ސިޔާސީ ދެ މަގާމެއް އުފައްދައި ބޭފުޅުން އައްޔަންކޮށްފި

ކުރީގެ ރައީސް އަބްދުﷲ ޔާމީންގެ ސަރުކާރުން އުފެއްދި ސީނިއަ ޕޮލިސީ އެގްޒެކެޓިވް މަގާމުގެ އިތުރުން މުޅިން އަލަށް ޕޮލިސީ އެގްޒެކެޓިވްގެ މަގާމު އުފައްދަވައި، ބޭފުޅުން އައްޔަންކުރަން ފަށައިފި އެވެ.

ރައީސް އޮފީހުގެ ތަރުޖަމާނު އިބްރާހިމް ހޫދު މިއަދު ވިދާޅުވީ ޑެޕިއުޓީ މިނިސްޓަރުންގެ ފެންވަރަށް ވުރެ ދަށް އެ ދެ މަގާމަށް ބޭފުޅުން އައްޔަންކޮށްފައިވާ ކަމަށެވެ. ނަމަވެސް އެ މަގާމުތަކަށް މިހާތަނަށް ހަމަޖެއްސި ބޭފުޅުންގެ ސީދާ އަދަދެއް ވިދާޅެއް ނުވެ އެވެ.

ހޫދު ވިދާޅުވީ މި ސަރުކާރުގެ އޮނިގަނޑު ހެދިއިރު ވެސް ސީނިއަ ޕޮލިސީ އެގްޒެކެޓިވް އާއި ޕޮލިސީ އެގްޒެކެޓިވް ހިމަނާފައިވާ ކަމަށެވެ. އެކަމަކު ކުރީ ސަރުކާރުގެ ސިޔާސީ މަގާމުތަކަށް ވުރެ މި ސަރުކާރުގައި ސިޔާސީ މަގާމު މަދުވާނެ ކަމަށް ވިދާޅުވި އެވެ.

ރައީސް އޮފީހާއި މުލިއާގެ ނުހިމަނައި ކުރީގެ ސަރުކާރުގައި ސިޔާސީ މަގާމުތަކުގައި ތިބި މީހުންގެ އަދަދު 465 އަށް އެރި އެވެ. މި ސަރުކާރުގައި މިހާތަނަށް ސިޔާސީ މަގާމުތަކުގެ އަދަދު އުޅޭނީ 300 ގައި ކަމަށް ރައީސް އޮފީހުން ބުންޏެވެ.

ސީނިއަ ޕޮލިސީ އެގްޒެކެޓިވަކަށް މުސާރައިގެ ގޮތުގައި 13،000ރ. އަދި އެލަވަންސަށް 8،000ރ. އާ އެކު 21،000ރ ލިބޭނެ އެވެ. ޕޮލިސީ އެގްޒެކެޓިވްގެ މުސާރަ 11،000ރ. އަދި އެލަވަންސަށް 7،000ރ. އާ އެކު މަހެއްގެ އާމްދަނީއަކީ 18،000ރ އެވެ.

ހޫދު ވިދާޅުވި ގޮތުގައި އެ ދެ މަގާމަށް ބޭފުޅުން އައްޔަންކުރާނީ މިނިސްޓްރީއަކަށް ކޮންމެހެން ބޭނުންވުމާއި އަދި އެ ބޭނުންވާ ކަންކަމަށް ބަލައިފަ އެވެ.

އޭނާ ވިދާޅުވީ މުސާރައިގެ ގޮތުގައި ސިޔާސީ މުވައްޒަފުންނަށް މި ސަރުކާރުން ކުރާ ހޭދަ، ކުރީ ސަރުކާރަށް ވުރެ މަހަކު 1.5 މިލިއަން ރުފިޔާ މަދުވާނެ ކަމަށެވެ.

ކުރީގެ ސަރުކާރުގައި ސީނިއަ ޕޮލިސީ އެގްޒެކްޓިވްގެ މަގާމަށް، ބައެއް ޑެޕިއުޓީ މިނިސްޓަރުން ބަދަލުކުރި އެވެ. ނަމަވެސް އެ ބޭފުޅުން އެ މަގާމަށް އައްޔަންކުރީ ޑެޕިއުޓީ މިނިސްޓަރުންގެ ފެންވަރުގަ އެވެ.

ޑެޕިއުޓީ މިނިސްޓަރަކަށް މުސާރަ އާއި އެލަވަންސްގެ ގޮތުގައި ކޮންމެ މަހަކު ލިބިވަޑައިގަންނަވާނީ 30،500ރ. އެވެ. އެއީ 18،000ރ. ގެ މުސާރަ އާއި 12،500ރ. ގެ އެލަވަންސެކެވެ.