ޕާޓީން ވަކިވިޔަސް މެމްބަރުކަމުގެ ގޮނޑި ގެއްލިގެން ނުވާނެ: ގާސިމް

ރައްޔިތުންގެ މަޖިލީހުގެ މެމްބަރަކު މަޖިލީހަށް ހޮވުނުއިރު އޭނާ ނިސްބަތްވި ޕާޓީން ވަކިވެއްޖެ ނަމަ މަޖިލީހުގެ މެމްބަރު ކަން ގެއްލޭ ގޮތަށް ހެދުމަކީ ގާނޫނުއަސާސީއާ ޚިލާފަށް ކުރެވޭނެ ކަމެއް ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް މިރޭ ވިދާޅުވެއްޖެ އެވެ.

ގާސިމްގެ މައްޗަށް ކުރި ދައުވާތައް ކްރިމިނަލް ކޯޓުން މިރޭ ބޭރުކޮށްލުމުން ކޯޓުން ނުކުމެވަޑައިގެން، ނޫސްވެރިންނާ ވާހަކަ ދައްކަވަމުން އޭނާ ވިދާޅުވީ މިހާތަނަށް މެމްބަރުން ޕާޓީން ވަކިވުމަކީ މައްސަލައަކަށް ނުވެ އޮވެ، އެކަން މިއަދު މައްސަލައަކަށް ވީ ވަކި ޕާޓީއަކުން މެމްބަރުން ވަކިވާން ފެށުމުން ކަމަށެވެ. ގާސިމް އެ އިޝާރާތް ކުރެއްވީ ވެރިކަން ކުރާ ޕީޕީއެމުން ގިނަ އަދަދެއްގެ މަޖިލިސް މެމްބަރުން ވަކިވާތީ އެކަމަށެވެ.

"އެއް ޕާޓީއަކުން 32 ނުވަތަ 33 ގައި ތިބެފައި 45 އަކަށް އަރައިގެން ދިޔައިރު ނުވޭ މައްސަލައަކަށް. މިއަދު އެ ޕާޓީ ދާތަން ފެންނަން ފެށީމަ ވިޕާ ޚިލާފްވީމަ ނުވަތަ ޕާޓީން ވަކިވީމަ ގޮނޑި ގެއްލޭ ގޮތަށް،" ގާސިމް ވިދާޅުވި އެވެ.

ގާސިމް ވިދާޅުވި ގޮތުގައި އެގޮތަށް ހެދުމަކީ ކަނޑައެޅިގެން ގާނޫނުއަސާސީއާ ޚިލާފަށް ކަމެކެވެ. އަދި ރައްޔިތުންގެ މަޖިލީހުން މުހިންމު ނިންމުންތައް ނިންމަން ވަކި އަދަދަކަށް މެމްބަރުން ތިބެން ޖެހޭއިރު، އެގޮތަށް ހަދައިފި ނަމަ މަޖިލީހުގެ މަސައްކަތްތައް ނުކުރެވޭނެ ކަމަށް އޭނާ ވިދާޅުވި އެވެ.

"އެއީ ކުރެވޭނެ ކަމެއް ކަމަކަށް އަޅުގަނޑު ގަބޫލެއް ނުކުރަން. އަދި ކުރިޔަސް އަޅުގަނޑަކަށް ބަލައެއް ނުގަނެވޭނެ. އަޅުގަނޑަށް ވަރަށް އުނދަގޫ ވާނެެ ގަބޫލު ކުރަން،" މާމިގިލީ ދާއިރާގެ މެމްބަރު ގާސިމް ވިދާޅުވި އެވެ.

އެޓާނީ ޖެެނެރަލްގެ އޮފީހުން ސުޕްރީމް ކޯޓަށް ހުށަހެޅި މައްސަލާގައި ވަނީ ރައްޔިތުންގެ މަޖިލީހުގެ މެމްބަރުން އެ މަގާމަށް ހޮވުނުއިރު ނިސްބަތްވި ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ ނުވަތަ އެހެން ޕާޓީއަކަށް ބަދަލުވެއްޖެ ނަމަ މެމްބަރުކަމުގެ ގޮނޑި ގެއްލޭނެ ކަމަށް ކަނޑައަޅައި ދިނުމަށެވެ. އެ މައްސަލައިގެ އަޑުއެހުންތައް ސުޕްރީމް ކޯޓުގައި މިއަދު ވަނީ ކުރިއަށް ގެންގޮސްފަ އެވެ.