ރައްޔިތުންގެ ހިޔާލު ހޯދަން ފުލުހުން ޕޯޓަލްއެއް ހުޅުވައިފި

ރައްޔިތުންގެ ހިޔާލު ހޯދައިގެން ފުލުހުންގެ ހިދުމަތް އިސްލާހު ކުރަން ސަރުކާރުން ވެފައިވާ ވައުދާ އެއްގޮތަށް ހިޔާލު ހޯދުމުގެ އޮންލައިން ޕޯޓަލްއެއް ތައާރަފް ކޮށްފިއެވެ.

"ރައްޔިތުންގެ ހިޔާލު"ގެ ނަމުގައި ތައާރަފްކުރި އޮންލައިން ޕޯޓަލް ރަސްމީކޮށް އިފްތިތާހު ކުރީ އިސްކަންދަރު ކޮށީގައި މިއަދު ހެނދުނު ބޭއްވި، މެނޭޖްމަންޓް ބޯޑް ބައްދަލުވުމުގަ އެވެ. ޕޯޓަލް އިފްތިތާހު ކޮށްދެއްވީ އެކްޓިން ކަމިޝަނާ އޮފް ޕޮލިސް މުހައްމަދު ހަމީދެވެ. އެ ބައްދަލުވުމުގައި ޑެޕިއުޓީ ކަމިޝަނާ އަބްދުލް މަންނާން ޔޫސުފް އާއި އެކްޒެކެޓިވް އޮފިސަރުންނާއި ފުލުހުންގެ ޑިޕާޓްމަންޓްތަކުގެ އިސްވެރިން ބައިވެރިވެވަޑައިގެންނެވި އެވެ.

އޮންލައިންކޮށް ހިޔާލު ހޯދަން ފުލުހުން މިފަދަ ޕޯޓަލްއެއް ގާއިމް ކުރީ ރައްޔިތުންގެ ހިޔާލާ އެކު ފުލުހުންގެ ހިދުމަތް އިސްލާހު ކުރުމުގެ ވައުދު ފުއްދުމަށް މަސައްކަތް ކުރުމުގެ ގޮތުންނެވެ. އެއީ ރައީސް އިބްރާހިމް މުހައްމަދު ސޯލިހްގެ ސަރުކާރުގެ ފުރަތަަމަ 100 ދުވަހުގެ ތެރޭގައި ފުރިހަމަ ކުރުމަށް ވައުދު ވެފައިވާ ކަމެކެވެ. ރައްޔިތުންގެ ހިޔާލު ފުލުހުން ހޯދާނީ ހަމަ އެކަނި އޮންލައިން ޕޯޓަލް މެދުވެރިކޮށްގެނެއް ނޫނެވެ.

މިއަދު އިފްތިތާހު ކުރި އޮންލައިން ޕޯޓަލް މެދުވެރިކޮށް ހުށަހަޅާ ހިޔާލުތަކުގެ ތެރެއިން އަންނަ ފެބްރުއަރީ މަހުގެ 15 ވަނަ ދުވަހުގެ ކުރިން ހުށަހަޅާ ހިޔާލުތައް ފުލުހުންގެ ސްޓްރެޓިޖިކް ޕްލޭންގައި ހިމަނާނެ އެވެ. ނަމަވެސް އޭގެ ފަހުން ވެސް ހިޔާލު ހުށަހެޅުމުގެ ފުރުސަތު އޮންނާނެ އެވެ.

ފުލުހުންގެ ހިދުމަތް އިސްލާހު ކުރަން ރައްޔިތުންގެ ހިޔާލު ހޯދުމަށް ހަމަ އެކަނި އޮންލައިން ޕޯޓަލްގެ އިތުރުން ވެސް ބައެއް ހަރަކާތްތައް ހިންގަން ވަނީ ނިންމައިފަ އެވެ. އެގޮތުން ވަކި ގްރޫޕްތަކަކަށް އަމާޒުކޮށްގެން ހިންގާވޯކްޝޮޕްތަކާއި ސިމްޕޯޒިއަމްއެއްް ބޭއްވުން ހިމެނެ އެވެ.