އޮސްޓްރޭލިއާގެ ބިޔަ ކެންގަރޫ "ރޮޖާ" މަރުވެއްޖެ

ބިޔަކަމުން މުޅި ދުނިޔޭގެ ސަމާލުކަން 2015 ގައި ހުއްޓުނު އޮސްޓްރޭލިއާގެ ކެންގަރޫ ރޮޖާ މަރުވެއްޖެ އެވެ.

ރޮޖާ ދިރިއުޅެމުން ދިޔަ އެލީސް ސްޕްރިންގްސްގެ ކެންގަރޫ ސެންކްޗުއަރީން ބުނީ 12 އަހަރުގެ ރޮޖާ މަރުވީ މި ހަފުތާގެ ކުރީކޮޅު ކަމަށެވެ. މަރުވި ސަބަބެއް ކަމަށް ބުނެފައި ވަނީ އުމުރުން ދުވަސްވުމެވެ.

ރޮޖާއަކީ އިސްކޮޅުގައި ހަ ފޫޓް ހަތް އިންޗި އަދި ބަރުދަނުގައި 89 ކިލޯ ހުރި ކެންގަރޫއެކެވެ. ރޮޖާ ކޮއްޅަށް ހުންނަ މަންޒަރު ފެންނަ ވީޑިއޯތަކާއި ފޮޓޯތަކުން ސިފަ ވަނީ ބޮޑީބިލްޑްކޮށްގެން ހުންނަ ވަރުގަދަ ފިރިހެނެއްގެ ގޮތުގަ އެވެ.

މި ބިޔަ ކެންގަރޫ 2015 ގައި އެތައް ބައެއްގެ ސަމާލު ކަމަށް އައީ ދަގަނޑު ބާލިދީއެއް ދެ އަތުން "ފުނޑައިލާ" މަންޒަރު ދައްކުވައިދޭ ފޮޓޯތަކެއް ސޯޝަލް މީޑިއާގައި ވައިރަލްވުމުންނެވެ.

ކެންގަރޫ ސެންކްޗުއަރީ ހިންގާ ކްރިސް ބާންސް، ރޮޖާ ވަކިވުމުގެ ހިތާމައިގައި ބީބީސީ އަށް ބުނީ އެ މީހުންގެ "ނަލަ ފިރިހެން ދަރީ"ގެ ވަކިވުމަކީ ބޮޑު ހިތާމައެއް ކަމަށެވެ. ކްރިސް، ރޮޖާ ގެންގުޅެން ފެށީ އޭތީގެ މަންމަ ކާރެއްގައި ޖެހި މަރުވުމާ ގުޅިގެންނެވެ. އެ ހާދިސާ ހިނގި އިރު ކުޑަކުޑަ ރޮޖާ އިނީ މަންމަގެ އުނގުތެރޭގަ އެވެ.

ކްރިސް ބުނީ ރޮޖާއަކީ ވަރަށް ގިނަ ބައެއްގެ ލޯބި ހޯދާފައިވާ އާދަޔާހިލާފު ކެންގަރޫއަކަށްވާތީ އޭތި މަރުވުމުގެ ހިތާމައިގައި މިހާރު ވަރަށް ގިނަ ބަޔަކު ހަމްދަރުދީގެ މެސެޖްތައް ފޮނުވަމުން އަންނަ ކަމަށެވެ.

ކްރިސްގެ ސެންކްޗުއަރީއަކީ މިހާރު 50 އެއްހާ ކެންގަރޫގެ ހިޔާވައްސެވެ. އޮސްޓްރޭލިއާ އަށް ހާއްސަ ޖަނަވާރެއްގެ ގޮތުގައި މަޝްހޫރު ކެންގަރޫ ދިރިހުންނަ އާންމު އުމުރަކީ 14 އަހަރެވެ.