ކޮމަންވެލްތު ގޭމްސް އިން ބެޑްމިންޓަން އުނިކޮށްފި

ސްކޮޓްލެންޑުގެ ގްލާސްގޯގައި 2026 ވަނަ އަހަރު ބާއްވާ ކޮމަންވެލްތު ގޭމްސްގައި ބެޑްމިންޓަން އާއި އެހެން ބައެއް ފާހަގަކުރެވޭ ކުޅިވަރުތަކެއް ނުހިމަނަން ނިންމައިފި އެވެ.

މިއީ ރާއްޖެ އަށް ވެސް ލިބޭނެ ދެރައެކެވެ. ކޮމަންވެލްތު ގޭމްސް އަކީ ރާއްޖޭގެ ބެޑްމިންޓަން ކުޅުންތެރިންނަށް ދުނިޔޭގެ މަތީ ފަންތީގައި ވާދަކޮށްލަން ލިބޭ މުހިއްމު ފުރުސަތެކެވެ.

މި ގޭމްސް 2026 ގައި ބާއްވާ ގޮތަށް އޮސްޓްރޭލިއާގެ ވިކްޓޯރިއާ ސްޓޭޓުގަ އެވެ. ނަމަވެސް ގޭމްސް ބާއްވަން ބޮޑު ހަރަދެއް ހިނގާތީ އޮސްޓްރޭލިއާ އިން ވަނީ އެ ފުރުސަތު ދޫކޮށްލައިފަ އެވެ.

ހާއްސަ ހާލަތެއް ކަމަށް ބަލައި ސްކޮޓްލެންޑުން ވެސް ގޭމްސް ބާއްވަން އެއްބަސްވީ ހަރަދު ކުޑަވާނެ ގޮތަކަށެވެ. އެގޮތުން މި ފަހަރު ހިމަނަން ނިންމީ އެންމެ 10 ކުޅިވަރެކެވެ. އެތުލެޓިކްސް އާއި ސްވިމިން ފިޔަވައި ދެން ހިމެނޭ ކުޅިވަރުތައް ކަނޑައަޅާފައިވަނީ އެ ގައުމުގައި މިހާރު ހުރި ވެނިއުތަކަށް ބަލައިގެންނެވެ. އެގޮތުން އެ ގައުމުން ވަނީ މުބާރާތަށް އެއްވެސް އާ ވެނިއުއެއް ތައްޔާރުނުކުރަން ނިންމައިފަ އެވެ.

މީގެ އިތުރުން އެކޮމަޑޭޝަނަށް ވެސް ބޭނުންކުރަން ނިންމާފައި ވަނީ މިހާރު ހުރި ފެސިލިޓީތަކާއި، ހޮޓާތަކެވެ.

ގްލާސްގޯގެ 2026 ވަނަ އަހަރުގެ ޖުލައި 23 އިން އޮގަސްޓް 2 އަށް ބާއްވާ ގޭމްސް އިން ފުރުސަތު ދީފައިވަނީ ސްވިމިން، އެތުލެޓިކްސް، ތުރީ އޮން ތުރީ ބާސްކެޓްބޯޅަ، ބޮކްސިން، ސައިކްލިން، ޖިމްނާސްޓިކް، ޖޫޑޯ، ލޯން ބޯލްސް، ނެޓްބޯލް އަދި ބަރުއުފުލުމެވެ. މީގެ ތެރެއިން ހަ ކުޅިވަރެއްގައި ޕެރެ ބައި ވެސް ހިމެނޭނެ އެވެ.

ކޮމަންވެލްތު ގޭމްސް އަކީ އިނގިރޭސިން އިސްތިއުމާރުކުރި ގައުމުތަކާއި، ހިމާޔަތްދިން ގައުމުތަކާއި، އެ ގައުމުގެ ރަސްކަމުގެ ދަށުގައި އޮތް 54 ގައުމެއް ބައިވެރިވާ ކޮމަންވެލްތު ޖަމިއްޔާގެ މެމްބަރުންގެ މެދުގައި ކޮންމެ ހަތަރު އަހަރަކުން އެއް ފަހަރު ބާއްވާ ކުޅިވަރު ހަރަކާތެކެވެ.

ނަމަވެސް މި ގޭމްސް އަށް ފަހަކަށް އައިސް މަތީ ފަންތީގެ އެތުލީޓުންގެ ފަރާތުން މާބޮޑު ޝައުގުވެރިކަމެއް ނުލިބެ އެވެ. އަދި ގޭމްސް ބާއްވަން ބޮޑު ހަރަދެއް ކުރަން ޖެހޭތީ، މި ގޭމްސް އުވުމުގެ ފުރުސަތު ވެސް އެބައޮތެވެ.