރުކާރުގެ ބޮޑު ކުންފުންޏެއް ކަމަށްވާ ޓާކިޝް އެއަރޮސްޕޭސް އިންޑަސްޓްރީޒް (ޓީއޭއައި) އަށް ހަތިޔާރާ އެކު ބަޔަކު ވަދެގަންނަން މަސައްކަތްކޮށް އަދި ބޮމެއް ގޮއްވާލައިގެން ދިން ހަމަލާގައި ހަތަރު މީހަކު އިއްޔެ ވަނީ މަރުވެފަ އެވެ. މި ހަމަލާތަކުގައި 22 މީހަކު ޒަހަމްވި ކަމަށް ވެސް ބުނެފައިވެ އެވެ.

މި ހަމަލާއަށް ގަޑިއިރުތަކެއް ފަހުން ތުރުކީގެ ޑިފެންސް މިނިސްޓްރީން ނެރުނު ބަޔާނެއްގައި ބުނީ "އިރާގުގެ އުތުރާއި ސީރިއާގައި ޓެރަރިސްޓުންގެ މަގާމުތަކަށް އަމާޒުކޮށް ވައިގެ މަގުން ހަމަލާތަކެއް ދީފިން" ކަމަށެވެ.

މިނިސްޓްރީން ބުނީ ޓެރަރިސްޓުންގެ 32 މަގާމެއް ނައްތާލާފައިވާ ކަމަށާއި މި އޮޕަރޭޝަން އަދިވެސް ދަނީ ކުރިއަށް ކަމަށެވެ.

ކުރުދިސްތާން ވޯކާސް ޕާޓީ (ޕީކޭކޭ) އަކީ ތުރުކީގެ އިތުރުން އެ ގައުމުގެ އެކުވެރި ޔޫރަޕްގެ ގައުމުތަކުން ވެސް ޓެރަރިސްޓް ޖަމާއަތެއްގެ ގޮތުގައި ބަލާ ބައެކެވެ. މި ޖަމާއަތުން ތުރުކީ ސަރުކާރާ ދެކޮޅަށް ހަމަލާތައް ދޭތާ އެތައް އަހަރެއް ވެއްޖެ އެވެ. އިރާގާއި ސީރިއާގައި ކުރުދީން އުޅޭ ސަރަހައްދުތަކުގައި މި ޖަމާއަތުގެ މަރުކަޒުތައް ހަދާފައި ހުރެ އެވެ.

ތުރުކީ ސަރުކާރުން ބުނި ގޮތުގައިއަންކާރާގެ އުތުރުން ގާތްގަނޑަކަށް 40 ކިލޯމީޓަރު (25 މޭލު) ދުރުގައި އޮންނަ ކުޑަ އަވަށެއް ކަމަށްވާ ކަހްރާމަންކަޒާންގައި ހުންނަ ޓީއޭއައި އަށް ހަމަލާ ދިނީ އަންހެނަކާއި ފިރިހެނަކު ކަމަށާއި އެ ދެ މީހުން ވެސް "ނައްތާލި" ކަމަށެވެ. ހަމަލާގެ ޒިންމާ އެއްވެސް ބަޔަކު އަދި އުފުލާފައި ނުވިޔަސް އިންޓީރިއާ މިނިސްޓަރު އަލީ ޔެރްލިކަޔާ ވިދާޅުވީ ހަމަލާ ދީފައިވާ ގޮތަށް ބަލާއިރު އެއީ ކުރުދީންގެ އަމަލެއް ކަމަށް ވަރަށް ބޮޑަށް ބެލެވޭ ކަމަށެވެ.

ޑިފެންސް މިނިސްޓަރު ވެސް ވަނީ ހަމަލާގެ ތުހުމަތު ޕީކޭކޭއަށް ކޮށްފަ އެވެ.

ޓީއޭއައިގެ ވެބްސައިޓްގައިވާ ގޮތުން ހަތިޔާރު އުފައްދާ މި ބޮޑު ކުންފުނީގައި 15،500 މީހުން ވަޒީފާ އަދާކުރާ އިރު، ފަސް މިލިއަން އަކަމީޓަރުގެ ސަރަހައްދެއް ހިމެނޭ ގޮތަށް ބޮޑު ޕްރޮޑަކްޝަން ސައިޓެއް ހުރެ އެވެ. -- އޭއެފްޕީ