ޖާގަ ބޮޑުކޮށް ހެދި ވިލިމާލޭ ވަގުތީ ފެރީ ޓާމިނަލް ހުޅުވައިފި

މާލެ އާއި ވިލިމާލެއާ ދެމެދު ދަތުރުކުރާ މީހުން ކުރިން ބޭނުންކުރި ފެރީ ޓާމިނަލް ތަޅާލައި އެ ތަނުގައި ޒަމާނީ ވަސީލަތްތައް ހިމެނޭ ޓާމިނަލަކާ އެކު ބޮޑު އިމާރާތެއް އެޅުމަށްޓަކައި، އެމްޓީސީސީން ހެދި ވަގުތީ ފެރީ ޓާމިނަލް ރޭ ހުޅުވައި ބޭނުންކުރަން ފަށައިފި އެވެ.

އެއްފަހަރާ 240 މީހުންނަށް ހިދުމަތް ދެވޭ ގޮތަށް އަލަށް ހެދި "ދާންނާ ގިމަތަ"ގެ ހިދުމަތް ރޭ ދަންވަރު 12:00 ގައި ވަނީ ފަށައިފަ އެވެ. އާ ޓާމިނަލް ހަދާފައި ވަނީ ކުރީގެ ޓާމިނަލްގެ އިރުން އޮންނަ ޕާކިން ޒޯންގެ ގޮތުގައި ބޭނުންކުރަމުން އައި ބިމުގަ އެވެ.

ވަގުތީ ގޮތުން ބޭނުންކުރަން ހެދި ޓާމިނަލަކީ ފަސިންޖަރުންނަށް ފަސޭހަވާނެ ގޮތަށް ޑިޒައިންކޮށްފައިވާ ފެންވަރު ރަނގަޅު ޓާމިނަލެކެވެ. އެ ޓާމިނަލް ބިނާކުރުމުގެ އިތުރުން، މިހާރު ވިލިމާލޭ ފެރީ ހިދުމަތުގައި ބޭނުންކުރާ އުޅަނދުތައް ވެސް މަރާމާތުކޮށް، ފެންވަރު ރަނގަޅުކުރާނެ ކަމަށް އެމްޓީސީސީން ބުންޏެވެ.

އެމްޓީސީސީން ބުނީ ވަގުތީ ޓާމިނަލް ހުޅުވުމުގެ އިތުރުން، ފެރީ ޓާމިނަލްގައި އޮޓޮމެޓިކް ފެއާ ކަލެކްޝަން ގޭޓްތައް ހަރުކޮށް، ދަތުރު ކާޑުގެ ހިދުމަތް އަންނަ އަހަރުގެ ކުރީކޮޅު ދޭން ފެށުމަށް ވެސް ތައްޔާރުވަމުން އަންނަ ކަމަށެވެ.

އެމްޓީސީސީން އަލަށް ހެދި ޓާމިނަލް ވިލިމާލޭގެ އިތުރުން ތިލަފުށި، ގުޅީފަޅު އަދި އަތޮޅުތަކުގެ ފަސިންޖަރުންގެ ފެރީ އަދި މުދާ ފެރީގެ ހިދުމަތަށް ވެސް ބޭނުންކުރާނެ އެވެ. އަދި އެ ފެރީ ޓާމިނަލްގައި ޓޫރިސްޓުންނަށް ހާއްސަ ސަރަހައްދެއް ވެސް ގާއިމުކޮށްފައިވެ އެވެ.

އަލަށް ހެދި ޓާމިނަލް ހުޅުވައިދެއްވުމަށް ފަހު ނޫސްވެރިންނާ ވާހަކަ ދައްކަވަމުން އެމްޓީސީސީގެ ޖެނެރަލް މެނޭޖަރު ހިއުމަން ރިސޯސަސް އިބްރާހިމް ލަތީފް ވިދާޅުވީ، ކުރިން ބޭނުުން ކުރަމުން އައި ޓާމިނަލާ ހުރި ބިމުގައި، ޒަމާނީ ވަސީލަތްތައް ހިމެނޭ ޖާގަ ބޮޑު ޓާމިނަލެއް އެޅުމުގެ މަސައްކަތް އަންނަ އަހަރު ކުރީކޮޅު ފަށާނެ ކަމަށެވެ.

"އެމްޓީސީސީން ވިލިމާލެ ފެރީ ޓާމިނަލް އާ އިމާރާތަކަށް ބަދަލުކުރުމުގެ މައިގަނޑު ބޭނުމަކީ ކުރީގައި ބޭނުންކުރި އިމާރާތުގެ ބަދަލުގައި އާ ފެރީ ޓާމިނަލެއް އެޅުމަށް. މިގޮތުން މި ޓާމިނަލަކީ ކުރީގެ ޓާމިނަލް ހުރި ބިން ތަރައްގީކުރުމުގެ މަޝްރޫއު ނިމެންދެން ބޭނުން ކުރުމަށް އިމާރާތްކުރި ވަގުތީ ޓާމިނަލެއް،" އޭނާ ވިދާޅުވި އެވެ.

ލަތީފް ވިދާޅުވީ ކުރިން ބޭނުންކުރި ޓާމިނަލަށް ވުރެ އަލަށް ހެދި ޓާމިނަލްގެ ވެންޓިލޭޝަން ރަނގަޅުވެފައި ފިނިވާނެ ކަމަށެވެ.

އެމްޓީސީސީން ބުނީ އެ ކުންފުނިން ހުޅުމާލޭގައި ދެމުން އަންނަ އެއާޕޯޓް ބަހުގައި މިދިޔަ މަހުގެ ތެރޭގައި އޮޓޮމެޓިކް ފެއާ ކަލެކްޝަން ސިސްޓަމް ހަރުކޮށް، ކާމިޔާބުކަމާއެކު ޓެސްޓްކޮށްފައިވާ ކަމަށެވެ. އެ ކުންފުނިން ވިލިމާލެއަށް ފެރީގެ ހިދުމަތް ދޭން ފަށާފައި ވަނީ 2001 ވަނަ އަހަރު އެވެ.