ސާހިލް ދެކޮޅު ހެދިޔަސް، އޭނާގެ ތަހުގީގު ބަޔާން ބަލައިގަތުމަށް ކޯޓުން ނިންމައިފި

މާލޭގެ ގެއެއްގެ ތެރޭގައި އަނިޔާވެރި ގޮތަކަށް އަންހެނަކު މަރާލި މައްސަލާގައި ދައުވާ ލިބޭ ސާހިލް އަލީ ފުލުހުންގެ ތަހުގީގަށް ދިން ބަޔާން ބަލައިނުގަތުމަށް އޭނާ އެދުނު ނަމަވެސް އެ ބަޔާން ބަލައިގަތުމަށް ކްރިމިނަލް ކޯޓުން މިއަދު ނިންމައިފި އެވެ.

މާލޭގެ ގެއެއްގެ ތެރޭގައި އޮގަސްޓް، 2023 ގައި ޝިއާއު މުހައްމަދު ސައީދު މަރާލުމަށް ފަހު އޭނާގެ ހަށިގަނޑަށް ބޮޑެތި ގެއްލުންތަކެއް ދިން މައްސަލާގައި ފ. ނިލަންދޫ ފިނިފެންމާގޭ ސާހިލްގެ މައްޗަށް ފަސް ދައުވާއެއް ކުރާއިރު، އެ ދައުވާތަކުގެ ޝަރީއަތް ކުރިއަށް ގެންދަނީ ސިއްރު ކޮށްގެންނެވެ.

ކްރިމިނަލް ކޯޓުން ބުނިގޮތުގައި މިއަދު ބޭއްވި އަޑުއެހުމުގައި، ސާހިލު ތަހުގީގަށް ދިން ބަޔާން ބަލައިނުގަތުމަށް އޭނާގެ ފަރާތުން އެދުނެވެ. ނަމަވެސް، އެ ބަޔާން ބަލައިގަތުމަށް ޝަރީއަތުން ނިންމާފައިވާ ކަމަށް ކޯޓުން ބުންޏެވެ.

މީގެ އިތުރުން ދައުލަތުގެ ނުވަ ހެއްކެއްގެ ހެކިބަސް ސިއްރުން ނަގަން ވެސް ކޯޓުން މިއަދު ވަނީ ނިންމައިފަ އެވެ. އެ މައްސަލާގެ އިބްތިދާއީ މަރުހަލާ މިއަދު ވަނީ ނިންމާލައިފަ އެވެ. އެހެންވެ، ދެން އޮންނާނީ ޝަރީއަތް ފަށައި، ހެކިބަސް ނެގުމެވެ.

ސާހިލް ވަނީ މީގެކުރިން ކޯޓުގައި ވާހަކަ ދައްކަން ދެކޮޅު ހަދާފަ އެވެ. ނަމަވެސް ދައުވާ އަށް ޖަވާބުދާރީ ނުވެވޭ ފަދަ ނުކުޅެދުންތެރިކަމެއް އޭނާގެ ކިބައިން ނުފެންނަ ކަމަށް ކޯޓުން ބުނެފައިވެ އެވެ.

ސާހިލް އަށް ދައުލަތުގެ ހަރަދުގައި ދެ ފަހަރަކު ވަކީލުން ހަމަޖައްސައިދިނެވެ. ނަމަވެސް، އޭނާ ވަކީލުންނަށް އެއްބާރުލުން ނުދޭތީ ދައުލަތުގެ ހަރަދުގައި އޭނާ އަށް ވަކީލުން އިތުރަށް ހަމަޖައްސައި ނުދޭން އެޓާނީ ޖެނެރަލްގެ އޮފީހުން އޮތީ ނިންމައިފަ އެވެ.

އެންމެފަހުން ސާހިލް ވަނީ އެ މައްސަލާގައި އަމިއްލައަށް ޖަވާބުދާރީވާން ބޭނުންވާ ކަމަށް ކޯޓުގައި ބުނެ، ވަކީލަކު ބޭނުން ނުވާކަން އަންގައިފަ އެވެ. މިއަދު ވެސް ސާހިލު ކޯޓުގައި ވަކާލާތުކުރީ އަމިއްލައަށެވެ.

ކްރިމިނަލް ކޯޓުން ސިއްރުން ގެންދާ މި މައްސަލާގައި ސާހިލުގެ މައްޗަށް ކުރާ ދައުވާތައް ވެސް އެ ކޯޓުން ވަނީ ސިއްރުކޮށްފަ އެވެ. ސިއްރުން ގެންދާ އެހެން ޝަރީއަތްތަކުގައި ވެސް ތުހުމަތު ކުރެވޭ މީހާގެ މައްޗަށް ކުރާ ދައުވާތައް ކޯޓުން ހާމަކުރެ އެވެ.