އިންޑޮނީޝިއާގެ ހަމަނުޖެހުންތަކުގައި ހަ މީހުން މަރުވެއްޖެ

އިންޑޮނީޝިއާގެ ރިޔާސީ އިންތިހާބުގެ ނަތީޖާ އިއުލާނު ކުުރުމުން އެ ގައުމުގައި ހިންގި ހަމަނުޖެހުންތަކުގައި މިހާތަނަށް ހަ މީހަކު މަރުވެއްޖެ އެވެ.

އެ ގައުމުގެ ފުލުހުންނާ ހަވާލާދީ ބޭރުގެ މީޑިއާތަކުން ބުނެފައިވަނީ އިންޑޮނީޝިއާގެ ވެރިރަށް ޖަކާޓާގައި ހިންގި ހަމަނުޖެހުންތަކުގައި 200 އަށް ވުރެ ގިނަ މީހުން ޒަހަމްވެފައިވާ ކަމަށެވެ. އަދި އެ މަރުތައް ތަހުގީގު ކުރާނެ ކަމަށް ވެސް ފުލުހުން ބުނެ އެވެ.

އިންޑޮނީޝިއާގައި ހަމަނުޖެހުންތައް ފެށުނީ ރައީސް ޖޯކޯ ވިޑޯޑޯ މަގާމު ދިފާއުކުރެއްވުމާ ގުޅިގެން ނަތީޖާއާ މެދު ހިތްހަނުޖެހުނު މީހުންގެ މުޒާހަރާތަކުންނެވެ.

އިއްޔެ ހިންގި އެ ހަމަނުޖެހުންތައް ހުއްޓުވަން ސިފައިން ލައިވް ވަަޒަނުގެ ބޭނުންކުރި ކަމަށް ތުހުމަތު ކުރަމުންދާއިރު ސިފައިން ވަނީ އެ ވާހަކަތައް ދޮގުކޮށްފަ އެވެ. ނަމަވެސް އެއްވި މީހުން ހުއްޓުވުމަށް ކަރުނަ ގޭސް ބޭނުންކުރި އެވެ.

ޖަކާޓާގައި ހިންގި ހަމަނުޖެހުންތަކާ ގުޅިގެން އެ ގައުމުގެ ބައެއް ސަރަހައްދުތަކުގައި ސޯޝަލް މީޑިއާ ބޭނުން ކުރުން ވަނީ މަނާކޮށްފަ އެވެ. އެއީ ހަމަނުޖެހުންތަކާ ގުޅިގެން ދޮގު ހަބަރުތައް ފަތުރައިގެން އިތުރު ގަޑުބަޑެއް ހިނގިޔަ ނުދިނުމަށެވެ.

އިންޑޮނީޝިއާހެ ޕޮލިސް ޗީފް ޓީޓޯ ކަރްނާވިއަން ވިދާޅުވީ އިއްޔެ ހަ މީހުން ވެސް މަރުވީ ވަޒަން އެރުމުގެ ސަބަބުން ކަމަށެވެ. އަދި ހަމަނުޖެހުންތައް ހިންގާފައިވަނީ ކުއްލިއަކަށް ނޫން ކަމަށާއި އެއީ ބަޔަކު ދުރާލާ ރާވައިގެން ހިންގި ކަމެއް ކަމަށް ވެސް އޭނާ ވިދާޅުވި އެވެ.

އިންޑޮނީޝިއާގެ ވެރިކަން ދިފާއުކުރެއްވި ވިޑޯޑޯ ވަނީ އެ ހަމަނުޖެހުންތައް ހަރުކަށި އިބާރާތުން ކުށްވެރިކުރައްވައިފަ އެވެ. އަދި ހަމަނުޖެހުންތަކުގައި ބައިވެރި މީހުންނާ މެދު ގާނޫނީ ފިޔަވަޅު އަޅުއްވާނެ ކަމަށް ވެސް ވިދާޅުވ އެވެ.

"އަޅުގަނޑާ އެކު މަސައްކަތް ކުރަން ބޭނުންވާ ކޮންމެ މީހަކަށް ވެސް ހެޔޮ ހިތުން މަރުހަބާ ކިޔަން. އެކަމަކު ގައުމުގެ ހަމަނުޖެހުން ނައްތާލައި އާންމުންގެ މުދަލަށް ގެއްލުންދީ ގައުމުގެ އެއްބައިވަންތަކަން ނައްތާލަން އުޅުން ގަބޫލެއް ނުކުރެވޭނެ،" ވިޑޯޑޯ ވިދާޅުވި އެވެ.

މި ހަމަނުޖެހުންތަކުގައި އާންމުގެ މުދަލަށް ވެސް ވަނީ ގެއްލުންދީފަ އެވެ. އެގޮތުން ފިހާރަތަކާއި މަގުމަތީގައި ޕާކުކޮށްފައި ހުރި ކާރުތަކުގައި ރޯކުރި އެވެ.