ސްޓެލްކޯގެ ސްޓްރެޓީޖިކް އެކްޝަން ޕްލޭން އިފްތިތާހުކޮށްފި

ސްޓެލްކޯ އިން ކުރިއަށް އޮތް ފަސް އަހަރަށް ހާސިލުކުރަން ބޭނުންވާ ކަންކަން ހިމަނައި، އެ ކުންފުނީގެ ސްޓްރެޓީޖިކް އެކްޝަން ޕްލޭން އިފްތިތާހުކޮށްފި އެވެ.

އެ ޕްލޭން އިފްތިތާހުކޮށްދެއްވީ އެ ކުންފުނީގެ މެނޭޖިން ޑިރެކްޓަރު ހުސެއިން ފަހްމީ އެވެ.

ސްޓެލްކޯ އިން ބުނި ގޮތުގައި މި ޕްލޭނަކީ ފަހުމީ، އެ މަގާމާ ހަވާލުވެވަޑައިގަތުމަށް ފަހު ރާއްޖެއަށް އަންނަ ތަރައްގީ އާއި ކުރިއެރުންތަކާ އެއް ހަމައަށް ކަރަންޓާއި ފެނާއި ނަރުދަމާގެ ސިނާއަތް ގެންދިއުމަށް ކުރެވެން ހުރި މަސައްކަތްތަކަކީ ކޮބާތޯ ބަލައި، އެ މަސައްކަތްތައް ބާރު ސްޕީޑެއްގައި ކުރެވޭނެ މަގު ކޮށައި، ފަށާފައިވާ މަސައްކަތެކެވެ.

މި ޕްލޭން އިފްތިތާހުކޮށްފައި މި ވަނީ އެ ކުންފުނީގެ ބޯޑުގެ ލަފަޔާއި އިރުޝާދާ އެެކު ކަމަށް ވެސް އެ ކުންފުނިން ބުންޏެވެ.

ސްޓެލްކޯ އިން ބުނީ އެ ޕްލޭން އެކުލަވާލުމުގައި ބަލާފައި ވަނީ ހިދުމަތުގެ ކުރިއެރުމާއި ދެމެހެއްޓެނިވިކަން ކަށަވަރުކުރުމާ އެކު ރައްޔިތުންގެ އިތުބާރާއި ޔަގީންކަން ކަށަވަރުކުރުމަށް ކަމަށެވެ.

އެ ޕްލޭން އެކުލަވާލާފައި ވަނީ އެ ކުންފުނީގެ އެކި ދާއިރާތަކުގެ ޓެކްނިކަލް އަދި މެނެޖީރިއަލް މުވައްޒަފުން ހިމަނައިގެން އެކުލަވާލެވުނު އިލްމީ ގާބިލު ޓީމަކުން ކަމަށް ވެސް އެ ކުންފުނިން ބުނެ އެވެ.

"މި މަސައްކަތުގެ ތެރެއިން، ކުންފުނި ހިންގުމުގައި އެންމެ ބޮޑު ދައުރެއް އަދާކުރާ އިސްވެރިންގެ ހިޔާލާއި މަޝްވަރާ ހޯދުމަށްފަހު ކުންފުނީގެ މިޑްލް މެނޭޖްމަންޓްގައި ހިމެނޭ ޔުނިޓް ހެޑުންނާއި އެ މުވައްޒަފުންގެ ދަށުން މަސައްކަތްކުރާ ޓީމުތަކުގެ ހިޔާލާއި އެއްގޮތަށް ޑިޕާޓްމަންޓްތައް ހިންގުމުގެ ޕްލޭންތައް އެކުލަވާލައި، ސެޕްގައި ވަނީ ހިމެނިފައި،" އެ ކުންފުނިން ބުންޏެވެ.

އެ ފްރޭމްވޯކުގައި ފަސް ސްޓްރެޓިޖިކް އޮބްޖެކްޓިވް އާއި 19 ސްޓްރެޓިޖިކް ގޯލް އާއި 55 ޓާގެޓް އަދި 96 އެކްޝަން ކަނޑައެޅިފައިވެ އެވެ.

އެ ޕްލޭން އިފްތިތާހުކުރުމުގެ ރަސްމިއްޔާތުގައި ފަހުމީ ވިދާޅުވީ ޒަމާނީ ވިސްނުމާ އެކު ތައުލީމީ ޒުވާނުން އެކުލަވާލި މި ޕްލޭނަކީ މުސްތަގުބަލް ކަނޑައެޅުމުގެ ހަރުދަނާ ބިންގަލެއް ކަމަށެވެ. އަދި މި ޕްލޭންގެ ސަބަބުން ކުންފުނި ހިންގުމަށް އިތުރަށް ފަސޭހަވެ، ކުންފުނީގެ ހުރިހާ ދާއިރާއަކުން ވެސް އެއް އަމާޒަކަށް މަސައްކަތް ކުރެވި، ހިންގުން ހަރުދަނާ ކުރެވޭނެ ކަމަށް ފަހުމީ ވިދާޅުވި އެވެ.