ރިލީސް ނުހޯދައި ލ. ގެ މުބާރާތަށް ދިޔަ ޝަމާއިލް ގައުމީ ޓީމުން ބޭރުކޮށްފި، އެ މުބާރާތް ވެސް ހުއްޓިއްޖެ!

ގައުމީ ވޮލީ ޓީމުގެ ކުޅުންތެރިޔާ ޝަމާއިލް ހުސައިން، ގައުމީ ޓީމުން ބޭރުކޮށް އޭނާ އަށް އެޅި ފިޔަވަޅާ އެކު ލ. އަތޮޅުގެ ވޮލީ މުބާރާތް ހުއްޓުމަކަށް އަތުވެއްޖެ އެވެ.

ވީއޭއެމްގެ އޮފިޝަލަކު "މިހަރު" އަށް ވިދާޅުވި ގޮތުގައި ޝަމާއިލަށް ފިޔަވަޅު އެޅީ ގައުމީ ޓީމުން ރިލީސް ނުހޯދައި އަމިއްލަ ފަރާތަކުން ބާއްވާ މުބާރާތެއްގައި ބައިވެރިވުމުންނެވެ.

"ގައުމީ ޓީމުގެ ކޯޑް އޮފް ކޮންޑަކްޓްގެ ދަށުން އެއީ މަނާކަމެއް،" ވީއޭއެމްގެ އޮފިޝަލް ވިދާޅުވި އެވެ.

"ގައުމީ ސްކޮޑްގައި ހިމެނޭ ކުޅުންތެރިޔަކު އެހެން މުބާރާތެއްގައި ކުޅެން ދެވޭނީ ޓީމުން ރިލީސް ލިބުމަށް ފަހު."

ލ މާވަށަށް އުފަން ޝަމާއިލް ކުޅުނީ އެ އަތޮޅު ކައުންސިލުގެ ލާމަސީލް ލާމް މުބާރާތުގަ އެވެ. ރިލީސް ހޯދަން އެދުނުނަމަ، އެ ހުއްދަ ދޭނަންތޯ ސުވާލުކުމުން އޮފިޝަލް ވިދާޅުވީ ގައުމީ ޓީމުން ރިލީސް ހޯދައިގެން ތިން ކުޅުންތެރިޔަކު އެ މުބާރާތުގައި ކުޅެމުންދާ ކަމަށެވެ.

މައްސަލައާ ގުޅިގެން އޮންލައިން ނޫސް އަދަދަށް ދިން އިންޓަވިއުގައި ޝަމާއިލް ބުނީ ރަށްރަށުގައި ބާއްވާ މުބާރާތެއްގައި ގައުމީ ޓީމު ކުޅުންތެރިން ކުޅެން ދިއުމުގެ އުސޫލުތަކެއް އެކުލަވާލާފައިވާ ކަމުގެ މައުލޫމާތު އެންމެ ރަނގަޅަށް އޭނާ އަށް އެނގިފައި ނުވާ ކަމަށެވެ. އަދި އޭނާ އަށް ފިޔަވަޅު އެޅުމުގައި ވީއޭއެމުން އޭނާ އާ އެންމެ އެކަށީގެންވާ ގޮތަށް މުއާމަލާތްކޮށްފައި ނުވާކަމުގެ ކަންބޮޑުވުން ފާޅުކޮށްފައި ވެއެވެ.

ވީއޭއެމްގެ އޮފިޝަލް ވިދާޅުވީ ކޯޑްއޮފް ކޮންޑަކްޓް އެކުލަވާލުމަށް ފަހު ކުޅުންތެރިން ތިބޭ ވަޓްސްއެޕް ގުރޫޕްގައި ވެސް އެ އުސޫލު ހިއްސާކޮށްފައި ވާނެ ކަމަށެވެ. އަދި އެކަން ވެސް ކުޅުންތެރިންނަށް އަންގާފައި ވާނެ ކަމަށެވެ.

ޝަމާއިލަށް ފިޔަވަޅު އެޅުމަށް ފަހު ވީއޭއެމުން ވަނީ އޭނާ ބައިވެރިވެ ކުޅޭ އެއްވެސް މެޗެއްގައި ރެފްރީކަން ކުރުން ވެސް ވީއޭއެމްގެ ރެފްރީން ބައިވެރި ނުވުމަށް އަންގައިފަ އެވެ. އެކަން ލ. އަތޮޅު ކައުންސިލަށް ވެސް ވީއޭއެމުން އެންގި އެވެ.

ލ. އަތޮޅު ކައުންސިލުން މިއަދު ނެރުނު ބަޔާނުގައި ބުނެފައި ވަނީ ވީއޭއެމުން އެގޮތަށް އެންގުމުން މުބާރާތަށް މިހާރު ރެފްރީންގެ ދަތިކަން ކުރިމަތިވެފައިވާ ކަމަށެވެ.

އެހެންވެ މުބާރާތުގެ ކޮމިޓީން ނިންމީ މުބާރާތް ކުރިއަށް ހުރި މެޗުތައް ފަސް ކުރުމަށެވެ. އަދި މެޗުތައް ދެން ފެށޭނެ ތާރީހެއް އަލުން އިއުލާން ކުރާނެ ކަމަށް ވެސް އެ ކައުންސިލުން ނެރުނު ބަޔާނުގައި ބުނެފައި ވެއެވެ.