ނިއުމާގެ "ސެލެބްރޭޓިން 20" މިހާރު ޔޫޓިއުބުން ބަލައިލެވޭނެ

މަޝްހޫރު ބަތަލާ ނިއުމާ މުހައްމަދުގެ ފިލްމީ ކެރިއަރަށް 20 އަހަރު ފުރުން ފާހަގަކުރަން މި މަހުގެ 20 ވަނަ ދުވަހުގެ ރޭ ނެރުނު ލަވަ ކަލެކްޝަން "ސެލެބްރޭޓިން 20" ޔޫޓިއުބަށް ލައިފި އެވެ.

މި ކަލެކްޝަން ރިލީޒް ކުރި ރޭ ނިއުމާ ވަނީ އެ ލަވަތައް ގަންނަން ބޭނުންވާ މީހުންނަށް ޕެންޑްރައިވްގައި ފޯރުކޮށް ދޭނެ ކަމަށް ބުނެފަ އެވެ. އެކަމަކު މިހާރު މި ވަނީ ހިލޭ ދޫކޮށްލައިފަ އެވެ.

ޖުމްލަ އަށް ލަވަ ހިމެނޭ "ސެލެބްރޭޓިން 20" ނެރުމުގެ ކުރިން ވެސް މީގެ ދެ ލަވައެއް ވަނީ މާ ކުރިން ޔޫޓިއުބަށް ދޫކޮށްލައިފަ އެވެ. އެއީ ނިއުމާ އަޑުން ކިޔާފައިވާ ދެ ލަވަ ކަަމަށްވާ "މޫނޭ ތިއީ ހިތް އެދޭ" އާއި "ބެރުވެރިޔާ" އެވެ.

ދެ ލައްކަ ރުފިޔާގެ ބަޖެޓަކުން އުފެއްދި ލަވަތަކުގެ ތެރެއިން ދެ ލަވައަކުން ތަފާތު ކަމެއް ވެސް ފެނެ އެވެ. އެއީ އޭގެ އެއް ލަވަ ސިންގަޅަ ބަހުން ކިޔާފައި އޮތުމެވެ. ނިއުމާ އާއި އަހުމަދު އަޒްމީލް (އަޒޭ) ފެނިގެންދާ "އޮބެގެ މަތަކެން" ލަވައަކީ ލަންކާގައި މިހާރު ދިރިއުޅޭ ރާއްޖޭގެ މަޝްހޫރު ލަވަ ކިޔުންތެރިޔާ އަބްދުލް ހަންނާން މޫސާ ދީދީ ކިޔާފައިވާ ލަވައެވެ.

އަނެއް ތަފާތަކީ މުޅިން އާ ފަންނާނަކު މީގެ ލަވައަކުން ފެނިގެން ދިއުމެވެ. "ހިތުގެ އަމީރު" ލަވައިގައި އިބްރާހީމް ގިޔާސް ބައިވެރިވެ އެވެ. ވަރުގަދަ ހަށިގަނޑެއްވެރި ގިޔާސްއަކީ އާންމުކޮށް މިސްޓަ މޯލްޑިވްސް ކަހަލަ މުބާރާތްތަކުން ފެންނަ ބިލްޑަރެކެވެ. ފިޓްނަސް އިންސްޓަރަކްޓަރެކެވެ. މޮޑެލްއެއްގެ ގޮތުގައި ވެސް ހަރަކާތްތެރިވާ ގިޔާސްގެ މި ފެނިލުމަކީ އޭނާ ކުޅުނު ފުރަތަމަ ވީޑިއޯ ލަވަ އެވެ.

އިސްމާއީލް ޖުމައިހް (ޖުމާ)، މުހައްމަދު މަނިކު، އިސްމާއީލް ރަޝީދު ފަދަ އެކްޓަރުން ނިއުމާއާ އެކު ފެނިގެންދާ "ސެލެބްރޭޓިން 20" ގައި ނިއުމާ އާއި ގިޔާސް ކުޅެފައިވާ ލަވައަކީ ޔަގީނުން ވެސް ބެލުންތެރިންނަށް ވަރަށް ކަމުދާނެ ލަވައެކެވެ.

ތޭވީސް އަހަރަށް ފަހު އެކްޓް ކުރުމުން ރިޓަޔާ ކުރިކަން އިއުލާންކޮށްފައިވާ ނިއުމާގެ އެންމެ ފަހު ފިލްމަކަށް ވާނީ އަންނަ އަހަރުގެ އޮކްޓޯބަރުގައި ރިލީޒް ކުރާ "ނިވައިރޯޅި" އެވެ. މިއީ މޫމިން ފުއާދު ޑައިރެކްޓް ކުރާ ފިލްމެކެވެ.