މިޝެލް އޮބާމާގެ ބައޮގްރަފީ "ބިކަމިން" ނޮވެމްބަރުގައި 13 ގައި ނެރެނީ

އެމެރިކާގެ ފަސްޓްލޭޑީންގެ ތެރެއިން އެންމެ ސްޓައިލިޝް އަދި އެންމެ ގިނަ ބައެއްގެ ލޯބި ހޯއްދެވި ފަސްޓްލޭޑީންގެ ތެރޭގައި ހިމެނިވަޑައިގަންނަވާ އެމެރިކާގެ ކުރީގެ ރައީސް ބަރަކް އޮބާމާގެ އަނބިކަނބަލުން މިޝޭލް އޮބާމާގެ ބައޮގްރަފީ މި އަހަރުގެ ނޮވެމްބަރުގައި ނެރެން ނިންމައިފި އެވެ.

"ބިކަމިން" ގެ ނަން ދީފައިވާ ބައޮގްރަފީގެ ކަވަރާ އެކު އިސްޓަގްރާމްގައި މިޝޭލް ލިޔުއްވާފައިވާ ގޮތުން އެ ފޮތް ނެރޭނީ ނޮވެމްބަރު، 13 ގަ އެވެ.

އެމެރިކާގައި ވެރިކަމުގެ ދެ ދައުރު ފުރިހަމަ ކުރެއްވި އޮބާމާގެ އަނބިކަނބަލުން އަދި ދެ ކުދިންގެ މަންމަ ވިދާޅުވި ގޮތުގައި އަމިއްލަ ހަޔާތުގެ ވާހަކަތައް، އާންމުންނާ ހަމައަށް ގެނެސް ދެއްވުމަކީ ވަރަށް ޖަޒުބާތީ ކަމެކެވެ. އަދި މިއީ މިފަދަ ފުރަތަމަ ތަޖުރިބާ ކަމަށް ވެސް ވިދާޅުވި އެވެ.

ނަމަވެސް ބަޔޮގަރްފަގީގައި ހަޔާތުގެ މުހިއްމު ހުރިހާ ވާހަތަކެއް ހިއްސާކޮށްފައި ހުންނާނެ ކަމަށާއި އެއިން ބަޔަކަށް އިބުރަތްތަކެއް ލިބޭނެ ކަމަށް އުންމީދު ކުރައްވާ ކަމަށް ވިދާޅުވި އެވެ.

އުމުރުން މިހާރު 54 އަހަރުގެ މިޝެލް ވިދާޅުވީ "ބިކަމިން" ގައި އޭނާ ހަޔާތުގެ ޅަ ދުވަސްތައް އެމެރިކާގެ ޝިކާގޯގައި ހޭދަ ކުރި ގޮތާއި ފުރާވަރުގެ ދުވަސްވަރުގެ ހަނދާންތަކާއި އެހެން މީހުން ބަލައި ގަންނަ ފަދަ މީހަކަށް ވާން ކުރެއްވި ދިގު ދަތުރުގެ ވާހަކަތައް ހިއްސާކޮށްފައި ހުންނާނެ އެވެ.

"އަހަރެން މި ހުރީ އެ ވާހަކަތައް ހިއްސާ ކުރަން މިހާރު ކެތްމަދުވެފައި،" މިޝެލް ވިދާޅުވި އެވެ.

ޕެންގްއިން ރެންޑަމް ހައުސްއާ ގުޅިގެން ނެރޭ "ބިކަމިން" 24 ބަހަކުން ލިބެން ހުންނާނެ އެވެ. މީގެ އެއްބަސްވުމުގައި އެ ކުންފުންޏާ އެކު މިދިޔަ އަހަރު ސޮއި ކުރީ 65 މިލިއަން ޑޮލަރަށް ކަމަށް ރިޕޯޓްތައް ބުނެ އެވެ.

"ބިކަމިން" ޕްރޮމޯޓް ކުރަން މިޝޭން ދުނިޔޭގެ ވަރަށް ގިނަ ގައުމުތަކަށް ދަތުރު ކުރައްވަން ވެސް ވަނީ ނިންމަވައިފަ އެވެ. ދެހާސް ބާރަ ވަނަ އަހަރު މިޝޭލް ވަނީ ދުޅަހެޔޮ ސިއްހަތަކަށް ހާއްސަކޮށްގެން "އެމެރިކަން ގްރައުން" ގެ ނަމުގައި ވައިޓްހައުސްގެ ބަދިގޭގެ ތަޖުރިބާތައް ވެސް ހިމެނޭ ފޮތެއް ނެރުއްވައިފަ އެވެ.