ތިމަރަފުއްޓަށް ދިރިއުޅުން ބަދަލުކުރަން ފުރުސަތު ދޭން މެމްބަރުގެ ހުށަހެޅުމެއް

ތ. ތިމަރަފުއްޓަށް ދިރިއުޅުން ބަދަލުކުރަން ބޭނުންވާ މީހުންނަށް އެ ފުރުސަތު ދިނުމުގެ ހުށަހެޅުމެއް ތިމަރަފުށީ ދާއިރާގެ މެމްބަރު އަހްމަދު ރިޔާޒު ހުށަހަޅުއްވައިފި އެވެ.

ރައީސް އެ އެ އަތޮޅަށް ކުރައްވާ ދަތުރުފުޅުގައި އެންމެ ފަހު ރަށަކަށް ވަޑައިގެންނެވީ ތިމަރަފުއްޓަށެވެ.

އެ ރަށު ރައްޔިތުންނާ ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ރިޔާޒް ވިދާޅުވީ އެ ރަށުގައި ހިއްކުމަށްފަހު އެއްވެސް ބޭނުމެއް ނުކޮށް އޮތް ހުސް ބިމެއް އެބައޮތް ކަމަށެވެ.

އެހެންކަމުން، އޭނާގެ ހިޔާލެއްގެ ގޮތުގައި ހުށަހެޅުއްވީ، އެ ރަށަށް ދިރިއުޅުން ބަދަލުކުރަން ބޭނުންވާ އެހެން ރަށްރަށުގެ މީހުންނަށް އެ ތަނުގައި ގެ އަޅައި ހަވާލުރުމުގެ ފުރުސަތު ދިނުމަށެވެ.

"އަޅުގަނޑުމެންގެ މި ހުސް ބިން އޮތް ތިމަރަފުށީގައި އެފަދަ ފަރާތްތަކަށް [ތިމަރަފުއްޓަށް ދިރިއުޅުން ބަދަލު ކުރަން ބޭނުންވާ މީހުންނަށް] ހައުސިން ޔުނިޓްތަކެއް އަޅާފައި ނަމަވެސް ދޫކޮށްލަދެއްވުމަކީ އެއީ ވަރަށް މުހިންމު ކަމެއްގެ ގޮތުގައި އަޅުގަނޑަށް ފެންނާތީ،" ރިޔާޒް ވިދާޅުވި އެވެ.

"އަދި އަޅުގަނޑުގެ ބައެއް އެކުވެރި ރަހުމަތްތެރިން ވެސް ތިމަރަފުއްޓަށް އިތުރު ރަށެއްގެ ބަޔަކު ގެނައުމުގެ ޝައުގުވެރިކަން ހުންނާތީ އަޅުގަނޑުމެންނަށް އަދި އެ އަންނަ ބަޔަކަށް ވެސް އިތުރު ކުރިއެރުން ލިބޭނެތީ، ލިބިދާނެ ކަމަށް ފެންނާތީ، އަޅުގަނޑު ހަމަ ހިތަށް އެރީ ހިއްސާ ކޮށްލާނަމޭ."

އެ ނިންމުމަށް ރައީސް ވެސް ތާއީދު ކުރައްވާނެކަން ޔަގީން ކުރައްވާ ކަމަށް އޭނާ ވިދާޅުވި އެވެ.

ތިމަރަފުއްޓަށް ބަދަލުވާން ބޭނުންވާ މީހުންނަށް އެ ރަށުން ފުރުސަތު ދިނުމުގެ ހިޔާލެއް ހުށަހަޅާފައިވާއިރު، ވަސީލަތްތައް މަދު އަދި ކުދި ރަށްތަކުގައި ދިރިއުޅޭ އެންމެން އެ އަށް ވުރެ ބޮޑެތި ރަށްރަށަށް ބަދަލުވާން ސަރުކާރުން ހިތްވަރު ދޭ ކަމަށާއި އެކަމަކު އެ ކަން ކުރިއަށް ގެންދަން ބޭނުންފުޅުވަނީ ރައްޔިތުން އަމިއްލަ އަށް ބޭނުންވެގެން ކަމަށް ރައީސް މުއިއްޒު އިއްޔެ ވަނީ ވިދާޅުވެފައި އެވެ.

ރައީސް ވިދާޅުވީ އާބާދީ އެއްފަސް ކުރުމަކީ މި ސަރުކާރުގެ ވަރަށް މުހިންމު ސިޔާސަތެއް ކަމަށެވެ. އަދި ބޮޑެތި ރަށްރަށަށް މީހުން ބަދަލުވާން ފުރުސަތު ދޭން ނިންމާފައިވާ ކަމަށް ވެސް އެ މަނިކުފާނު ވިދާޅުވި އެވެ.

މި ސަރުކާރުގެ އެއްފަސް ކުރުމުގެ ސިޔާސަތާ އެއްގޮތަށް ރަށުން އެހެން ރަށަކަށް ބަދަލުވާން ތިން ރަށުގެ ބައެއް މީހުން އެދިފައިވެ އެވެ. އެއީ ވ. ރަކީދު އާއި މ. ރަތްމަންދޫގެ އިތުރުން ކިނބިދޫ މީހުންނެވެ.