އެމްއާރުޑީސީގެ މެނޭޖިން ޑިރެކްޓަރު ޝަފާއު މަގާމުން ވަކިކޮށްފި

މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)ގެ މެނޭޖިން ޑިރެކްޓަރަކަށް މުހައްމަދު ޝަފާއު ހަސަން އައްޔަން ކުރެއްވިތާ މަހެއް ވެސް ނުވަނީސް އޭނާ އެ މަގާމުން މިއަދު ވަކިކޮށްފި އެވެ.

މޯލްޑިވްސް އިސްލާމިކް ބޭންކު (އެމްއައިބީ)ގެ ހެޑް އޮފް މާކެޓިން އެންޑް ކޯޕަރޭޓް އެފެއާޒްގެ މަގާމުން ވަކިވެވަޑައިގެންނެވިތާ ކުޑަ ދުވަސްކޮޅެއްގެ ތެރޭގައި، އެމްއާރްޑީސީގެ އެމްޑީ ކަމަށް ޝަފާއު އައްޔަން ކުރެއްވީ މި މަހުގެ ހަތްވަނަ ދުވަހު އެވެ.

ނަމަވެސް ޕްރައިވަޓައިޒޭޝަން ބޯޑުގެ ރައީސް މުހައްމަދު ނިޒާރު މިއަދު ކުރެއްވި ޓްވީޓެއްގައި ވިދާޅުވީ، އެމްއާރްޑީސީގެ އެމްޑީ ކަމުން ޝަފާއު ވަކި ކުރައްވާފައިވާ ކަމަށެވެ. އެނގިފައިވާ ގޮތުގައި ޝަފާއު އެ މަގާމުން ވަކިކުރިކަން މި އިއުލާން ކުރީ، އޭނާ ގޭގައި މަޑުކުރައްވަން ރައީސް އޮފީހުން މިއަދު އެންގިތާ ކުޑައިރުކޮޅެއްގެ ތެރޭގަ އެވެ.

ޝަފާއު ވިދާޅުވީ އެމްއާރްޑީސީގެ އެމްޑީ ކަމުން އޭނާ ވަކިކުރެއްވި ސަބަބެއް އެނގިވަޑައިނުގަންނަވާ ކަމަށެވެ.

އޭނާ އެ މަގާމުން ވަކިކުރެއްވިއިރު، ވެރިކަން ކުރާ ޕާޓީ، ޕީޕީއެމުން މިދިޔަ ހޮނިހިރު ދުވަހުގެ ރޭ ގދ. ތިނަދޫގައި ބޭއްވި ބޮޑު ޖަލްސާގައި ވެސް ބައިވެރިވެވަޑައިގެންނެވި އެވެ. އަދި ޕީޕީއެމްގެ އިސްވެރިންނާއެކު ޝަފާއު ވަނީ އެ ރަށުގައި ކެމްޕެއިން ވެސް ކުރައްވައިފަ އެވެ.

ޝަފާއުގެ ކުރިން އެމްއާރުޑީސީގެ އެމްޑީއަކަށް ހުންނެވީ މުހައްމަދު ނިމާލެވެ. އެކަމަކު އަންނަ އަހަރުގެ ރިޔާސީ އިންތިޚާބަށް ވަގުތު ދިނުމަށް ކަމަށް ވިދާޅުވެ، މިދިޔަ ޖޫން މަހު އޭނާ ވަނީ އިސްތިއުފާ ދެއްވައިފަ އެވެ.