ގާނޫނާ ހިލާފަށް ބިދޭސީން ހިންގާ ވިޔަފާރިތައް ރިޕޯޓުކުރަން އެދިއްޖެ

ބިދޭސީން ރާއްޖޭގައި ގާނޫނާ ހިލާފަށް ހިންގާ ވިޔަފާރިތައް ރިޕޯޓުކުރަން އިކޮނޮމިކް ޑިވެލޮޕްމަންޓް މިނިސްޓްރީން މިއަދު އެދިއްޖެ އެވެ.

އެ މިނިސްޓްރީން ނެރުނު ބަޔާނުގައި ބުނީ ބިދޭސީން ގާނޫނާ ހިލާފަށް ވިޔަފާރިކުރާކަމުގެ ޝަކުވާތައް ލިބެމުންދާ ކަމަށެވެ. އެ ވިޔަފާރިތައް މައިގަނޑު ގޮތެއްގައި ކުރަނީ ދެ ގޮތަކަށް ކަމަށް އިއުލާނުގައި ބުންޏެވެ.

އެއް ގޮތަކީ، އިއުލާނުގައި ބުނެފައިވާ ގޮތުން، ލައިސަންސާއި ހުއްދަ ހޯދުމަށް އިސް ސަފުގައި ދިވެހިން ބޭނުންކުރިއަސް ވިޔަފާރި ހިންގުން މައިގަނޑު ގޮތެއްގައި ބިދޭސީން ކޮންޓްރޯލްކުރާ ވިޔަފާރިތަކެވެ. އަދި ފޮރިން އިންވެސްޓްމަންޓްގެ ގާނޫނުގެ ދަށުން ބިދޭސީންނަށް މަނާކޮށްފައިވާ ދާއިރާތަކުގައި ބިދޭސީން ހަރަކާތްތެރިވާ ކަމަށް ވެސް ބުންޏެވެ.

އެކަމަށް ހައްލު ހޯދަން ސަރުކާރުން ގިނަ ފިޔަވަޅުތަކެއް އަޅާފައިވާ ކަމަށާއި އޭގެ ތެރެއިން ފޮރިން އިންވެސްޓްމަންޓު ގާނޫނަށް ބަދަލުތަކެއް ގެނެސް ސެޕްޓެމްބަރު 3، 2024 ގައި ޝާއިއުކޮށްފައިވާކަން ފާހަގަކުރި އެވެ.

ގަވާއިދާ ހިލާފަށް ވިޔަފާރިކުރާ ބިދޭސީންގެ މައުލޫމާތު ލިބިފައިވާނަމަ، އެ ފަރާތްތަކުގެ މައުލޫމާތު މިނިސްޓްރީގެ ވެބްސައިޓު ނުވަތަ އެ މިނިސްޓްރީގެ ނަމްބަރު 3333199 އަށް ގުޅައިގެން ނުވަތަ އިމުގަ ޕޯޓަލް އިން މައްސަލަ ހުށަހެޅޭނެ އެވެ.

މިނިސްޓްރީން ބުނީ އެ މައުލޫމާތު ފޮނުވާނީ ގާނޫނާ ހިލާފަށް ބިދޭސީންގެ ވިޔަފާރިތައް ހުއްޓުވުމަށް ހާއްސަކޮށްފައިވާ ގައުމީ ޓާސްކް ފޯހަށެވެ. އެ ޓާސްކްފޯހުގައި ހިމެނެނީ އިކޮނޮމިކް މިނިސްޓްރީގެ އިތުރުން ހޯމްލޭންޑު ސެކިއުރިޓީ މިނިސްޓްރީ އާއި ޕޮލިހާއި އިމިގްރޭޝަން އަދި ސަރުކާރުގެ ކަމާގުޅޭ އެހެން އިދާރާތަކެވެ.