މާލޭގައި ގެއެއް އިމާރާތްކުރަނިކޮށް ޖެހިގެން ހުރި ގެއިން ބައެއް ގަނބައިގެންފި

މާލޭގައި ގެއެއް އިމާރާތްކުރަނިކޮށް، އެ ގެއާ ޖެހިގެން ހުރި ގެއެއްގެ ބައެއް މިއަދު ގަނބައިގެންފި އެވެ.

މާލޭ ސިޓީ ކައުންސިލް ދެންމެ ބުނީ މ. ނެވިގޭޓާ އިމާރާތްކުރަމުން ދަނިކޮށް، އެ ގެއާ ޖެހިގެން ހުރި މ. ލަކީ ހެވެންގެ ބައެއް ގަނބައިގަނެ އަޑިއަށް ދާތީ އެ ގެއިން މީހުން ހުސްކުރުމުގެ މަސައްކަތް މިހާރު ކުރަމުން އަންނަ ކަމަށެވެ.

އެ ގެ ހުންނަނީ އިއްޒުއްދީން މަގު، ހާމަ ފިހާރަ ކައިރީގަ އެވެ.

މިކަން ފާހަގަވީ މިއަދު މެންދުރު ފަހު އެވެ. މި ހާދިސާގައި އެއްވެސް މީހަކަށް އަނިޔާއެއް ނުވެ އެވެ.

ސިޓީ ކައުންސިލުން ބުނީ މިކަން ހިނގަން މެދުވެރިވީ ނެވިގޭޓާގެ އިމާރާތްކުރަމުން ދިޔައިރު، ޝީޓް ޕައިލް ނުކޮށް ހުރުމުގެ ސަބަބުން ކަމަށް ބެލެވޭ ކަމަށެވެ. އެހެންވުމުގެ ސަބަބުން ލަކީ ހެވަންގޭގެ ފާރުތަކުގައި ރެނދުލައި އަޑިއަށް ދާކަން ފާހަގަކުރެވިފައިވާ ކަމަށް ސިޓީ ކައުންސިލުން ބުންޏެވެ.

ލަކީ ހެވަންގޭގެ ހަތަރު ކޮޓަރިއެއްގައި ދިރިއުޅޭ ހަތަރު އާއިލާ އެތަނުން ބަދަލުކުރުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ.

"މި ގޭގައި ޖުމްލަ ހަތަރު ކޮޓަރިން ހަތަރު އާއިލާ، 18 އަހަރުން ދަށުގެ ތިން ކުދިންނާއި ހަ މީހުން [ބަދަލުކުރަނީ]. ދެ ބައިގައި ބޭރު މީހުން ކުއްޔަށް އުޅޭ،" ސިޓީ ކައުންސިލުން ބުންޏެވެ.