ސަން ސިޔާމް ގްރޫޕުން ލަންކާއަށް 200،000 ޑޮލަރު

ތޫފާން ދީތުވާގެ ސަބަބުން ފެންބޮޑުވެ، ބޮޑެތި ގެއްލުންތައް ވެފައިވާ ސްރީ ލަންކާއަށް ސަން ސިޔާމް ގްރޫޕްގެ ފަރާތުން 200،000 ޑޮލަރު ހަދިޔާކުރަން ނިންމައިފި އެވެ.

އެ ފައިސާ ހަދިޔާކުރެއްވުމުގެ ގޮތުން ސަން ސިޔާމް ގްރޫޕުގެ ޗެއާމަން ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު މިއަދު ވަނީ ސްރީ ލަންކާ ސަފީރު މުހައްމަދު ރިޒްވީ ހަސަންއާ މިއަދު ބައްދަލުކުރައްވައި އެހީގެ ރަމްޒީ ޗެކެއް ހަވާލުކުރައްވާފައި ކަމަށް ސަން ސިޔާމް ގްރޫޕްގެ ފަރާތުން ހިންގާ "ސަން އޮންލައިން" އިން ބުންޏެވެ.

ހަދިޔާކުރަން ނިންމި 200،000 ޑޮލަރުގެ ތެރެއިން 75،000 ޑޮލަރު މިއަދު ހަދިޔާ ކޮށްފައިވާ ކަމަށާއި ކުރިއަށް އޮތް ދުވަސްތަކުގައި ބާކީ ބައި ހަވާލުކުރާނެ ކަމަށް ވެސް ބުންޏެވެ.

ސަން އިން ބުނި ގޮތުގައި މާދަމާއިން ފެށިގެން ސަން ސިޔާމް ގްރޫޕުގެ ކުންފުނިތަކާއި ރިސޯޓުތަކުގައި ވެސް އެހީ ހޯދުމަށް ފައިސާ އެއްކުރުމުގެ މަސައްކަތް ކުރިއަށް ގެންދާނެ އެވެ.

އަދި ސިޔާމް ވަނީ ލަންކާގެ ރައީސް އަނުރާ ކުމާރަ ޑިސެނަޔަކައަށް ގުޅުއްވައި ހިތްވަރު ދެއްވައި އެކުގައި ތިބިކަން ޔަގީންކޮށްދެއްވުމަށް ހާއްސަ ސިޓީއެއް ވެސް ފޮނުވާފައި ކަމަށް ވެސް ބުނެފައިވެ އެވެ.

ތޫފާން ދީތުވާ ސްރީ ލަންކާގެ އިރުމަތީ އައްސޭރިއަށް އެރުމުގެ ސަބަބުން، ބޯކޮށް ވާރޭވެހި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި 200 އަށް ވުރެ ގިނަ މީހުން މަރުވެ އުމްރާނީ ބޮޑެތި ގެއްލުންތައް ވެސް ވަނީ ވެފަ އެވެ.

ލަންކާއަށް އެހީވުމަށް ރާއްޖޭގައި ޓެލެތޯންއެއް މިއަދު ކުރިއަށް ގެންދާއިރު މެންދުރާ ހަމައަށް ލިބުނު ފައިސާގެ އަދަދު ދެ މިލިއަނަށް ވުރެ ގިނަ އެވެ.

މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވަނީ ބަހައްޓައިފަ އެވެ.

ދިވެހި ރުފިޔާއިން ނަމަ ފައިސާ ޖަމާކުރާނީ 7730000796107 ނަމްބަރު އެކައުންޓަށެވެ. އަދި ޑޮލަރުން ނަމަ ޖަމާކުރާނީ 7730000796106 އަށެވެ. މިއަދު ހެނދުނު 9:00 ގައި ފެށި ޓެލެތޯން މިރޭ މެންދަމު 1:00 ގެ ނިޔަލަށް ކުރިއަށް ގެންދާނެ އެވެ