މަސް ގަންނަ އަގު 20 ރުފިޔާ އަށް ބޮޑުކުރަން މިފްކޯއާ އެކު މަޝްވަރާ ކުރިއަށް އެބަދޭ: ރައީސް

މަސް ގަންނަ އަގު މި ސަރުކާރުން 20 ރުފިޔާ އަށް ބަދަލުކޮށްދެއްވާނެ ކަމަށާއި ދެމެހެއްޓެނިވި ގޮތަކަށް އެކަން ކުރެވޭނެ އިންތިޒާމެއް ހަމަޖެއްސުމުގެ މަޝްވަރާ ބައްދަލުވުންތައް ކުރިއަށް އެބަދާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

މ. އަތޮޅަށް ކުރައްވާ ދަތުރުފުޅުގައި ދިއްގަރުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ އެ ރަށަކީ މަސްވެރިކަން ކުރިއަރާފައިވާ ރަށަކަށް ވާތީ މަސްވެރިން ކަންބޮޑުވުންތައް ހުންނާނެކަން ގަބޫލު ކުރައްވާ ކަމަށެވެ.

މަސްވެރިކަމުގެ މުޅި ސިނާއަތް ކުރިއަރުވައި ހަރުދަނާކުރަން މަސްވެރިންގެ އަޑު ގާތުން އަހައި، އެކަންކަން ހައްލު ކުރެވޭނެ ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި މަސް ގަންނަ އަގު 20 ރުފިޔާ އަށް ހެދުމަށް މިފްކޯއާ އެކު މަޝްވަރާތައް ކުރިއަށް އެބަދެ އެވެ. އެކަމަށް ވަގުތު ނަގަނީ އެ ބައްދަލުވުންތައް ކުރިއަށް ދާތީ ކަމަށް ރައީސް ވިދާޅުވި އެވެ.

މި ސަރުކާރުން ވެރިކަމާ ހަވާލުވި އިރު މަސްވެރިންނަށް ކުރީގެ ސަރުކާރުން ނުދީ 150 މިލިއަން ރުފިޔާ ބެކްލޮގެއް އޮތެވެ. އެކަމަކު އެ ފައިސާ މަސްވެރިންނަށް ހަމަޖައްސައިދީ، މަސްކިރާތާ 48 ގަޑިއިރުގެ ތެރޭގައި މިދިޔަ ޑިސެމްބަރުން ފެށިގެން ފައިސާ ދޫކުރަން ފަށާފައިވާ ކަން ރައީސް ފާހަގަކުރެއްވި އެވެ.

މަސްވެރިންވެރިން މިދިޔަ މެއި މަހު ރައީސްއާ ބައްދަލުކުރައްވައި، މަސް ގަންނަ އަގު 20ރ. އަށް ބަދަލުކޮށްދޭން ވަނީ އެދިފަ އެވެ.

އެ ބައްދަލުވުމަށް އިޝާރާތްކުރައްވައި ރައީސް ވިދާޅުވީ އެމަނިކުފާނު ވައުދާ އެއްގޮތަށް އެކަން ހަމަޖައްސައިދެއްވާނެ ކަަމަށެވެ. ސަރުކާރުން އެ މަސައްކަތް ވެސް ކުރަމުން އަންނަ ކަމަށް ވިދާޅުވި އެވެ.

ރައީސް ވިދާޅުވީ މަަސް ގަންނަ އަގު ބޮޑުކުރުމުގެ ވައުދު ފުއްދާނީ، ހަމައެކަނި ނަމަކަށް ނޫން ކަމަށެވެ. ތަރުތީބު ކުރަން ޖެހޭ ކަންކަން ތަރުތީބުކޮށް، ސަރުކާރުގެ އެ ސިޔާސަތު ތަންފީޒުކުރަން ފަށާނީ މެދުނުކެނޑި ކުރިއަށްދާނެ ކަން ޔަގީންކުރުމަށް ފަހު ކަމަށް ރައީސް ވިދާޅުވި އެވެ.

"އަޅުގަނޑުވީ އެންމެ މުހިންމު ވައުދަކީ 20 ރުފިޔާގެ ވައުދު. އެއީ ވެސް ހަމަ ސަސްޓެއިނަބަލްކޮށް މެދުކެނޑުމެއް ނެތި ކުރިޔަށް ގެންދަން ބޭނުންވާ ކަމެއް. ހަމަ ނަމެއްގައި މާދަމާއިން ފެށިގެން 20 ރުފިޔާއޭ ބުނުމުން އަދި ކަމަކު ނުދޭ،" ރައީސް ވިދާޅުވި އެވެ.

"އެކަން ތަންފީޒު ކުރަން ވަރަށް ގިނަ މަސައްކަތްތަކެއް މި އަންނަނީ ކުރަމުން. އެއީ ވެސް ހަމަ އަޅުގަނޑުމެން ހާސިލު ކުރާނެ ކަމެއް."