މައުމޫން ބޭނުންފުޅު ނުވި ނަމަ ޑިމޮކްރަސީއެއް ނުގެނެވޭނެ: ގާސިމް

ރައީސް މައުމޫން އަބްދުލްގައްޔޫމް ބޭނުންުފުޅު ނުވި ނަމަ ރާއްޖެ މިހާރު ތަޖުރިބާކުރާ ޑިމޮކްރަސީ ނުގެނޭވެނެ ކަމަށާއި އޭގެ ހައްގުވެރިއަކީ މައުމޫން ކަމަށް ޖުމްހޫރީ ޕާޓީގެ ރައީސް ގާސިމް އިބްރާހިމް މިރޭ ވިދާޅުވެއްޖެ އެވެ.

ރާއްޖެ އަށް ގިނަ ހިދުމަތްތަކެއް ކުރައްވަމުން ގެންދަވާ އަދި މައުމޫންގެ ސަރުކާރުގައި މުހިންމު އިސް މަގާމުތަކެއް ފުރުއްވި ގާސިމް އެހެން ވިދާޅުވީ، އޭނާގެ ބަޔޮގްރަފީ ނެރުމަށް ބޭއްވި ރަސްމިއްޔާތުގަ އެވެ. ނޫސްވެރިޔާ މުހައްމަދު ޖަމީލް ލިޔުއްވި އެ ބަޔޮގްރަފީ ނެރެދެއްވީ ކުރީގެ މިނިސްޓަރު އަދި ގާސިމްގެ ބައްޕަ ނެތް ދުނިޔޭގައި ބައްޕައެއް ކަމަށް ބައްލަވާ އިލްޔާސް އިބްރާހީމެވެ.

"ކޮންމެ މީހަކު ކޮންމެ އެއްޗެކޭ ބުންޏަސް އަޅުގަނޑު ގަބޫލުކުރާ ހިތެއް ނުވޭ މައުމޫނަކީ ޑިކްޓޭޓަރެކޭ، ބައެއް މީހުން ކިޔައި އުޅޭ [އެހެން]. ދެކޮޅު މީހުން އަބަދުވެސް ދައްކާނެ އެ ކަހަލަ ހުރިހާ ވާހަކައެއް. މައުމޫން އަތްޕުޅު ދަށުން، އެ މަނިކުފާނު ބޭނުންފުޅުވެގެން މި ޑިމޮކްރަސީ އަޅުގަނޑުމެންނާ ހަމައަށް ލިބުނީ. އަޅުގަނޑު މިއީ އެ މަސައްކަތުގައި އެންމެ އިސްކޮށް ހުރި މީހާ ފައިނޭންސް ދާއިރާ ކަމަށް ވިޔަސް ރައްޔިތުންގެ ހާއްސަ މަޖިލިހުގައި ކަމަށް ވިޔަސް،" ގާސިމް ވިދާޅުވި އެވެ.

"އެހެންވީމާ ވަރަށް ސާބިތުކަމާ އެކު މި ދެންނެވީ މައުމޫން އެކަން ކޮށްދެއްވަން ބޭނުންފުޅު ނުވި ނަމަ ދިވެހިރާއްޖެއަކަށް މިއަދު މި އޮތް ޑިމޮކްރަސީއެއް އަޅުގަނޑުމެންނަކަށް ނުގެނެވޭނެ. އެއީ ލާހިކު ކަމެއް ނޫން."

ގާސިމް ވިދާޅުވީ، ރާއްޖެ އަށް ޑިމޮކްރަސީ ގެނައުމަށްޓަކައި މައުމޫން 2004 ގައި އިއުލާން ކުރެއްވި އިސްލާހީ އެޖެންޑާގައި ނެތް ކަމެއް މިއަދު ނުހިނގާ ކަމަށެވެ.

"ކޮބައިތޯ ހުޅުވާނުލައި އޮތް ކަމަކީ؟ އޭގެ ދަށުން ދެއްތޯ މިނިވަންކަމާ އެކު ބަހުސް ކުރަން ފެށީ. އޭގެ ސަބަބުން ދެއްތޯ މި ހުރިހާ ކަމެއް ހިނގައި މި ދިޔައީ،" މައުމޫނަށް ތައުރީފު ކުރައްވަމުން ގާސިމް ވިދާޅުވި އެވެ.

އޭނާ ވިދާޅުވީ، ދިވެހިން މިއަދު މި ދެކޭ ޑިމޮކްރަސީގެ އިތުރުން މިނިވަންކަން މައުމޫނާއި މައުމޫންގެ ސަރުކާރުން ދޭން ބޭނުންފުޅު ނުވި ނަމަ މިއަދު ވެސް ނުލިބޭނެ ކަމަށެވެ.

"ހަމަ ތިބެން ޖެހޭނީ ހަޅޭއްލަވަލަވައި މަގުމަތީގައި. އެއީ ހަމަ ކަށަވަރު ކަމެއް،" މައުމޫންގެ ސަރުކާރުގައި ފިނޭންސް މިނިސްޓަރުކަމާއި އެމްއެމްއޭގެ ގަވަރުނަރުކަން ވެސް ކުރެއްވި ގާސިމް ވިދާޅުވި އެވެ.

އޭނާ ވިދާޅުވިގޮތުގައި މައުމޫން އިސްވެ، އިސްލާހީ ބަދަލުތައް ގެންނެވީ ގައުމުގެ ހާލަތު ބަދަލުވިކަން އެނގިވަޑައިގަންނަވާތީ އެވެ. ކުރީގެ "މައިންޑްސެޓް" ބަދަލުކުރަން ޖެހިއްޖެ ކަން މައުމޫނަށް އެނގިވަައިގަންނަވާ ކަމަށް ގާސިމް ވިދާޅުވި އެވެ.

"އެއީ އިންޓަނޭޝަނަލް ޕްރެޝާ އާއި ލޯކަލް ޕްރެޝާ، އަޅުގަނޑުމެންގެ ޑޮމެސްޓިކް ޕްރެޝާ އެ ހިސާބަށް ދިޔައީމާ އެ މަނިކުފާނަށް އެނގިވަޑައިގަތީ. އެ މަނިކުފާނަކީ މޮޔަ ބޭފުޅެއް ނޫނޭ. ވަރަށް ވިސްނުންތެރި، ވަރަށް ގާބިލް، ވަރަށް އިލްމީ ބޭފުޅެއް އެއީ. އެ ކަމުގެ ހަގީގަތް އަޅުގަނޑުމެންނަށް މިއަދު ވެސް މި ފެންނަނީ،" ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ވަހީދު އަދި ސިޔާސީ އެކި ފިކުރުގެ ގިނަ ބޭފުޅުންތަކެއް ބައިވެރިވެވަޑައިގެންނެވި ޖަލްސާގައި ގާސިމް ވިދާޅުވި އެވެ.

ގާސިމް ވިދާޅުވިގޮތުގައި އޭނާގެ ތައުރީފު މައުމޫނަށް "އޮއްސާލައްވަނީ" ހައްގު މަސައްކަތްޕުޅުތަކެއް މައުމޫން ކުރެއްވުމުންނެވެ.

ޖަލަށްލުމަކީ ލިބިވަޑައިގެންނެވި ފިލާވަޅެއް

ގާސިމް މިރޭ ވިދާޅުވީ، 2008 ވަނަ އަހަރު ފިޔަވައި މައުމޫންގެ ވެރިކަމުގައި ކޮންމެ ރިޔާސީ އިންތިހާބެއްގައި ވެސް އޭނާ ހުންނެވީ މައުމޫނާ އެއްކޮށް ކަމަށެވެ. މައުމޫން އިންތިހާބު ކުރަން އެ އިން ކޮންމެ ފަހަރަކު "ހެސްކިޔާފައި" މަސައްކަތް ކުރެއްވި ކަމަށާއި އެކަމަކު ސިޔާސީ މަސްރަހު ބަދަލުކުރަން ވަކި ހިސާބަކުން ނުކުންނެވުމުން ހިތްހަމަނުޖެހުން އުފެދޭނެ ކަމަށް ގާސިމް ވިދާޅުވި އެވެ.

އިސްލާހީ މަސައްކަތްތަކާ ގުޅިގެން މައުމޫންގެ ވެރިކަމުގައި ވެސް ޖަލަށް ލާފައިވާ ގާސިމް ވިދާޅުވީ، އެ ތަޖުރިބާތައް އޭނާ މިހާރު ބައްލަވަނީ "ބޭބެއަކު ނަސޭހަތް ދިނުމުގެ ގޮތުން" ދެއްވި ފިލާވަޅެއްގެ ގޮތުގައި ކަމަށެވެ.

"އެއީ އަޅުގަނޑުގެ މުސްތަގުބަލް އުޖާލާ ކުރުމަށްޓަކައި އަޅުގަނޑަށް ލިބުނު ދަރުސެއް ކަމަށް އަޅުގަނޑު ގަބޫލު ކުރަނީ، އެއްގޮތަކަށް ވެސް އަޅުގަނޑަށް ދެއްވި އަނިޔާއެއް ކަމަކަށް ނުދެކެން،" ސިޔާސީ ކަންތައްތަކުގައި އުޅުއްވައިގެން ލިބިފައިވާ "އަނިޔާތަކަށް" އިޝާރާތް ކުރައްވަމުން ގާސިމް ވިދާޅުވި އެވެ.

ގާސިމް ވަރަށް ކުޑައިރު މާލެ ވަޑައިގެން އެންމެ ފުރަތަމަ ދިރިއުޅުއްވީ މައުމޫންގެ އަނބިކަނބަލުން ނަސްރީނާ އިބްރާހިމްގެ ބައްޕާފުޅުގެ ގެކޮޅު މ. އެންދެރިމާގޭގަ އެވެ. ދިރިއުޅުމެއް ފައްޓަވަންދެން ގާސިމް އެ ގެކޮޅުގައި އުޅުއްވި އެވެ. އަދި ކުރީގެ ރައީސް އިބްރާހިމް ނާސިރުގެ ވެރިކަމުގައި ވެސް ނާސިރާ އެންމެ ގާތުން މަސައްކަތް ކުރެއްވި އިލްޔާސާއި ގާސިމްގެ ގުޅުން ވަރަށް ބޮޑަށް ބަދަހިވެ، ގާސިމްގެ ބައްޕަ އަވަހާރަވުމުން ބައްޕައެއްގެ ގޮތުގައި ބައްލަވަނީ ވެސް އިލްޔާސް އެވެ.

އެހެންވެ، މިރޭގެ ޖަލްސާގައި ގާސިމް ވަނީ އޭނާގެ ކުރިއެރުމުގެ އަސްލަކީ އިލްޔާސާއި އައްބާސް އިބްރާހިމް ނުވަތަ އެންދެރިމާގެ އިން ލިބިވަޑައިގެންވި ތަރުބިއްޔަތުކަން ފާހަގަކުރައްވައި އެ އާއިލާ އަށް ވަރަށް ބޮޑަށް ތައުރީފު ކުރައްވައިފަ އެވެ.