ބަފައިބެއާ ހެދި 15 މިނެޓް ތެރޭ ކައިވެނި ރޫޅިއްޖެ

ދުބާއީގައި ކުރި ކައިވެންޏެއް، އަންހެން މީހާގެ ބައްޕަގެ ދަހިވެތިކަމާ އެކު އެންމެ 15 މިނެޓް ތެރޭ ރޫޅިއްޖެ އެވެ.

ކައިވެނި ކުރި މީހުންގެ ނަންތައް ހާމަ ނުކޮށް ގަލްފް ނިއުސް ރިޕޯޓްކޮށްފައިވާ ގޮތުގައި ކޯޓްގައި މިދިޔަ އަންގާރަ ދުވަހު ކައިވެނިކުރި އިރު ރަނުގެ ގޮތުގައި ދޭން އެއްބަސްވި 100،000 ދިރްހަމްގެ ތެރެއިން 50،000 ދިރްހަމް އަންހެން މީހާގެ ބައްޕައާ ކޯޓް ތެރޭގައި ހަވާލުކުރި އެވެ.

ކައިވެނި ރޫޅެން މެދުވެރިވީ ރަނުގެ ބާކީ ބައި ނުލިބިގެން ބަފައިބެ އުޅުނު ގޮތުން ފިރިހެން މީހާ ހިތްހަމަނުޖެހުމެވެ. "އެތައް ބައެއްގެ ކުރިމަތީގައި އޭނާގެ އަގު ވެއްޓޭ ގޮތަށް އަދި އިހުތިރާމް ވެސް ކުޑަވާ ގޮތަށް" ބަފައިބެ އަމަލު ކުރި ކަމަށް ބުނެ ފިރިހެން މީހާ ކައިވެނި ރޫޅާލީ ކައިވެނިކުރިތާ އެންމެ 15 މިނެޓް ތެރޭގަ އެވެ.

މި ހާދިސާއާ ބެހޭ ގޮތުން، ކައިވެނި ކުރި ފިރިހެން މީހާގެ ވަކީލު ގަލްފް ނިއުސް އަށް ކިޔައި ދިން ގޮތުގައި ބާކީ ފައިސާ އެ ވަގުތު ހުރީ ކޯޓާ ތަންކޮޅެއް ދުރުގައި ޕާކްކޮށްފައި އޮތް ފިރިހެން މީހާގެ ކާރު ތެރޭގަ އެވެ. އަދި އެ ފައިސާ ހިފައިގެން އަންނަން ވަގުތުކޮޅެއް ނަގާނެ ކަމަށާއި ކެތްތެރިވުމަށް އެދުމުން ވެސް ބަފައިބެ އަށް ކެތް ނުވެ ފައިސާ ދޭން އެދުމުން ދިޔަ ކަމަށް ވަކީލް ބުންޏެވެ.

"ފައިސާ ހިފައިގެން އަންނަން ވަގުތުކޮޅެއް ނަގާނެ ކަމަށް ބުނީމަ ދެން ބުނަނީ ރައްޓެއްސަކު ނޫނީ އާއިލާގެ މެމްބަރަކު ފޮނުވައިގެން ވިޔަސް ފައިސާ ވީހާ ވެސް އަވަހަށް ގެނެސް ދޭށޭ،" އޭނާ ބުންޏެވެ. "މިކަމެއް ހިނގީ އެތައް ބައެއްގެ ކުރިމަތީގައި. އެހެންވެ އެކަމާ ހިތްހަމަނުޖެހިގެން އަންހެނުން ވަރިކޮށްލީ."