ކުރުދީ ހަނގުރާމަވެރިން އައިއެސްގެ އަމާޒުތަކާ ގާތަށް

(ބައިރޫތު) - އުތުރު ސީރިޔާ އަށް އަތް ގަދަކޮށްގެން ތިބި އިސްލާމިކް ސްޓޭޓް (އައިއެސް) ޖަމާއަތާ ދެކޮޅަށް، އެމެރިކާގެ އެހީތެރިކަމާ އެކު ހަނގުރާމަ ކުރަމުންދާ ސީރިޔާގެ ކުރުދީ ހަނގުރާމަވެރިން، އެއިއެސްގެ މަގާމުތަކާ ގާތަށް ޖެހެން ފަށައިފި އެވެ.

ސީރިޔާ އިން އައިއެސްގެ ހަނގުރާމަވެރިން ފައްސާލުމަށް ކުރުދީ ހަނގުރާމަވެރިން ކުރަމުންދާ މަސައްކަތުގައި މިދިޔަ ހުކުރު ދުވަހު ވަނީ ތަބްގާ އަވަށުގައި ހުންނަ ޑޭމް ސަރަހައްދަށް ޖަމާވެފަ އެވެ. އެ ސަރަހައްދަށް ކުރުދީ ހަނގުރާމަވެރިން ޖަމާކުރީ ވޭތުވެ ދިޔަ ތިން ދުވަހު އެމެރިކާގެ އަސްކަރީ މަތިންދާބޯޓުތަކުން އެ ސަރަހައްދަށް ކުރި ދަތުރުތަކުގަ އެވެ.

އެމެރިކާ ސިފައިންގެ މި ހަރަކާތްތަކާ ގުޅިގެން ސީރިޔާ ސަރުކާރު ވަނީ ރުޅިގަދަ ވެފަ އެވެ. އދ. ގައި ހުންނަވާ ސީރިޔާގެ ސަފީރު ވިދާޅުވި ގޮތުގައި އެމެރިކާ ސިފައިން މިހާރު ދަނީ ސީރިޔާ އަށް އަރައިގަނެ އެ ގައުމަށް ހަމަލާ ދެމުންނެވެ. އައިއެސް ޖަމާއަތުގެ ވެރި ރަށުގެ ގޮތުގައި ހަދާފައިވާ ރައްގާ މިނިވަން ކުރުމަށް ކަމަށް ވިޔަސް، ސީރިޔާގެ ތެރޭގައި އަސްކަރީ އެއްވެސް ހަރަކާތެއް ހިންގަންވާނީ ސީރިޔާ ސަރުކާރާ ގުޅިގެން ކަމަށް ވެސް އޭނާ ވިދާޅުވި އެވެ.

ރައްގާގެ ހުޅަނގުގައި އޮންނަ ތަބް އަށް ކުރުދީ ހަނގުރާމަވެރިން ޖަމާކުރަމުން މިދަނީ އެ ސަހަރު މިނިވަން ކުރުމަށްޓަކައި އެއްގަމު މަގުން ހަމަލާ ދޭން ފެށުމަށެވެ. ވޭތުވެ ތިޔަ މަސްތަކުގައި އައިއެސްއާ ދެކޮޅަށް ތިން ބަޔަކު ވަނީ ވައިގެ މަގުން ހަމަލާތައް ދީފަ އެވެ. އެއީ އެމެރިކާގެ މަދަދު ލިބޭ ހަނގުރާމަވެރިންނާއި ތުރުކީ ސިފައިންނާއި ސީރިޔާ ސަރުކާރުގެ ސިފައިންނެވެ.

ސީރިއަން ޑިމޮކްރެޓިކް ފޯސަސްގެ ތަރުޖަމާން ޖީހާން ޝައިޚް އަހްމަދު ބުނި ގޮތުގައި އައިއެސްގެ ހަނގުރާމަވެރިންނާ ދެކޮޅަށް މިހާރު އެންމެ ވަރުގަދަ އަށް ހަނގުރާމަ ހިނގަމުން ދަނީ ތަބްގާ އަވަށުގައި ހުންނަ ޑޭމް ސަރަހައްދުގަ އެވެ. އަދި މިހާރު ދެމުންދާ ހަމަލާތަކުގައި އައިއެސްގެ ހަނގުރާމަވެރިންނަށް ބޮޑެތި ގެއްލުންތަކެއް ލިބެމުންދާ ކަމަށް އޭނާ ބުނެ އެވެ.

ނަމަވެސް ކުރުދީ ހަނގުރާމަވެރިންނަށް އެ ސަރަހައްދުގައި ކުރި އަށް ދެވެނީ ވަރަށް މަޑުން ކަމަށް ޚަބަރު ލިބެ އެވެ. ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުނި ގޮތުގައި ކުރުދީ ހަނގުރާމަވެރިންނަށް އެކަށީގެންވާ ބާރުމިނުގައި ކުރި ނޭރެނީ އައިއެސްގެ ހަނގުރާމަވެރިން މަގުތަކުގައި ވަޅުލާފައިވާ މައިންތަކާއި ގޮވާތަކެތީގެ ސަބަބުންނެވެ.

ސީރިޔާގެ އަސްކަރިއްޔާގެ މީޑިއާ އިން ބުނާ ގޮތުގައި މިދިޔަ ހުކުރު ދުވަހު ސަރުކާރު ސިފައިން ވަނީ ހަލަބްގެ ދޭރް ހަފްރު އަވަށް ހިފައިފަ އެވެ. އެއީ އައިއެސް ހަނގުރާމަވެރިންގެ ބާރުގެ ދަށުގައި އޮތް ހަލަބްގެ އެންމެ ފަހު އަވަށެވެ. ސީރިޔާ ސަރުކާރުގެ ސިފައިން އެ އަވަށް ހިފީ ރަޝިޔާގެ މަތިންދާބޯޓުތަކުން ވައިގެ މަގުން ދިން ހަމަލާތަކުގެ އެހީގަ އެވެ.

ހަލަބުން އައިއެސްގެ ހަނގުރާމަވެރިން ފައްސައިލުމުން، އެ ޖަމާއަތުގެ ހަނގުރާމަވެރިން މިހާރު ބާރު ގަދަ ކުރަމުން ދަނީ އިރާގުގެ ސަރަހައްދީ ރޮނގާ ކައިރީގައި އޮންނަ ދޭރް އައް ޒޫރްގަ އެވެ.