އާ އިމިގްރޭޝަން ކޮންޓްރޯލަކަށް އެފްއޭ ފަޔާޒް ހަމަޖައްސަނީ

އާ އިމިގްރޭޝަން ކޮންޓްރޯލަރަކަށް ޖުމްހޫރީ ޕާޓީގެ ޑެޕިއުޓީ ލީޑަރު އަދި ކުރީގެ ޑެޕިއުޓީ ކޮމިޝަނަރު އޮފް ޕޮލިސް މުހައްމަދު ފަޔާޒް (އެފްއޭ) އައްޔަން ކުރަން ނިންމާފައިވާކަން "މިހާރު" އަށް އެނގިއްޖެ އެވެ.

ނަމަވެސް، އޭނާ މި ވަގުތު ރަށުގައި ނޫޅުއްވާތީ މަގާމަށް އައްޔަން ކުރެއްވުމުގެ ކަންކަން އަދި ނުނިމެނީ ކަމަށް ވެ އެވެ.

ފަޔާޒަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި މެލޭޝިއާގައި ހުންނެވި ދިވެހި ސަފީރުގެ މަގާމުގައި ހުންނެވި އަދި ކުރީގެ ރައީސް މުހައްމަދު ވަހީދުގެ ވެރިކަމުގައި ހޯމް މިނިސްޓްރީގެ ސްޓޭޓް މިނިސްޓަރުކަމުގެ މަގާމު ފުރުއްވާފައިވާ ބޭފުޅެކެވެ.

އިމިގްރޭޝަން ކޮންޓްރޯލަރަކަށް ފަޔާޒް އައްޔަން ކުރަން ނިންމަވާފައިވާއިރު، މިހާތަނަށް އެ މަގާމުގައި ހުންނެވި މުހައްމަދު އަންވަރު އޮފީހަށް ނުނިކުންނަވާތާ ދުވަސްތަކެއް ވެފައިވާ ކަމަށްވެ އެވެ. އެނގިފައިވާ ގޮތުގައި ރައީސް އިބްރާހިމް މުހައްމަދު ސޯލިހް މަގާމުގެ ހުވާކުރެއްވި ދުވަހުން ފެށިގެން އަންވަރު އޮފީހަކަށް ނުނިކުންނަވަ އެވެ. އަދި މިދިޔަ މަހުގެ 15 ވަނަ ދުވަހު އަންވަރު ސޮއިކުރައްވައި ނެރުއްވި މެމޯއަކުން ވަނީ ހުރިހާ މުވައްޒަފުންގެ މަސައްކަތަށް ޝުކުރު ދަންނަވައިފަ އެވެ.

އެ މެމޯގައި އަންވަރު ވިދާޅުވެފައި ވަނީ އިމިގްރޭޝަންގައި އޭނާ މަސައްކަތް ކުރެއްވި ދުވަސްވަރު އެއްވެސް މުވައްޒަފެއްގެ ހައްގަށް އުނިކަމެއް ލިބޭގޮތަށް މަސައްކަތް ކުރައްވާފައި ނުވާނެ ކަމަށެވެ. އަދި، އެފަދަ ގޮތަކަށް އެއްވެސް މުވައްޒަފަކަށް އިހުސާސް ކުރެވޭ ނަމަ އެކަމަށްޓަކައި އަންވަރު ވަނީ މާފަށް ވެސް އެދިވަޑައިގެންފަ އެވެ.

އަންވަރު އޮފީހަށް ނުނިކުންނަވައި އަދި ވަޒީފާއިން ވަކިވެފައިވާކަން ދޭހަވާ ގޮތަށް މުވައްޒަފުންނަށް މެމޯއެއް ނެރުއްވި ނަމަވެސް އޭނާ މަގާމުން ވަކިކުރެއްވި ކަމެއް އަދިއެއް ނޭނގެ އެވެ. ރައީސް އޮފީހުގެ ވެބްސައިޓުގައިވާ ގޮތުން ނަމަ އިމިގްރޭޝަން ކޮންޓްރޯލަރަކީ އަދިވެސް އަންވަރެވެ.

އަންވަރުގެ ފޯނަށް ޖަވާބު ނުދެއްވާތީ މިކަމާ ގުޅޭ ގޮތުން އޭނާގެ ޖަވާބެއް ނުލިބުނެވެ.