ޖަކާޓާގެ މޭޔަރު ގުރުއާނަށް އިހްތިރާމް ކުޑަކުރި މައްސަލަ ބޮޑުވެއްޖެ

ޖަކާޓާ (ނޮވެމްބަރު 6) - އިންޑޮނީޝިއާގެ ވެރިރަށް ޖަކާޓާގެ މޭޔަރު ބަސޫކީ ޖަހާޖާ ޕުރްނަމާ ކީރިތި ގުރުއާނަށް އިހުތިރާމް ކުޑަ ކުރި މައްސަލައެއް ބޮޑު ވެއްޖެ އެވެ.

ކްރިސްޓިއަނެއް ކަމަށްވާ ޕުރްނަމާ ވަނީ އިދިކޮޅު ފަރާތްތަކުން ދަނީ ގުރުއާނުގެ އާޔަތްތައް ބޭނުންކޮށްގެން ވޯޓުލާ މީހުންނަށް އޮޅުވާލަމުން ކަމަށް ވިދާޅުވެފަ އެވެ. އަދި މުސްލިމް ނޫން ލީޑަރުންނަށް މުސްލިމުންނަށް ވޯޓު ނުދެވޭނެ ކަމަށް ބުނެ އާޔަތުގެ ތަރުޖަމާ ކުރަމުންދާ ކަމަށް ވެސް އޭނާ ވިދާޅުވި އެވެ.

މުސްލިމް ޖަމާއަތެއް ކަމަށްވާ އިސްލާމިކް ޑިފެންޑާސް ފްރަންޓުން ބުނީ ޕުރްނަމާ ވަނީ އިސްލާމް ދީނަށް ވެސް މަލާމާތް ކޮށްފައި ކަމަށެވެ.

މޭޔަރުގެ ވާހަކަތާ ގުޅިގެން ޖަކާޓާގައި ވަނީ މުޒާހަރާތައް ކުރަން ފަށައިފަ އެވެ. މި ހަމަނުޖެހުންތަކުގައި އެކަކު މަރުވެ 12 މީހުން ވަނީ ޒަޚަމްވެފަ އެވެ. އިންޑޮނީޝިއާގެ ރައީސް ޖޮކޯ ވިޑޯޑޯ ވަނީ އޮސްޓްރޭލިއާ އަށް ކުރެއްވުމަށް ހަމަޖެހިފައިވާ ދަތުރު ވެސް ފަސް ކުރައްވައިފަ އެވެ. މިދިޔަ ހުކުރު ދުވަހުގެ ހުކުރު ނަމާދަށް ފަހު ރިޔާސީ ގަނޑުވަރުގެ ކައިރިއަށް އެއްވަން އުޅުނު މީހުން ވަނީ ފުލުހުން ގަރުނަ ގޭސް ޖަހާ ފޮނުވާލައިފަ އެވެ. މުޒާހަރާ ކުރި މީހުން ވަނީ ޕުރްނަމާއާ ދެކޮޅަށް ދައުވާ ކުރުމަށް ގޮވާލައިފަ އެވެ.

އިންޑޮނީޝިއާގެ 250 މިލިއަން މީހުންގެ އާބާދީގައި އަޣުލަބިއްޔަތު އޮންނަނީ މުސްލިމުންނަށެވެ.