ތޮއްޔިބާ ސުވާލު ކުރީ ޔާމީން ރަޝީދުގެ މަރާ ގުޅޭ ޓުވީޓެއްގެ މައްސަލައިގައި

ސޯޝަލް މީޑިއާ އެކްޓިވިސްޓު ތޮއްޔިބު ޝަހީމު ރޭ ފުލުސް އޮފީހަށް ހާޒިރުކޮށް ސުވާލުކުރީ، ލިޔުންތެރިޔާ ޔާމީން ރަޝީދުގެ މަރާ ގުޅޭ ގޮތުން ކުރި ޓުވީޓެއްގެ މައްސަލައިގައި ކަމަށް ތޮއްޔިބު މިއަދު ބުނެފި އެވެ.

ތޮއްޔިބު ބުނީ އޭނާ ކުރި ޓުވީޓުގެ މައްސަލަ ފުލުހުން ތަހުގީގު ކުރަމުން އަންނަ ކަަމަށެވެ. އެ ޓުވީޓުގައި އޭނާ ސުވާލުކޮށްފައި ވާނީ، ޔާމީން މަރާލާފައި އޮތް ސީނަށް ދިޔަ ފޮރެންސިކް ފުލުހުންތަކެއް ބަންދުކޮށްގެން އުޅެނީ ކީއްވެތޯ ކަމަށް އޭނާ ބުންޏެވެ.

"އެގޮތަށް ޓުވީޓު ކުރީ ކީއްވެތޯ އާއި ކޮން ތަނަކުން ހޯދި މައުލޫމާތުތަކުގެ މައްޗަށްތޯ ސުވާލުކުރީ،" ތޮއްޔިބު ބުންޏެވެ.

މީގެ ކުރިން، ވެސް ތޮއްޔިބުގެ ޓުވީޓުތަކެއްގެ މައްސަލަ ބަލައި އޭނާ ހައްޔަރު ވެސް ކުރި އެވެ. އެ ފަހަރު އޭނާ ހައްޔަރުކުރީ ރައްޔިތުންގެ ތެރޭގައި ބިރުވެރިކަން އުފެދޭ ގޮތަށް ދޮގު މައުލޫމާތު ފަތުރަމުންދާ ކަމުގެ ތުހުމަތުގަ އެވެ.

ފުލުހުންގެ ބަންދުން އޭނާ މިނިވަންވީ، ބަންދުގެ މުއްދަތު އިސްތިއުނާފްކޮށް ޝަރުތުތަކަކާ އެކު ހައި ކޯޓުގެ އަމުރަކުންނެވެ. އެ އަމުރުގައި، ދިވެހި ދައުލަތް ބަދުނާމު ނުކުރުމާއި ފުލުހުންނަށް އެއްބާރުލުން ދިނުން އަދި ރަށުން ބޭރަށް ނުދާން ޝަރުތުކޮށްފައިވެ އެވެ.