ޔޫރަޕުގެ މަތިންދާބޯޓުތައް މަރާމާތުކުރުމުގެ ހުއްދަ އައިލެންޑް އޭވިއޭޝަނަށް

ޔޫރަޕުގައި ރަޖިސްޓްރީކޮށްފައިވާ މަތިންދާބޯޓުތައް މަރާމާތުކުރުމުގެ ހުއްދަ، ގައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަނަށް ލިބިއްޖެ އެވެ.

އައިލެންޑް އޭވިއޭޝަނުން ނެރުނު ބަޔާނެއްގައި ބުނީ، ޔޫރަޕިއަން އޭވިއޭޝަން ސޭފްޓީ އޭޖެންސީ (އިއާސާ) ޕާޓް 145 ގެ ސެޓްފިކެޓު ލިބިފައިވާ ކަމަށާއި، މިއީ އެ ކުންފުނީގެ މަތިންދާބޯޓުތައް މަރާމާތުކުރުމުގެ ގާބިލުކަމަށް ލިބުނު ވަރަށް ބޮޑު ކުރިއެރުމެއް ކަމަށެވެ.

މިއީ އެ ކުންފުނިން ހާސިލުކުރި ޕާޓް 145 ގެ 12 ވަނަ ސެޓްފިކެޓު ކަމަށް އެ ބަޔާނުގައި ފާހަގަކޮށްފައިވެ އެވެ. ޕާޓް 145 އަކީ މަތިންދާބޯޓުތައް މަރާމާތުކުރުމުގެ ކަންކަން ކުރުމަށް ކަނޑައަޅާފައިވާ ބައިނަލްއަގުވާމީ އެންމެ މަތީ މިންގަނޑެކެވެ.

މިކަމާ ގުޅިގެން ޓްރާންސްޕޯޓް މިނިސްޓަރު މުހައްމަދު އަމީން އެކްސްގައި ކުރެއްވި ޕޯސްޓެއްގައި ވަނީ ރާއްޖޭގެ ތާރީހުގައި ފުރަތަމަ ފަހަރަށް ހޯދުނު ކާމިޔާބީ ފާހަގަކުރައްވައިފަ އެވެ.

އަމީން ވިދާޅުވީ މިފަދަ ކާމިޔާބީތައް ހާސިލުވެގެންދަނީ ރައީސް ޑރ. މުހައްމަދު މުއިއްޒު ގައުމީ އެއާލައިން ޒަމާނީކޮށް ފުޅާކުރެއްވުމަށް ގެންގުޅުއްވާ ސިޔާސަތުގެ ތެރެއިން ކަމަށެވެ.

މި ސެޓްފިކެޓް ލިބުމާ ގުޅިގެން، އައިލެންޑް އޭވިއޭޝަންގެ އިންޖިނިއަރިން އޮޕަރޭޝަން ޑިރެކްޓަރު މުހައްމަދު ހަސަން ވިދާޅުވީ، މި ސެޓްފިކެޓްގެ ސަބަބުން ވެލާނާ އެއާޕޯޓަށް ޖައްސާ އެއާލައިތަކުގެ ބޯޓުތަކަށް ރަނގަޅު ފެންވަރުގެ ހިދުމަތްދެވި، ބޯޓުތަކަށް ދިމާވާ މައްސަލަތައް ވަގުތުން ހައްލުކުރުމަށް މަގުފަހިވެގެންދާނެ ކަމަށެވެ.

އައިލެންޑް އޭވިއޭޝަނަކީ މިހާރު ވެސް ގިނަ މަތިންދާބޯޓުތަކެއް މަރާމާތުކޮށް ބެލެހެއްޓުމުގެ ހިދުމަތް ދިނުމުގެ ގާބިލްކަން ލިބިފައިވާ ކުންފުންޏެކެވެ. އޭގެތެރޭގައި ބައިނަލްއަގުވާމީ ވައިގެ ދަތުރުފަތުރުގައި ބޭނުންކުރާ އެންމެ ބޮޑެތި އެއާބަސްގެ ބޯޓުތަކާއި، ބޮއިން 777 އަދި 787 ފަދަ ވައިޑް ބޮޑީ މަތިންދާބޯޓުތައް ހިމެނެ އެވެ.