އެމްއެމްޕީއާރުސީ ތަހުގީގުގެ އާ މިސްރާބަކީ ނުފޫޒަކަށް ނުބަލައި ނަތީޖާ ނެރުން

އެމްއެމްޕީއާރުސީގެ ބޮޑު ހިޔާނާތް ހިންގައި ނިޒާމުގެ ތެރެއިން އަތްނުލެވި ތިބީ ހައްތަހާ ވެސް ނުފޫޒު ގަދަ ބޭފުޅުންނެވެ؛ ދައުލަތުގެ ފައިސާގައި ޖެހި މިނިވަންކަމުގައި އުޅެވެނީ ކޮޅެއްގައި ނުޖެހުނު ތަހުގީގަކާ ހެދި އެވެ. ކުރީގެ ވެރިކަމުގައި ތަހުގީގު ނުވެސް ހިންގީ އެވެ. މި ވެރިކަމުގައި، ރިޔާސީ ކޮމިޝަނެއް ހަދައިގެން ތިން އަހަރުވި އިރު ނަތީޖާއެއް ނުނެރެވުނެވެ.

މިއީ، ރައްޔިތުންގެ ހިތްހަމަނުޖެހުން ބޮޑު މައްސަލައެކެވެ.

މި ސަރުކާރުގައި އޭސީސީއަށް ފުރަތަމަ އައްޔަންކުރި މެމްބަރުން އިސްތިއުފާ ދެއްވަން މަޖުބޫރުކުރުވި އެއް ސަބަބަކީ އެމްއެމްޕީއާރުސީގެ މައްސަލަ އެވެ. އެސެޓް ރިކަވަރީ ކޮމިޝަނުން އިސްވެ އޭސީސީއާ އެކު ފެށި ތަހުގީގުން ދައުވާކުރަން ފޮނުވުނީ މަދު މީހަކަށެވެ. ދައުލަތަށް ގެއްލުނު ފައިސާއެއް ނުހޯދުނެވެ.

މި ފަހުން އޭސީސީއަށް އައްޔަންކުރެއްވި ފަސް މެމްބަރުންނަށް އޮތް ގޮންޖެހުން ބޮޑެވެ. އެ މެމްބަރުންނާއި އޭސީސީއަށް ވެސް އިތުބާރު އަލުން ހޯދަން އޮތް މުހިއްމު މަސައްކަތަކީ އެ ތަހުގީގެވެ.

އެކަން އޭސީސީގެ ފަސް މެމްބަރުން ވެސް ގަބޫލުކުރައްވަ އެވެ. އެ ހުރިހާ ކަމެއްގެ ކުރިއަށް އެ މެމްބަރުން ދެއްވާ ޔަގީން ކަމެއް އެބައޮތެވެ.

އެކި ފަންތީގެ ނުފޫޒުގަދަ ބޭފުޅުންގެ މައްސަލަތައް ހިމެނުނަސް ތަހުގީގު ކުރުމުގައި ނުފޫޒަކަށް ދީލައި ނުލާނެ ކަމެވެ. ގާނޫނުއަސާސީ އާއި ގާނޫނުތަކުގައި ކޮމިޝަނުގެ މަސައްކަތްތަކާއި ތަހުގީގު ހިންގަން ކަނޑައަޅާފައިވާ މަގުން ކައްސައި ނުލާނެ ކަމެވެ.

"އަޅުގަނޑުމެންނަށް މިއޮތީ އެއް ކަމަކަށް ވަރަށް ބޮޑު އުއްމީދެއް [މިކަން ކުރެވޭނެ ކަމުގެ] އަނެއް ކަމަކަށް މިކަމުގައި ނަތީޖާ ހަމައަށް ދިއުމުގެ ޝައުގުވެރިކަމާއި އެ މަސައްކަތް އެގޮތަށް ކުރުމުގެ ނިޔަތާއި އަމަލުން ދައްކަން ބޭނުންވޭ," އޭސީސީގެ ރައީސް އާދަމް ޝާމިލް ވިދާޅުވި އެވެ.

ކޮމިޝަނަށް ގެންނަ ބަދަލުތަކާ ގުޅޭ ގޮތުން "މިހާރު"އަށް ދެއްވި އިންޓަވިއުގައި ޝާމިލް ވިދާޅުވީ ގޮންޖެހުން ބޮޑު އެ ތަހުގީގަށް ރަނގަޅު ޕްލޭނެއް އެކުލަވާލަން ޖެހޭ ކަމަށެވެ. އެ ޕްލޭން އެކުލަވާލާނީ ތަހުގީގުގެ ވަކި މުއްދަތުތަކަކުން ނެރޭނެ ނަތީޖާތަކެއްގެ މައްޗަށް ކަމަށް ވިދާޅުވި އެވެ.

އޭނާ ވިދާޅުވި ގޮތުގައި ނަތީޖާ ހާސިލް ނުވާ ނަމަ ސަބަބު ވެސް ދެނެގަނެ ރަނގަޅު ވެސް ކުރާނެ އެވެ.

އެމްއެމްޕީއާރުސީގެ މައްސަލަތައް ރައްޔިތުން އެދޭ ބާރު މިނުގައި ކުރިއަށް ގެންދެވޭނެ ގޮތަކަށް މަސައްކަތްތައް ބައްޓަން ކުރަން އެ ކޮމިޝަނުން ވަނީ ކަމާ ބެހޭ އިދާރާތަކާ ވެސް މަޝްވަރާކޮށްފަ އެވެ.

"އަޅުގަނޑުމެން އަތުގައި ހުރި ވަސީލަތްތަކާއި ވަގުތު ބޭނުންކުރާނީ ރައްޔިތުންގެ މަސްލަހަތު އިސްކޮށްގެން ކަމުގެ ޔަގީންކަން އަރުވަން," ޝާމިލް ވިދާޅުވި އެވެ.

ތަހުގީގުގައި އާ ތަރުތީބެއް

އެމްއެމްޕީއާރުސީގެ ހިޔާނާތް އިދާރާތަކުން ގުޅިގެން ކުރިއަށް ގެންދިޔައިރު އަވަހަށް ނިންމަން ޖެހޭ މައްސަލަތަކެއް ފާހަގަކުރި ކަމަށް ބުނެފައިވެ އެވެ. އޭގައި، ދައުލަތުގެ އެކި މަގާމްތަކުގައި ތިބި ތުހުމަތުކުރެވޭ މީހުންގެ މައްސަލަތައް އަވަހަށް ނިންމުން ހިމެނެ އެވެ. އެކަމަކު އެގޮތަށް ތަހުގީގު ހިނގި ތަނެއް ނުފެނެ އެވެ.

ޝާމިލް ވިދާޅުވި ގޮތުގައި ތަހުގީގުގައި ނަތީޖާ ނެރުމަށް އާ ތަރުތީބެއް އޮތުން މުހިއްމެވެ.

"ތަހުގީގުގައި ފަންނީ ބޭފުޅުންނާ މިދަނީ މަޝްވަރާ ކުރަމުން. މިހާތަނަށް ގެންގުޅެމުން އައި އުސޫލުގެ ބަދަލުގައި މެޓްރިކްސްއެއް އުފައްދަން ޖެހޭތޯ, އެހެން ކަމަށް ވާ ނަމަ މިހާތަނަށް ލިބިފައި ހުރި ހެކި, ގަރީނާއާ އެކު އަވަސް ލަސްމިނުގައި މައްސަލަތައް ކުރިއަށް ދާނީ ކިހިނެއްތޯ," ޝާމިލް ވިދާޅުވި އެވެ.

ޚިޔާނާތުގެ މަންފާ ލިބުނު ކަމަށް ތުހުމަތު ކުރެވޭ ލިސްޓް:

● ރައްޔިތުންގެ މަޖިލީހުގެ ކުރީގެ 44 މެމްބަރުން.

● ރައްޔިތުންގެ މަޖިލީހުގެ މިހާރުގެ 16 މެމްބަރުން.

● މިނިވަން މުއައްސަސާތަކުގައި ކުރިން އުޅުއްވި ފަސް މެމްބަރުން.

● ކުރީގެ ސަރުކާރުގެ އިސް މަގާމްތަކުގައި ތިއްބެވި 30 ބޭފުޅުން.

● މިހާރުގެ ސަރުކާރުގައި ހިމެނޭ ހަތް ބޭފުޅުން.

● ފަސް ފަނޑިޔާރުން (އޭގެ ތެރޭގައި ކުރީގެ ފަނޑިޔާރުންނާއި މިހާރުގެ ފަނޑިޔާރުން ހިމެނޭ)

● ސަލާމަތީ ޚިދުމަތްތަކާ ބެހޭ ހަތް އޮފިސަރުން.

އެންމެ ބޮޑު އިސްކަމެއް ފައިސާ ރިކަވާ ކުރުމަށް

އެމްއެމްޕީއާރުސީގެ ސްކީމްގައި ހިމެނެނީ ދެ ބައެކެވެ. އެއީ ނުއަގުގައި ދޫކުރި ރަށްތަކާއި ޑޮލަރު މާރުކުރުމުގެ ނަމުގައި ހިންގި ކަންކަމެވެ.

ޓޫރިޒަމްގެ ބޭނުމަށް އެމްއެމްޕީއާރުސީ މެދުވެރިކޮށް، 37 ރަށަކާއި 12 ފަޅެއް ނުއަގުގައި ދޫކޮށްފައިވެ އެވެ. މިހާތަނަށް އަންދާޒާއަކީ އެކި މީހުންނަށް ބަހާލި މި ރަށްތަކުން ގާތްގަނޑަކަށް ތިން ބިލިއަން ރުފިޔާގެ ގެއްލުން ދައުލަތަށް ވެފައިވާ ކަމެވެ.

ޝާމިލް ވިދާޅުވީ އޭސީސީން އެންމެ ބޮޑު އިސްކަމެއް ދޭނީ ދައުލަތަށް ގެއްލުނު ފައިސާ އަނބުރާ ހޯދަން ކަމަށެވެ. އެމްއެމްޕީއާރުސީން ގެއްލުނު ފައިސާގެ ތެރެއިން ބޮޑެތި އަދަދުތަކެއް ދައުލަތަށް ހޯދަން ޖެހިފައިވާކަން އޭނާ ފާހަގަކުރެއްވި އެވެ.

އެކަމަކު ގާނޫނާ ޚިލާފަށް ދޫކޮށްފައިވާ ރަށްތަކުން ހަމަ އަގު ދައުލަތަށް ހޯދާނެ ވަކި ގޮތެއް މިހާތަނަށް ނިންމާފައެއް ނެތް ކަަމަށް އޭސީސީން ބުންޏެވެ. އޮޑިޓަ ޖެނެރަލް އޮފީސް މެދުވެރިކޮށް ރައީސް އޮފީހުން ވަނީ، ރަށްތަކުގެ ވެލުއޭޝަން އޮޑިޓެއް ހަދައިފަ އެވެ.

އޭސީސީން މިހާރު އަންނަނީ އެސެޓް ރިކަވާ ކުރުމާ ގުޅޭ ދިރާސާއެއް ވެސް ކުރަމުންނެވެ.

"އެސެޓް ރިކަވާ ކުރުމާ ގުޅޭ ގޮތުން ގޮތްތަކެއް އަޅުގަނޑުމެން ނިންމާނަން ދުރު ނޫން މުސްތަގުބަލެއްގައި," ޝާމިލް ވިދާޅުވި އެވެ.

އެކަން ނިންމާނީ މަޝްވަރާކޮށް ފިނޭންސާއި އެޓާނީ ޖެނެރަލްގެ އޮފީހާއި މީރާ އާއި ޕްރޮސިކިއުޓަ ޖެނެރަލްގެ އޮފީހާއި އޮޑިޓް އޮފީހުގެ ވެސް ބައިވެރިވުމާ އެކުގަ އެވެ.

އެސެޓް ރިކަވަރީ ކޮމިޝަން އޮތް އިރު މުއައްސަސާތައް ގުޅިގެން ފުދޭވަރެއްގެ މަސައްކަތްތަކެއް މިކަމުގައި ކޮށްފައިވާ ކަމަށާއި އަދިވެސް ކުރަން ހުރި ކަމަށް ޝާމިލް ވިދާޅުވި އެވެ. އެ ކޮމިޝަނަށް އޮތީ ރައްޔިތުންގެ މަސްލަހަތު އިސްކޮށް، ތަހުގީގު ކޮޅެއްގައި ޖެއްސުން ކަމަށް އޭނާ ވިދާޅުވި އެވެ.