ހިބަޅިދޫ މައްސަލާގައި ވަކީލަކު ހޯދަން އަދީބާއި ފަޔާޒަށް ފުރުސަތު ދީފި

ބ. ހިބަޅިދޫން ހަނގުރާމަވެރި ހަތިޔާރު ފެނުނު މައްސަލާގައި ކުރީގެ ނައިބު ރައީސް އަހުމަދު އަދީބާއި ސިފައިންގެ ކެޕްޓަން އަހުމަދު ފަޔާޒު(ޕާޕާ) ގެ މައްޗަށް ކުރާ ދައުވާގައި ވަކީލަކު ހަމަޖައްސަން އެ ދެ ބޭފުޅުންނަށް ކްރިމިނަލް ކޯޓުން މިއަދު ފުރުސަތު ދީފި އެވެ.

މިދިޔަ ނޮވެމްބަރު މަހުގެ ތެރޭގައި ހިބަޅިދޫން ހަތިޔާރު ފެނުނު މައްސަލާގައި އަދީބާއި ފަޔާޒުގެ އިތުރުން މުހައްމަދު އައްލާމް ލަތީފް (މޮހޯ) އާއި ކުރީގެ ފުޓްބޯޅަ ކުޅުންތެރިޔާ މުހައްމަދު ހުސައިން (އޮއިއްޓޭ) އަދި އަހުމަދު އިޝްފާހު އަލީގެ މައްޗަށް ވެސް ދައުވާކުރެ އެވެ. އެކަމަކު އައްލާމާއި އޮއިއްޓޭ އާއި އިޝްފާހު ފިލައިގެން ރާއްޖެއިން ބޭރުގައި އުޅޭތީ އެ މީހުން ބައި މިއަދު ކުރިއަކަށް ނުގެންދެ އެވެ.

މިއަދު ބޭއްވި ޝަރީއަތުގައި ދައުވާ އިއްވުމުން އަދީބާއި ފަޔާޒު ވެސް ވިދާޅުވީ ދައުވާ ސާފުނުވާ ކަމަށާއި ބޭނުންވަނީ ވަކީލަކާ އެކު މައްސަލަ ކުރިއަށް ގެންދަން ކަމަށެވެ. ވަކީލަކު ހޯދަން 30 ދުވަހުގެ މުއްދަތެއް ދޭން އަދީބު އެދުނުއިރު ފަޔާޒު އެދުނީ 20 ދުވަސް ދިނުމަށެވެ.

އެކަމަކު މައްސަލަ ބަލާ ގާޒީ އަހުމަދު ޝަކީލް އެންގެވީ އަންނަ މަހުގެ ތިން ވަނަ ދުވަހުގެ ކުރިން ވަކީލަކު ހަމަޖެއްސުމަށެވެ.

ދައުވާ ސާފުނުވާ ކަމަށް އަދީބާއި ފަޔާޒު ވިދާޅުވާތީ ދެ ފަހަރެއްގެ މަތިން ދައުވާ ކިޔައި ދިނުމުން ވެސް އެ ދެ ބޭފުޅުން ވިދާޅުވަމުން ގެންދެވީ ދައުވާ ސާފުނުވާ ކަމަށެވެ. އަދީބު ވިދާޅުވީ ހަތިޔާރު ގެެންގުޅުނު ކަމަށް ބުނެ ކުރިން ވެސް އޭނާގެ މައްޗަށް ދައުވާކޮށް، ކުށްވެރިވާ ކަމަށް ނިންމާފައިވާ ކަމަށާއި އެއް ކުށަކަށް ދެ ފަހަރު އަދަބު ނުދެވޭނެ ކަމަށެވެ.

ކުރިން ސިފައިންގެ ބަޑި ގުދަނުގެ އިސްވެރިއަކަށް ވެސް ހުންނެވި ފަޔާޒު ވިދާޅުވީ އެ މައްސަލާގައި މިހާތަނަށް އޭނާއާ އެއްވެސް ސުވާލެއް ކޮށް، ތަހުގީގެއް ހިންގާފައިނުވާ ކަމަށާއި އެހެންވެ ތަހުގީގެއް ނެތި ދައުވާ ނުކުރެވޭނެ ކަމަށެވެ.

އެ މައްސަލާގައި އުފުލި ޓެރަރިޒަމްގެ ދައުވާގައިވާ ގޮތުން ފަޔާޒު ވަނީ ބަޑި ގުދަން ބެލެހެއްޓުމާއި އޭނާ ހަވާލުވެ ހުރިއިރު އުސޫލާއި ޚިލާފަށް އެތަނުން ހަތިޔާރު ނެރެފަ އެވެ. އަދި އޭގެ ތެރެއިން ބައެއް ހަތިޔާރު ހިބަޅިދޫން ފެނިފައިވާއިރު ބަޑި ގުދަން އޮޑިޓް ކުރަން ސިފައިން ކުރި މަސައްކަތަށް ހުރަސް އަޅައި، ބައެއް ލިޔުންތައް އޭނާ ނައްތާލާފައިވާ ކަމަށް ދައުވާގައިވެ އެވެ.

އަދީބާއި އޮއިއްޓޭ ބައިވެރިވެގެން އަދީބު ދިރިއުޅުނު ދެ އެޕާޓްމެންޓްގައި ވެސް ހަނގުރާމަވެރި ހަތިޔާރާއި ގޮވާ ތަކެތި ގެންގުޅުނު ކަމަށާއި ހިބަޅިދޫއަށް ހަތިޔާރު ގެންދިޔައީ އެ ދެ މީހުންނާއި އައްލާމާއި އިޝްފާހު އަދި ފަޔާޒު ގުޅިގެން ކަމަށް ދައުވާގައިވެ އެވެ.

އަދީބުގެ މައްޗަށް ދައުވާ ކުރިއިރު ތަފާތު ތިން މައްސަލައެއްގައި އޭނާ މިހާރު ވެސް ގެންދަނީ 33 އަހަރުގެ ހުކުމެއް ތަންފީޒު ކުރަމުންނެވެ. އަދި ފަޔާޒު ވެސް ދަނީ ދެ އަހަރުގެ ހުކުމެއް ތަންފީޒު ކުރަމުންނެވެ.