ބައި އިލެކްޝަންތައް ހުއްޓުވަން ސިވިލް ކޯޓަށް މައްސަލަ ހުށަހެޅޭނެ: ސުއޫދު

ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ ހަތަރު ދާއިރާގެ ބައި އިލެކްޝަން ހުއްޓުވަން ކޯޓަށް ވަކި މައްސަލައެއް ހުށަހެޅުމުގެ ފުރުސަތު އެބައޮތް ކަމަށް ކުރީގެ ބަންޑާރަ ނައިބު އަދި ގާނޫނީ ވަކީލު ހުސްނުއްސުއޫދު ވިދާޅުވެއްޖެ އެވެ.

ހަތަރު މެމްބަރެއްގެ ގޮނޑި ގެއްލިފައިވާ ކަމަށް ކޮމިޝަނުން ކަނޑައެޅި މައްސަލާގައި ސުޕްރީމް ކޯޓުން ގޮތެއް ނިންމަންޖެހޭ ކަމެއް ނެތް ކަމަށް އެ ކޯޓުން ނިންމުމާ ގުޅިގެން، އެ ނިންމުން އެކި ފަރާތްތަކުން އެކި ގޮތަށް މާނަ ކުރަމުން ދަނިކޮށް އިލެކްޝަންސް ކޮމިޝަނުން ނިންމާފައިވަނީ އެ ހަތަރު މެމްބަރުންގެ ގޮނޑި ގެއްލިފައިވާ ކަމަށެވެ. އެހެންވެ އެ ދާއިރާތަކުގެ ބައި އިލެކްޝަން ކުރިއަށް ގެންދިއުމަށް އެ ކޮމިޝަނުން ވަނީ ނިންމައިފަ އެވެ.

ސުއޫދު ރޭ ކުރެއްވި ޓްވީޓެއްގައި ވަނީ އެ ދާއިރާތަކުގެ ބައި އިލެކްޝަން ހުއްޓުވަން ސިވިލް ކޯޓަށް ވަކިވަކިން މައްސަލަ ހުށަހެޅުމުގެ ފުރުސަތު ކޮންމެ މެމްބަރަކަށް ވެސް އެބައޮތް ކަމަށެވެ. ސުއޫދު އެ ޓްވީޓް ކުރައްވާފައިވަނީ އެ ނިންމުމާ މެދު ސުވާލު އުފެދިފައި ތިބި މެމްބަރުންނަށް އަމާޒުކޮށްފަ އެވެ.

ސުޕްރީމް ކޯޓުގެ ނިންމުން އެކި ފަރާތްތަކުން އެކި ގޮތަށް ދަނީ މާނަ ކުރަމުންނެވެ. ހަތަރު މެމްބަރުންގެ ގޮނޑި ނުގެއްލޭ ކަމަށް ކޯޓުން ނިންމީ ކަމަށް ބުނެ އިދިކޮޅު ކޯލިޝަނުން އުފާ ފާޅު ކުރިއިރު ސަރުކާރު ކޯލިޝަނުން ބުނަމުންދަނީ ގޮނޑި ގެއްލިފައިވާ ކަމަށެވެ.