ޔޫކްރޭނާ އެއްކޮޅަށް ނަޝީދު ހުންނެވުމުން ރަޝިއާ ސަފީރުގެ ނުރުހުން

ރަޝިޔާ އާއި ޔޫކްރޭނާ ދެމެދު ކުރަމުންދާ ހަނގުރާމައާ ގުޅިގެން އދ. ގައި މި ހަފުތާގައި ނެގި ވޯޓެއްގައި ޔޫކްރޭނަށް ތާއީދުކޮށް ރާއްޖޭން ވޯޓު ދިނުމަކީ ލިބިވަޑައިގެންނެވި ފަހުރެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވުމުން، އެކަމާ ވަރަށް ހިތްހަމަޖެހިވަޑައިނުގެން، ރަޝިޔާއިން ރާއްޖެއަށް ކަނޑައަޅާފައި ހުންނަވާ ސަފީރު ވަރުގަދަ ރައްދެއް ދެއްވައިފި އެވެ.

މިދިޔަ ހޯމަ ދުވަހު ނެހި ވޯޓުގައި ރާއްޖޭން ވޯޓުން ލާފައިވަނީ، މި ހަނގުރާމައާ ގުޅިގެން ދިވެހި ސަރުކާރުން ހިފަހައްޓަމުން އައި ސިޔާސަތާ އެއްގޮތަށް ޔޫކްރޭނާ އެއްކޮޅަށެވެ.

އެ ވޯޓާ ގުޅިގެން ނަޝީދު އެކްސްގައި ވިދާޅުވީ، އެމެރިކާގެ އިތުރުން އުތުރު ކޮރެއާ އާއި ރަޝިއާއާ އެއްކޮޅަށް ވޯޓު ދިނުމުން ހައިރާންވެވަޑައިގެންނެވި ކަމަށެވެ.

"އަޅުގަނޑު އުފާކުރަން ޔޫރަޕްގެ ގައުމުތަކާ އެކު ރާއްޖޭން ވެސް އާންމު ވިސްނުމާ އެއްގޮތަށް، ވޯޓު ލުމުގައި ހިތްވަރާއި ދުރުވިސްނުން އިސްކޮށްފައިވާތީ،" ނަޝީދު ވިދާޅުވި އެވެ.

އެކަމާ ގުޅިގެން، ސަފީރު ލިވަން އެސް ޖަގަރްޔަން ވިދާޅުވީ، ޔޫކްރޭނާ އެއްކޮޅަށް ރާއްޖޭން ވޯޓު ދިނުމަކީ ފަހުރެއްގެ ގޮތުގައި ނަޝީދު ސިފަކުރެއްވުމުން ވަރަށް ބޮޑު ހައިރާންކަމެއް ލިބިވަޑައިގެންނެވި ކަމަށެވެ.

އަދި ޔޫކްރޭނު ހަނގުރާމަ އަށް ސުލްހަވެރި ނިމުމެއް ގެންނަން މިހާރު ބަދަލުވެފައިވާ ވިސްނުމާ އެހާ ދުރުގައި ނަޝީދު ފަދަ ތަޖުރިބާކާރު ސިޔާސީ ބޭފުޅަކު ހުންނެވުމަކީ އެތައް ސުވާލެއް އުފެދޭ ކަމެއް ކަމަށް ސަފީރު ވިދާޅުވި އެވެ.

އޭނާ ވިދާޅުވި ގޮތުގައި، އެމެރިކާ އިން ވެސް ހަގީގަތާ އެއްގޮތް ސިޔާސަތަކާ ދިމާއަށް މިސްރާބު ޖަހާފައިވާއިރު، ނަޝީދު މި އިސްކުރައްވަނީ ޔޫރަޕުން ގެންގުޅޭ މިހާރު މުސްކުޅިވެފައިވާ ކުރިމަތިލުމާއި އަސްކަރީ ބާރުގެ ވިސްނުމެވެ.

"އަޅުގަނޑު ނަޝީދަށް ހަނދާންކޮށްދޭން ބޭނުންވަނީ، އަޖައިބެއް ފަދަ ޖަޒީރާ ރަށްތަކުގައި ޗުއްޓީ ހޭދަކޮށް، ރާއްޖޭގެ ބަޖެޓު ބޮޑުކޮށްދެނީ ރަޝިއާގެ ޓޫރިސްޓުން [ޔޫކްރޭނުގެ މީހުން ނޫން] ކަން،" އޭނާ ވިދާޅުވި އެވެ.

އެއާ އެކު، ސަފީރު ވަނީ ރަޝިއާ އިން ރާއްޖެ އަށް ވަމުންދާ މިފަދަ އެހީތެރިކަން ބަލައިގަތުމަށް ނަޝީދުގެ އަރިހުން އެދިވަޑައިގެންފަ އެވެ.