ލޯކަލް އިންތިޚާބުގެ ރަސްމީ ނަތީޖާ މިއަދު އިއުލާން ކުރަނީ

މި މަހުގެ ހަވަނަ ދުވަހު ބޭއްވި ލޯކަލް ކައުންސިލްތަކުގެ އިންތިޚާބުގެ ރަސްމީ ނަތީޖާ މިއަދު އިއުލާން ކުރާ ގޮތަށް އިލެކްޝަންސް ކޮމިޝަނުން ނިންމައިފި އެވެ.

އެ ކޮމިޝަނުން ބުނިގޮތުގައި ރަސްމީ ނަތީޖާ އިއުލާން ކުރުން އޮންނާނީ މިއަދު މެންދުރު 2:30ގަ އެވެ. އެކަން ކުރިއަށް ގެންދާނީ ބާ ޖަމާލުއްދީންގައި ހިންގާ އިންތިޚާބާ ބެހޭ މަރުކަޒުގައި ކަމަށް އިލެކްޝަންސް އިން ބުންޏެވެ.

ލޯކަލް އިންތިޚާބުގެ ވަގުތީ ނަތީޖާ ވަނީ މިދިޔަ ހޮނިހިރުދުވަހު އިއުލާންކޮށް ނިންމައިފަ އެވެ.

ލޯކަލް ކައުންސިލްތަކުގެ އިންތިޚާބުގެ ގާނޫނު ބުނާ ގޮތުން ދާއިމީ ނަތީޖާ 14 ދުވަސް ތެރޭގައި އިއުލާންކުރަން ޖެހެ އެވެ.

ރަށު ކައުންސިލްތަކާއި އަތޮޅު ކައުންސިލްތަކަށް 655 ކައުންސިލަރުން އިންތިހާބުކޮށްފައިވާއިރު، ގިނަ ގޮނޑިތައް ކާމިޔާބު ކުރީ އިދިކޮޅު އެމްޑީޕީންނެވެ.