އެހެން މައްސަލައެއްގައި ވެސް ނަޒީމަށް ދައުވާކުރަން ފޮނުވައިފި

ޖުމްހޫރީ މައިދާން ތަރައްގީ ކުރިއިރު އެތަނުގެ ބައެއް މަސައްކަތްތައް އަމިއްލަ ފަރާތަކާ ހަވާލު ކުރުމުގައި ކޮރަޕްޝަންގެ އަމަލެއް ހިންގާފައިވާ ކަމަށް ބުނެ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ) ގެ އޭރުގެ މެނޭޖިން ޑިރެކްޓަރު އިބްރާހިމް ނަޒީމްގެ މައްޗަށް ދައުވާކުރަން ޕްރޮސެކިއުޓާ ޖެނެރަލްގެ އޮފީހަށް ފޮނުވައިފި އެވެ.

މިހާރު ހައުސިން މިނިސްޓަރުގެ ނައިބަށް ހުންނެވި ނަޒީމްގެ މައްޗަށް އެހެން މައްސަލައެއްގައި ވެސް ދައުވާކުރަން ޕީޖީ އޮފީހަށް ކުރިން އޮތީ ފޮނުވައިފަ އެވެ.

މިފަހަރު ނަޒީމްގެ މައްޗަށް ދައުވާކުރަން އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވީ މިނިވަން 50 އާ ގުޅިގެން ޖުމްހޫރީ މައިދާން ތަރައްގީ ކުރިއިރު އެތަނުގެ ޓެރާޒޯ އެޅުމުގެ މަސައްކަތާއި ޓެރާޒޯ އެޅި ތަނުގައި ލައިޓް ޖެހުމުގެ މަސައްކަތް އަމިއްލަ ބަޔަކާ ހަވާލުކޮށް، ފައިސާ ދޫކުރުމުގައި މަގާމުގެ ނުފޫޒު ބޭނުންކުރި ކަމަށް ތުހުމަތުކޮށްފަ އެވެ.

އޭސީސީން މިއަދު ނެރުނު ބަޔާނެއްގައި ވަނީ ޓެރާޒޯ އެޅުމުގެ މަސައްކަތް އަމިއްލަ ބަޔަކާ ހަވާލުކުރީ އިއުލާން ނުކޮށް ކަމަށާއި މާލިއްޔަތު ގަވާއިދާ ޚިލާފަށް އެ ފަރާތަށް މަސައްކަތުގެ އަގުގެ 25 ޕަސެންޓް ދޫކޮށްފައިވާ ކަމަށެވެ. އަދި ޓެރާޒޯގައި ލައިޓް ހަރުކުރުން ވެސް އެ ފަރާތާއި ހަވާލުކޮށްފައި ވަނީ އިއުލާން ނުކޮށް ކަމަށާއި އެ މަސައްކަތުގެ އަގުގެ 50 ޕަސެންޓް ފައިސާ އެ ފަރާތަށް ދީފައިވާ ކަމަށެވެ. ބާކީ އޮތް 50 ޕަސެންޓް ފައިސާ ވެސް ހަވާލުކުރީ ރަނގަޅަށް އެތަން އިންސްޕެކްޓް ކުރުމެއް ނެތި ކަމަށް އެ ބަޔާނުގައިވެ އެވެ.

އެ ދެ މަސައްކަތަށް ވެސް ޚަރަދުކުރަން އެމްއާރުޑީސީގެ ބޯޑުން ނިންމާފައި އޮތީ 750،000ރ. ނަމަވެސް އެ ދެ މަސައްކަތް ކުރި ކުންފުންޏަށް އިތުރަށް 858،000ރ. ދޫކޮށްފައިވާ ކަމަށް އޭސީސީގެ ބަޔާނުގައިވެ އެވެ. އިތުރަށް ފައިސާ ދޫކުރީ ނަޒީމް ހުއްދަ ދީގެންކަން އެނގޭތީ އާއި މަސައްކަތުގެ އެއްބަސްވުމުގައި ސޮއިކުރީ ވެސް ނަޒީމް ކަން އެނގޭތީ އޭނާގެ އަމަލަކީ މަގާމުގެ ނުފޫޒު ބޭނުންކޮށްގެން ނާޖާއިޒް ފައިދާއެއް ހޯދައި ދިނުން ކަމަށް ބެލެވޭ ކަމަށް ބަޔާނުގައިވެ އެވެ.

އެމްއާރުޑީސީގެ އޮޑިޓް ރިޕޯޓުގައި ވެސް ވަނީ އެ ކުންފުންޏާއި ގުޅުން ނެތް މަސައްކަތްތަކެއް ކޮށް، އެކި ފަރާތްތަކުން ލިބެންޖެހޭ ފައިސާ ހޯދަން މަސައްކަތް ނުކުރާ ކަމަށް ބުނެފަ އެވެ. އެކަންކަމާ ގުޅިގެން އެ ކުންފުނީގެ ވެރިން ރައްޔިތުންގެ މަޖިލީހުގެ ކޮމެޓީ އަށް ވެސް ހާޒިރުކޮށްފައިވެ އެވެ.