ދީނަށް ފުރައްސާރަކޮށްގެން ޖަކާޓާގެ ގަވަރުނަރު ޖަލަށް

ޖަކާޓާ (މެއި 9) - އިސްލާމް ދީނަށް ފުރައްސާރަ ކުރިކަމުގެ ކުށް ސާބިތުވެ ޖަކާޓާގެ ގަވަރުނަރުކަމުގެ މަގާމުން ވަކިވާ ބަސުކީ ޖަހާޖާ ޕުރްނަމާ ނުވަތަ އަހޮކް ދެ އަހަރަށް ޖަލަށްލާން ހުކުމް ކޮށްފި އެވެ.

ކެމްޕޭން ތަގުރީރެއްގައި ޕުރްނަމާ ވަނީ ގުރުއާންގެ އާޔަތަކަށް އިޝާރާތް ކުރައްވާ އިސްލާމް ދީނަށް ފުރައްސާރަކޮށް ވާހަކަ ދައްކަވައިފަ އެވެ. ނަމަވެސް މުސްލިމުންގެ އަޣުލަބިއްޔަތު އޮންނަ އިންޑޮނީޝިއާގެ ވެރިރަށުގެ ގަވަރުނަރުކަން ކުރައްވާ ކްރިސްޓިއަނެއް ކަމަށްވާ ޕުރްނަމާ ވިދާޅުވެފައި ވަނީ އިސްލާމް ދީނަށް އުނިކަން އަންނަ އެއްވެސް ވާހަކައެއް އޭނާ ދައްކާފައި ނުވާނެ ކަމަށެވެ. އަދި މައްސަލަ އިސްތިއުނާފް ކުރާނެ ކަމަށް ވަނީ ވިދާޅުވެފަ އެވެ. ޕުރްނަމާ އަކީ ވޭތުވެދިޔަ 50 އަހަރު ތެރޭ ޖަކާޓާގެ ގަވަރުނަރުކަން ކުރާ މުސްލިމް ނޫން ފުރަތަމަ މީހާ އެވެ.

ކޯޓުގެ ހުކުމާ އެކު ޕުރްނަމާ ވަނީ ބަންދުކޮށްފަ އެވެ.

މިދިޔަ ސެޕްޓެމްބަރު މަހު އޮތް ކެމްޕޭން ބައްދަލުވުމެއްގައި ޕުރްނަމާ ވިދާޅުވެފައި ވަނީ ގުރުއާނުގެ އާޔަތެއްގެ އަލީގައި އިސްލާމީ ލީޑަރުން ދަނީ މުސްލިމް ނޫން މީހަކަށް ވޯޓު ނުލުމަށް މުސްލިމުންނަށް އަންގާ، ވޯޓުލާން ތިބި މީހުންނަށް އޮޅުވާލަމުން ކަމަށެވެ. އޭނާ މިހެން ވިދާޅުވުމުން ހަރުކަށި ބައެއް ފަރާތްތަކުން ވަނީ އެ މައްސަލަ ބެލުމަށް ގޮޮވާލައިފަ އެވެ. ޕުރްނަމާ ވަނީ އޭނާ ގޯސް ވާހަކައެއް ނުދައްކާ ކަމަށް ވިދާޅުވެފަ އެވެ. އޭނާ ފަހުން ވަނީ މައާފަށް ވެސް އެދިވަޑައިގެންފަ އެވެ.

ޕުރްނަމާ އަށް ޖަކާޓާގެ ގަވަރުނަރުކަން ލިބިވަޑައިގެންނެވީ އެ މަގާމުގައި ކުރިން ހުންނެވި ޖޮކޯ ވިޑޯޑޯ އަށް އިންޑޮނީޝިއާގެ ރައީސްކަން 2014 ވަނަ އަހަރު ލިބިވަޑައިގަތުމުންނެވެ. އޭނާގެ ގަވަރުނަރުކަމުގެ ޓާމް އޮކްޓޯބަރު މަހު ހަމަވަންދެން މަގާމުގެ މަސްއޫލިއްޔަތު އުފުލާނީ ޑިޕިއުޓީ ގަވަރުނަރެވެ.

އިންޑޮނީޝިއާގެ 250 މިލިއަން މީހުންގެ އާބާދީގެ 85 ޕަސެންޓަކީ މުސްލިމުންނެވެ.