ކެސީނީގެ ހަދިޔާތަކުގެ ތެރެއިން ހިތްގައިމު 10 ފޮޓޯ

އެޕްރީލް 2016 ގައި ކެސީނީން ނެގި މި ފޮޓޯ އިން ސެޓާންގެ އުތުރު ހެމިސްފިއާ އެ ފެންނަނީ ހޫނު މޫސުން ފެށުމާ އެކު ތަންކޮޅެއް ނުސާފު ގޮތަކަށެވެ. މި ސަރަހައްދުގެ ފިނި މޫސުމުގައި ފެންނަ ނޫ ކުލައިގެ ހިތްގައިމުކަން މި ފޮޓޯތައް ނެގި ދުވަސްވަރު ވަނީ ވަރަށް ބޮޑަށް ފުސްވެފަ އެވެ.

ސެޓާންގެ ރިންގްތަކުގެ ފިނިހޫނުމިނާއި އެ އުފެދިފައިވާ ގޮތް ދިރާސާކުރުމުގެ ފުރުސަތު ސައިންސްވެރިންނަށް ހޯދައިދިނީ ކެސީނީންނެވެ. ރިންގްތަކުގެ މި ފޮޓޯ ނެގީ ސެޓާންގެ ބިމާ 1.2 މިލިއަން ކިލޯމީޓަރު ދުރުންނެވެ. ރިންގްތައް އުފެދިފައި ވަނީ މައިގަނޑު ގޮތެއްގައި ގަނޑުފެނުގެ ބައިތަކުންނެވެ. ވަރަށް ކުދިކުދި އެތިއެތިކޮޅުން ފެށިގެން އެ ބައިތަކުގެ ބޮޑުމިން އެތައް މީޓަރަކަށް އަރަ އެވެ.

ކެސީނީގެ ކުރިން ސައިންސްވެރިން ގަބޫލުކުރީ ސެޓާންގެ ހަ ވަނައަށް އެންމެ ބޮޑު ހަނދު އެންސެލަޑޫސް އަކީ ހަމައެކަނި ގަނޑުވެފައިވާ ހަރު އެތިގަނޑެއް ކަމަށެވެ. އެކަމަކު ކެސީނީން ނެގި މި ފޮޓޯއިން، އެ ހަނދުގެ ބިންގަނޑުން މައްޗަށް ފެން ބުރާތަން ފެނެ އެވެ. މިހާރު އެނގެނީ ގަނޑުފެންގަނޑުގެ ދަށުގައި ދެމިފައިވާ ބޮޑު ކަނޑެއް އޮތް ކަމެވެ. އެ ފެނުގެ އަސަރު ދެނެގަނެވޭހާ ކައިރިން ކެސީނީ ހުރަސްކުރުމުން އެނގުނީ ދިރުމެއް އުފެދެން ބޭނުންވާ ހުރިހާ އަސާސްތަކެއް އޭގައި ހުރި ކަމެވެ. މިއީ ދުނިޔެ ފިޔަވައި ކާއިނާތުގެ އެހެން ތަނަކުން އެއްވެސް ކަހަލަ ދިރުމެއް ހޯދަން ކުރާ މަސައްކަތުގައި އުޅަނދެއް ފޮނުވަން އެންމެ އެކަށީގެންވާ ތަން ކަމަށް ބެލެވެ އެވެ.

ސެޓާންގެ އެންމެ ބޮޑު ހަނދު ޓައިޓަން އަކީ ވެސް ދިރުމެއް އުފެދެން އެކަށީގެންވާ މާހައުލެއް އޮތް ތަނެއް ކަމަށް ސައިންސްވެރިން ލަފާކުރެ އެވެ. އާންމު އެއްވެސް އަލިކަމަކަށް ފޫއަޅުވާލެވޭ ވަރަށް ވުރެ އެޓްމޮސްފިއާ ބޯވެފައި ފުސްކޮށް އޮތް ނަމަވެސް، އިންފްރާރެޑް ބޭނުންކޮށްގެން ނެގި މި ފޮޓޯ އިން ޓައިޓަންގައި ދިޔާ މީތޭންގެ ކަނޑުތައް ދެމިފައިވާތަން ފެނެ އެވެ.

ސެޓާންގެ ނޯތު ޕޯލްގައި 25،000 ކިލޯމީޓަރުގެ ފުޅާ ހެކްޒަގަންއެއް ހިމެނެ އެވެ. އޭގެ މެދުގައި އުފެދިފައިވާ ބިޔަ ތޫފާންގެ ވަށައިގެން ކޮންމެ 10 ގަޑިއިރާއި ބައިން އެ ހެކްޒަގަން އެއް ފަހަރު އެނބުރެ އެވެ.

ކެސީނީން ނެގި ސެޓާންގެ ނޯތު ޕޯލްގެ މި ފޮޓޯއިން އެ ފެންނަނީ 4000 ކިލޯމީޓަރުގެ ބޮޑު ހަރިކޭންއެކެވެ. މުޅި އަހަރު ދުވަހަށް އެ ތޫފާން ދެމިގެންދެ އެވެ. އެކަމަކު ތޫފާން އެ އެގޮތަށް އެނބުރެމުން ދަނީ ކޮން ސަބަބަކާ ހެދި ކަމެއް އަދި ނޭނގެ އެވެ.

ސެޓާންގެ ހަނދެއް ކަމަށްވާ އެންމެ 8 ކިލޯމީޓަރުގެ ޑަފްނިސް ކުޑަޔަސް އޭގެ އެނބުރުމުން ރިންގްތަކުގައި ރާޅުބާނީ އުފައްދަ އެވެ. އަދި ރިންގްތަކުގެ ބައެއް ގަނޑުފެންތައް ނައްޓައިގެން ގޮސް ހަނދުގައި ހަރުލާފައި ވެސް ވެ އެވެ.

ސެޓާންގެ ވަށައިގެން 62 ހަނދު ދައުރުވާކަން ވަނީ ކަށަވަރުވެފަ އެވެ. ޕްލެނެޓްގެ ރިންގުތަކުގެ ކުރިމައްޗަށް ވާ ގޮތަށް މި ފޮޓޯގައި އެ ވަނީ ޓައިޓަން އާއި ޑައޯނީ އެވެ. އޮރެންޖް ކުލައިގެ ފުސްކަމެއްގެ ގޮތުގައި ފެންނަ ޓައިޓަން އަކީ އެޓްމޮސްފިއާއެއް ހިމެނޭ ހަމައެކަނި ހަނދެވެ. ޑައޯނީ އުފެދިފައި ވަނީ މައިގަނޑު ގޮތެއްގައި ގަނޑުފެނުންނެވެ. އެކަމަކު ކެސީނީން ފޯރުކޮށްދިން މައުލޫމާތުތަކުން އެ ހަނދުގެ ގަނޑުފެނުގެ އަޑީގައި ދިޔާ ފެނުގެ ކަނޑެއް ވާ ކަމުގެ ނިޝާންތައް ލިބުނެވެ.

ޖުލައި 13، 2013 ގައި ކެސީނީ ވަނީ ސެޓާންގެ ހިޔަނީގެ ތެރެއިން ހުރަސްކޮށްފަ އެވެ. ރިންގުތަކުގެ ދޭތެރެއިން އަވި ފޭދިފައިވާ ތަނުގެ ފޮޓޯތަކެއް އެ އުޅަނދުގެ ކެމެރާ އިން ނެގި އެވެ. މި މަންޒަރު ތައްޔާރުކޮށްފައި އެވަނީ އޭގެ 141 ފޮޓޯ ބޭނުންކޮށްގެންނެވެ.

ކެސީނީގެ 20 އަހަރުގެ ދަތުރުގައި ދުނިޔޭގެ ފޮޓޯ ވެސް ނެގި އެވެ. އެކަމަކު ދުނިޔެއާ ގާތްގަނޑަކަށް 1.4 ބިލިއަން ކިލޯމީޓަރު ދުރުގައި ވާ ސެޓާންގެ ސަރަހައްދުން ނެގި އެ ފޮޓޯގައި ދުނިޔެ ފެންނަނީ ނޫ ކުލައިގެ ކުޑަކުޑަ ތިއްކެއް ވަރަށެވެ.