ސަރުކާރުން އުޅެނީ މުދާތައް ފޭރި، ގާސިމްގެ ވިޔަފާރި ބަނގުރޫޓުކޮށްލަން: އަދާލަތު

ދައުލަތުގެ މުއައްސަސާތަކުން ގާނޫނާ ހިލާފަށް މަސައްކަތް ކުރަނީ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ވިޔަފާރިތައް ބަނގުރޫޓުކޮށްލުމަށް ކަމަށް އަދާލަތު ޕާޓީން ރޭ ބުނެފި އެވެ.

ގާސިމްގެ ވިލާ ޝިޕިން ކުންފުނީގެ ދަށުން ހިންގާ ފަސް ރިސޯޓުގެ ތެރެއިން، ރޯޔަލް އައިލެންޑަށް އެތެރެކުރި ބަނގުރަލާއި އޫރު މަސް ވިލާގެ އެހެން ރިސޯޓަކަށް ގެންދިޔަ ކަމުގެ ތުހުމަތުގައި ކަސްޓަމްސްއިން ވަނީ އިއްޔެ ރޭ އެ ހުރިހާ ރިސޯޓެއް ބަލައި ފާސްކޮށްފަ އެވެ.

އަދާލަތު ޕާޓީން ނެރުނު ބަޔާނެއްގައި ބުނީ ދައުލަތުގެ މުއައްސަސާތަކާއި މުދަލާއި އެހެނިހެން ވަސީލަތްތައް ގާނޫނާ ހިލާފަށް ބޭނުންކޮށްގެން ގާސިމްގެ ވިޔަފާރި ބަނގުރޫޓުކޮށްލުމަށް ހިންގަމުންގެންދާ ޣައިރު ގާނޫނީ އަނިޔާވެރި ޖަރީމާތައް އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އަދި އެ ފަދަ އަމަލުތައް ވަގުތުން ހުއްޓާލުމަށް ވެސް އަދާލަތު ޕާޓީގެ ބަޔާނުގައި ގޮވާލި އެވެ.

އަދާލަތު ޕާޓީން ތުހުމަތު ކުރި ގޮތުގައި މިފަދަ އަމަލުތަކަކީ ރައީސް އަބްދުﷲ ޔާމީން އަޑީގައި ހުންނަވައިގެން ގާނޫނުތަކާއި ގަވާއިދުތަކާ ހިލާފަށް މުޅި ދައުލަތުގެ ހުރިހާ ބާރުތަކެއް އެއްކުރައްވައިގެން ހިންގަވާ އަމަލެކެވެ. މިއީ ގާސިމް ކުރައްވާ އިސްލާހީ، ސިޔާސީ މަސައްކަތްތައް ހުއްޓުވާލެއްވުމަށް ހިންގަވާ ފޭރުމުގެ އަމަލެއް ކަމަށް ވެސް އަދާލަތު ޕާޓީގެ ބަޔާނުގައިވެ އެވެ.

"ހުރިހާ ސިޔާސީ ލީޑަރުން ޖަލު ގޮޅީގައި ބަންދުކޮށްގެން ވެސް، ސިޔާސީ ގޮތުން ކުރިއެރުމެއް ނުލިބުމުން، ރިޔާސީ އިންތިހާބު ބޯމަތިވުމާއެކު ރާއްޖޭގެ ބޮޑެތި ވިޔަފާރިތަކަށް ބިރު ދައްކައިގެން އެތައް ބައިވަރު މުވައްޒަފުންގެ ވަޒީފާގެ ބިރުވެރިކަމެއްގެ ތެރެއަށް ހުށަހަޅައިގެން، ރައްޔިތުންގެ މެދުގައި ނުތަނަވަސްކަން އުފައްދައިގެން، އަދި ފަތުރުވެރިންނަށް ރާއްޖެއަކީ ބިރުވެރި، ނާމާން އަދި ހަމަނުޖެހުން ބޮޑު ތަނެއްގެ ގޮތުގައި ދެއްކުމަކީ އެކަމުގެ ނޭދެވޭ އަސަރު ރާއްޖޭގެ ފަތުރުވެރިކަމުގެ ސިނާއަތަށާއި ޖުމްލަކޮށް ދިވެހި އިގްތިސާދަށް ނުހަނު ބޮޑުކޮށް ކުރާނެ ކަމެކެވެ،" އަދާލަތު ޕާޓީގެ ބަޔާނުގައިވެ އެވެ.

އެހެންވެ، މިކަންކަމާ މެދު ލަސްނުކޮށް ފިޔަވަޅު އެޅުމަށް މޯލްޑިވްސް އެސޯސިއޭޝަން ފޯ ޓުއަރިޒަމް އިންޑަސްޓްރީސް (މަޓީ) އާއި ދިވެހި ވިޔަފާރިވެރިންގެ ޖަމިއްޔާ ފަދަ މުހިންމު މުއަސަސާތަކަށް އެ ޕާޓީގެ ބަޔާނުގައި ވަނީ ގޮވާލައިފަ އެވެ.

އަދާލަތު ޕާޓީގެ ބަޔާނުގައި ވަނީ ގާނޫނީގޮތުން އަމަން ބެލެހެއްޓުމުގެ ޒިންމާ މަތިކޮށްފައިވާ ފުލުހުން ރައީސް ޔާމީންގެ ސިޔާސީ ވާދަވެރިން ނެތިކޮށްލުމަށް ހިންގާ ޣައިރު ގާނޫނީ އަމަލުތަކުން އެއްކިބާވެ، ގާނޫނުގެ ތަރަހައިގެ ތެރެއަށް ވަދެ، މުޖުތަމައުގައި ހިންގަމުންދާ އަނިޔާވެރި އަމަލުތައް ހުއްޓުވުމަށް ގޮވާލައިފަ އެވެ.

މީގެއިތުރުން ދައުލަތުގެ އެހެނިހެން މުއައްސަސާތައްވެސް ގާނޫނުގެ އިމުގެ ތެރެއަށް ރުޖޫއަވެ، ގާނޫނީގޮތުން ދީފައިވާ ބާރުތަކާއި މަތިކޮށްފައިވާ ޒިންމާތަކުގެ ބޭރުން ހަރަކާތްތެރިނުވުމަށާއި ދިވެހި ގައުމާއި ރައްޔިތުންގެ އެންމެ މަތީ މަސްލަހަތު ހިމާޔަތްކުރުމަށް މުއައްސަސާތަކުގެ ވެރިންނަށް ވެސް އެ ޕާޓީން ވަނީ ގޮވާލައިފަ އެވެ.

ގާސިމްގެ ހަތަރު ރިސޯޓަކަށް ރަލާއި އޫރުމަސް އެތެރެ ކުރުމުގެ ހުއްދަ މިދިޔަ އަހަރުގެ މާޗް މަހުގެ 22 ވަނަ ދުވަހުން ފެށިގެން ބާތިލްކޮށްފައިވާ ކަމަށް ކަސްޓަމްސް އިން ވަނީ ބުނެފަ އެވެ. ކަސްޓަމުން ބުނި ގޮތުގައި ހިދުމަތް ދިނުން ހުއްޓާލީ މީރާ އަށް ދައްކަންޖެހޭ ފައިސާ ގަވާއިދާ އެއްގޮތަށް ނުދައްކާތީ އެވެ. އެ ހަތަރު ރިސޯޓަކީ ސަން އައިލެންޑް ރިސޯޓު، ޕެރެޑައިސް އައިލެންޑް ރިސޯޓު، ފަން އައިލެންޑާއި ހޮލިޑޭ އައިލޭންޑް ރިސޯޓެވެ.

އެ ހަތަރު ރިސޯޓުގެ އިތުރުން ވިލާ އިން ހިންގަމުން އަންނަނީ ރޯޔަލް އައިލެންޑް ރިސޯޓެވެ. ކަސްޓަމްސް އިން ރިސޯޓުތަކަށް އަރާ ފާސް ކުރީ، ރޯޔަލް އަށް ގެންދާ ރަލާއި އޫރުމަސް އެހެން ރިސޯޓުތަކަށް ގެންގޮސް ބޭނުން ކުރަމުން އަންނަ ކަމަށް ބުނެ އެވެ. އެކަމަކު ވިލާގެ ވަކީލުން ތަކުރާރުކޮށް ބުނަމުން އަންނަނީ ގާނޫނާއި ގަވާއިދާ ހިލާފަށް އެއްވެސް މުދަލެއް ރިސޯޓުތަކަށް އެތެރެކޮށްފައި ނުވާނެ ކަމަށެވެ.