އީދާ ދިމާކޮށް ކޮލަމްބޯ އަށް މޯލްޑިވިއަންގެ ހާއްސަ ފެއާއެއް

ކުރިއަށް އޮތް ބޮޑު އީދާ ދިމާކޮށް، ގައުމީ އެއާލައިން މޯލްޑިވިއަނުން ހާއްސަ އަގުތަކެއްގައި ކޮލަމްބޯ އަށް ދަތުރުތަކެއް ބާއްވަން ނިންމައިފި އެވެ.

އެ ކުންފުނިން ބުނީ އީދު ބަންދުގައި މާލޭން ކޮލަމްބޯ އަށް އެއްކޮޅު ޓިކެޓެއް ވިއްކާނީ 99 ޑޮލަރު (1،521.63ރ.) އަށެވެ. ދެކޮޅު ޓިކެޓެއް ނަމަ 280 ޑޮލަރު (4،303.6ރ.) އަށެވެ.

މީގެ އިތުރުން ގަމާއި ކޮލަމްބޯ އާ ދޭތެރޭ ވެސް އީދާ ދިމާކޮށް ދަތުރުތަކެއް ބާއްވަން ވަނީ ނިންމައިފަ އެވެ. ގަމާއި ކޮލަމްބޯގެ ދެކޮޅު ޓިކެޓެއް ވިއްކަނީ 199 ޑޮލަރު (3،058.63ރ) އަށެވެ.

އީދާ ދިމާކޮށް ބާއްވާ ކޮލަމްބޯ އަށް ބާއްވާ ހާއްސަ ދަތުރު އޮންނާނީ އަންނަ މަހުގެ 8 ގަ އެވެ. އަދި އެނބުރި އަންނާނީ 17 ވަނަ ދުވަހު ކަމަށް ވެސް މޯލްޑިވިއަނުން ބުންޏެވެ.

މީގެ އިތުރުން ކޮލަމްބޯ އިން މާލެ އަށް ހާއްސަ ފެއާއެއްގައި އަންނަނީ ޓިކެޓް ވިއްކަމުންނެވެ. އެގޮތުން ކޮލަމްބޯ އިން މާލެ އަށް އެއްކޮޅު ޓިކެޓެއް ވިއްކަނީ 75 ޑޮލަރު (1،152.75ރ) ށެވެ. ދެކޮޅު ނަމަ 120 ޑޮލަރު (1،844.4ރ.) އަށެވެ

މޯލްޑިވިއަނުން 2014 ގައި ވެސް ގަމާއި ކޮލަމްބޯ އާ ދެމެދު ޝެޑިއުލް ދަތުރުތަކެއް ބޭއްވި އެވެ.

އެހެން ނަމަވެސް އެކަށީގެންވާ ވަރަށް ޕެސެންޖަރުން ނުލިބޭތީ ގެއްލުންވާ ކަމަށް ބުނެ، ފަހުން ވަނީ އެ ދަތުރުތައް ހުއްޓާލައިފަ އެވެ.