ކޮޅުވެއްޓީގައި ތިބި މީހުން މާލެ ގެނެސްފި

ކ. ތުލުސްދޫން ފުރައިގެން ލ. ގަމަށް ދަތުރުކުރަނިކޮށް ބެހުނު ކޮޅުވެއްޓީގައި ތިބި ހަ މީހުން އިންޑިއާ މަނަވަރެއްގައި މިއަދު ހެނދުނު މާލެ ގެނެސްފި އެވެ.

މިދިޔަ އަންގާރަ ދުވަހުގެ ރޭ ގެއްލުނު އެ އުޅަނދު، އިންޑިއާގެ މަނަވަރަކުން ހޯދައި މާލެ ގެނައުމުން، ކޮޅުވެއްޓިން ދަތުރު ކުރި ތ. ވިލިފުށީ ދެމަފިރިންގެ އާއިލާގެ މީހުންނާއި މީޑިއާ ވަނީ މަނަވަރަށް ގޮސް އެ މީހުންނާ ބައްދަލުކޮށްފަ އެވެ.

ސްރީ ލަންކާ ކުންފުންޏެއް ކަމަށްވާ ސެނޯކްގެ "މާރިޔާ-3" ބެހުނީ އޭގެ ރޭމްޕް ހަލާކުވެގެން އެ މައްޗަށް ނެގޭނެ ގޮތެއް ނެތި ދިމާވި މައްސަލަތަކުގަ އެވެ. އޭގައި ތިވި ދެމަފިރިންނަކީ ކޮޅުވެއްޓީގެ ކެޕްޓަން އާދަމް ނައީމާއި އޭނާގެ އަންހެނުން ޒުލޭހާ އުސްމާނެވެ.

އުޅަނދު ފެނުނު އިރު މޫސުމް ވަރަށް ގޯސް ނަމަވެސް، އިންޑިއާގެ މަނަވަރު ވަނީ 21 ވަނަ ދުވަހުގެ ރޭ އެ ސަރަހައްދަށް ގޮސް އެހީތެރިކަން ފޯރުކޮށްދީފަ އެވެ. އެކަމަކު ކޮޅުވެއްޓީގައި ތިބި މީހުން އޭރު ބޭނުންވީ އެ އުޅަނދުގައި ތިބެގެން މާލެ ދަތުރު ކުރާށެވެ.

މޫސުމް މާ ބޮޑަސް ގޯސްވުމާއި ކޮޅުވެއްޓި ކަފުޖަހައިގެން ދަތުރު ނުކުރެވޭތީ ފަހުން އެމްއެންޑީއެފުން ވަނީ އޭގައި ތިބި މީހުން މަނަވަރަށް ނަގައި، ކޮޅުވެއްޓި ދޫކޮށްލާފަ އެވެ.

އެކަމަކު އުޅަނދުގެ ވެރިފަރާތުން އޭތި ކަފުޖަހައިގެން ގެންނާނެ ގޮތެއް އޮތްތޯ އަންނަނީ ބަލަމުންނެވެ.