މިފްކޯއަކީ ފައިދާވާ ކުންފުންޏަކަށް ހެދިއްޖެ: މިފްކޯ

މިފްކޯގެ މާލީ ހާލަތު ރަނގަޅުވެ، ފައިދާވާ ކުންފުއްޏަކަށް ވެފައިވާ ކަމަށް އެ ކުންފުނިން މިއަދު ބުނެފި އެވެ.

އެސްޓީއޯ އިން މިފްކޯއާ ހަވާލުވި އިރު، މިފްކޯގެ ދަރަނި 338 މިލިއަނަށް އަރަ އެވެ. މިފްކޯ އަށް އެސްޓީއޯ އިން ވިއްކާފައިވާ ތެލަށް އެކަނި ވެސް 100 މިލިއަނަށް ވުރެ ގިނަ ރުފިޔާ ދައްކަން އޮތެވެ. މާޗް މަހުގެ ތެރޭގައި އެ ކުންފުނިން ވަނީ ހަރަދު ދެކޮޅު ޖެހޭ ކުންފުންޏަކަށް ހެދިފައި ކަމަށް އެ ކުންފުނިން ބުންޏެވެ.

މިފްކޯގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިފްކޯ ހިންގަމުން އަންނަ އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު ވިދާޅުވީ ފައިދާވާ ކުންފުންޏަކަށް މިފްކޯ ބަދަލުވެފައިވާ އިރު މި އަހަރު ނިމޭ އިރު ވެސް އެއީ ފައިދާވާ ކުންފުންޏަކަށް ވާނެ ކަމަށެވެ.

ނަމަވެސް ފައިދާވި ވަރުގެ ތަފާސް ހިސާބްތަކެއް ހިއްސާކޮށްފައެއް ނުވެ އެވެ.

"އަހަރު ނިމުމުން އިރާދަ ކުރެއްވިއްޔާ އަޅުގަނޑުމެން ފައިދާވި ވަރު ހިއްސާ ކުރާނަން،" ޝަހީރު ވިދާޅުވިއެވެ.

އެސްޓީއޯ އިން ހަވާލުވުމަށް ފަހު މިފްކޯގެ ހިންގުމަށް ބޮޑެތި ބަދަލުތަކެއް ގެނެސްފައިވާ އިރު މިފްކޯގެ ސީއީއޯ އަދުލީ އިސްމާއިލް ވިދާޅުވީ އެ ކުންފުންޏަށް ފައިދާވެފައި ވަނީ މަސްވެރިކަން ރަނގަޅު ވުމާއި ދުނިޔޭގެ ބާޒާރުގައި މަހުގެ އަގު ރަނގަޅު ވުމުން ކަމަށެވެ.

މިފްކޯ ހަމައަކަށް އަޅުވަން ސަރުކާރުން 46.3 މިލިއަން ރުފިޔާގެ ލޯނެއް ދީފައިވާ އިރު އެ ފައިސާ ބޭނުން ކުރާނެ ގޮތާ ގުޅޭ ގޮތުން ސުވާލު ކުރުމުން އަދުލީ ވިދާޅުވީ ފައިސާގެ ބޭނުން ހިފާނީ ކުންފުނީގެ އިންފްރާސްޓްރަކްޗާ ރަނގަޅު ކުރުމަށް ކަމަށެވެ.

"ވޭތުވެދިޔަ ތިން އަހަރު އަޅުގަނޑުމެންނަށް ފުދޭ ވަރެއްގެ ގެއްލުންތައްވި. އަޅުގަނޑުމެންނާ ކުންފުނި ހަވާލުވި އިރު ކުންފުނީގެ އިންފްރާސްޓްރަކްޗާ ހުރީ ވަރަށް ދަށް ހާލަތުގައި. ބޯޓުފަހަރު ޑޮކަށް ނުލާތާ 12، 13 އަހަރު ހުރީވެފަ. ވެހިކަލްތައް ހުރީ އެހާ ދަށް ހާލުގައި،.. މި ލޯން އަޅުގަނޑު ބޭނުންކުރަނީ ފެލިވަރު އަޕްގްރޭޑް ކުރުމަކަށް ނޫން. އިންފްރާސްޓްރަކްޗާއާ އެހެނިހެން ކަންތައްތައްކުރަން،" އަދުލީ ވިދާޅުވި އެވެ.

ޝަހީރު ވިދާޅުވީ އަމާޒަކީ ރޯމަސް ބޭރު ކުރުމުގެ ބަދަލުގައި ރާއްޖޭގައި ތައްޔާރުކުރާ މަހުގެ އުފެއްދުންތައް ބޭރު ކުރުން ކަމަށެވެ. މަސް ޕެކެޓްކޮށް ބަންދުކުރުމަށް މިފްކޯ އިން ތައްޔާރުކުރާ ފެކްޓަރީ މި މަހުގެ 15 ގައި ހުޅުވައި އަންނަ ޑިސެމްބަރު މަހު އެކްސްޕޯޓް ކުރަން ފެށޭނެ ކަމަށް ވެސް ވިދާޅުވި އެވެ.

މި އަހަރުގެ ތެރޭގައި މަސް ގަންނަ އަގު ކިލޯއަކުން އެއް ރުފިޔާ ބޮޑު ކޮށްފައިވާ އިރު ތެޔޮ ގަންނަން ލިބޭ އަގު ދެ ފަހަރު މަތިން ހެޔޮ ކޮށްފައިވާ ކަމަށް ޝަހީރު ވިދާޅުވި އެވެ.

ކުރިއަށް އޮތީ މަސްވެރިކަމުގެ މޫސުން ކަމުގައިވާތީ މަސްވެރިންނަށް ފަސޭހަ އިން މަސް ކިރޭނެ ގޮތާއި މަސް ކިރާ ވަގުތު ފައިސާ ދިނުމަށާއި އައިސް އެޅޭނެ ހިދުމަތް ދިނުމަށް އެ ކުންފުނި ތައްޔާރުވެފައިވާ ކަމަށް ވެސް ޝަހީރު ވިދާޅުވި އެވެ.