ރޮހިންޖާ 40،000 މުސްލިމުން އިންޑިއާ އިން ބޭރުކޮށްލަނީ

ނިއު ދިއްލީ (ސެޕްޓެމްބަރު 8) - އިންޑިއާގައި ދިރިއުޅޭ ރޮހިންޖާ 40،000 ރެފިއުޖީން އެ ގައުމުން ބޭރުކޮށްލަފާނެ ކަމުގެ އިންޒާރު ދީފި އެވެ.

މި އިންޒާރު ދީފައި ވަނީ މިއަންމާ އާއި އިންޑިއާ އިން ގުޅުން ބަދަހި ކުރަމުންދާ ދުވަސްވަރެއްގަ އެވެ. އިންޑިއާގެ ބޮޑު ވަޒީރު ނަރެންދުރަ މޯދީ ވަނީ މިދިޔަ ބުދަ ދުވަހު މިއަންމާ އަށް ވަޑައިގެން އެ ގައުމުގެ ސްޓޭޓް ކައުންސެލާ އަން ސަން ސޫކީއާ ބައްދަލު ކުރައްވައިފަ އެވެ. ދެ ބޭފުޅުން ވަނީ ރޮހިންޖާ މުސްލިމުންގެ މައްސަލައާ ގުޅޭ ގޮތުން މަޝްވަރާ ކުރައްވައިފަ އެވެ.

ވޭތުވެދިޔަ ހަތް އަހަރަށް ބަލާ އިރު ރޮހިންޖާ ރެފިއުޖީންގެ 40،000 މީހުން ވަނީ އިންޑިއާ އަށް ވަދެފަ އެވެ. އޭގެ ތެރޭގައި ރެފިއުޖީންގެ ގޮތުގައި އދ.ގައި ރަޖިސްޓްރީކޮށްފައިވާ 16،000 މީހުން ވެސް ހިމެނެ އެވެ.

މިއަންމާގައި މުސްލިމުން ދިރިއުޅޭ ރަކީން ސްޓޭޓުގައި އެންމެ ފަހުގެ ހަމަނުޖެހުންތައް އުފެދުމާ އެކު އިންޑިއާގެ ޖޫނިއާ ހޯމް މިނިސްޓަރު ކިރެން ރިޖިޖޫ ވަނީ އެ ގައުމުގެ އުޅޭ ރޮހިންޖާ ރެފިއުޖީން ޑިޕޯޓްކޮށްލާނެ ކަމަށް ވިދާޅުވެ ބިރު ދައްކަވައިފަ އެވެ. އޭނާ ވިދާޅުވީ އދ.ގެ ރެފިއުޖީންގެ ގޮތުގައި ރޮހިންޖާ މީހުން ރަޖިސްޓްރީކޮށްފައިވީ ނަމަވެސް ފަރުވާލެއް ނެތް ކަމަށާއި އެ އެންމެންނަކީ ވެސް ގަވާއިދާ ޚިލާފަށް އިންޑިއާގައި އުޅޭ މީހުން ކަމަށެވެ. އޮގަސްޓް 25 ވަނަ ދުވަހު ރަކީން ސްޓޭޓުގައި ހަމަނުޖެހުން ހިނގަން ފެށުމާ އެކު އިންޑިއާގެ ފޮރިން މިނިސްޓްރީން ވަނީ މިއަންމާ ސަރުކާރާ އެކު އޮތް ކަމަށް ބުނެ ބަޔާނެއް ނެރެފަ އެވެ.