ސަލާހުގެ ސަބަބުން މިސްރުގެ ސަޕޯޓަރުން ގިނަވޭ: ކޯޗު

ގާހިރާ، މިސްރު (ޖުލައި 1) - އެފްރިކަން ކަޕް އޮފް ނޭޝަންގައި މިސްރު ވާދަކުރާއިރު ކުރިއަށް ވުރެ އެ ޓީމުގެ ސަޕޯޓަރުން ގިނަވާ އެންމެ ބޮޑު ސަބަބަކީ އެ ޓީމުގައި ލިވަޕޫލްގެ ފޯވާޑް މުހައްމަދު ސަލާހު ހުރުން ކަމަށް މިސްރުގެ ކޯޗު ހަވިއޭ އަގީރޭ ބުނެފި އެވެ.

މިސްރުގައި ކުރިއަށްދާ އެފްރިކަން ކަޕްގައި ރޭ އެ ޓީމު ކުޅުނު ގްރޫޕް ސްޓޭޖުގެ ފަހު މެޗުން ޔޫގަންޑާއާ ވާދަކޮށް މޮޅުވީ 2-0 އިންނެވެ. މިސްރުން ލީޑުނެގީ ސަލާހު ޖެހި ހިލޭޖެހުމުންނެވެ. ޔޫގަންޑާ އިން ރަނގަޅު ކުޅުމެއް ދެއްކި މި މެޗުގައި މިސްރުގެ ދެ ވަނަ ގޯލް ފުރަތަމަ ހާފު ނިމުމުގެ ކުރިން ކާމިޔާބުކުރީ އަހުމަދު އެލްމުހައްމަދީ އެވެ.

ރޭގެ މެޗަށް ފަހު އަގީރޭ ބުނީ ސައްތަ އިން ސައްތަ ރެކޯޑަކާ އެކު މިސްރުން ދެ ވަނަ ބުރުގެ ޖާގަ ހޯދުމަކީ ލިބިގެންދިޔަ އުފަލެއް ކަމަށާއި އޭގެ އިތުރުން އޮތް އަނެއް ހިތްހަމަޖެހުމަކީ ޓީމުގެ ތަރި ސަލާހު ރަނގަޅު ފޯމެއްގައި ހުރުން ކަމަށެވެ.

"ސަލާހު ހުރީމަ ގިނަ ބަޔަކު މިސްރަށް ސަޕޯޓްކުރޭ. އެއީ ހިތްހަމަޖެހުމެއް. ސަލާހު މި ވަގުތު ހުރީ ރަނގަޅު ފޯމެއްގައި. ފުރަތަމަ މެޗުގައި ޒިމްބާބްވޭއާ ދެކޮޅަށް ނުކުޅެވުނު ނަމަވެސް އޭނާ ފަހުން ކުޅުނު ދެ މެޗުގައި ތަފާތު ދައްކައިފި،" ކުރިން މެކްސިކޯ އާއި ޖަޕާން އަދި އެތުލެޓިކޯ މެޑްރިޑުގެ ކޯޗަކަށް ހުރި އަގީރޭ ބުންޏެވެ.

މިސްރުގެ އަންހެނުންތަކަކަށް ޖިންސީ ފުރައްސާރަކޮށްފައިވާ ސްކްރީންޝޮޓްތަކެއް ސޯޝަލް މީޑިއާގައި ލީކްވުމާ ގުޅިގެން، އެފްރިކަން ކަޕް އޮފް ނޭޝަންސްގެ ތެރެއިން ގެއަށް ފޮނުވާލި މިސްރުގެ ވިންގް އަމްރު ވަރްދާ އަށް ދެ ވަނަ ފުރުސަތެއް ދީ އަލުން ގައުމީ ޓީމަށް ވަނީ ނަގައިފަ އެވެ. މި މުބާރާތުގެ ފުރަތަމަ މެޗުގައި ކުޅުނު އަމްރު އަލުން ޓީމުގެ ޕްރެކްޓިހަށް ނުކުންނާނީ މިއަދު އެވެ.

މިސްރުގެ ދެ ވަނަ މެޗުގެ ކުރިން އަމްރު އަށް ދެ ވަނަ ފުރުސަތެއް ދޭން ސަލާހު ވަނީ ގޮވާލައިފަ އެވެ. އެއާ އެކު މިސްރުގެ އަންހެނުންގެ ހައްގުތަކަށް މަސައްކަތްކުރާ ފަރާތްތަކުން ވަނީ ސަލާހަށް ވަރަށް ބޮޑަށް ފާޑުކިޔައިފަ އެވެ. ޓައިމްސް މަޖައްލާ އަށް ދިން އިންޓަވިއުއެއްގައި މީގެ ކުރިން ސަލާހު ވަނީ އަންހެނުންގެ ހައްގުތަކާ ބެހޭގޮތުން ވާހަކަ ދައްކައިފަ އެވެ. މިސްރުގެ ބައެއް އެކްޓިވިސްޓުންގެ ނަޒަރުގައި އަމްރުގެ ހައްގުގައި ސަލާހު ވާހަކަ ދެއްކުމުން އެނގިގެންދިޔައީ އެ އިންޓަވިއުގައި ސަލާހު ދެއްކި ވާހަކަ އަށް އޭނާ އަމަލުނުކުރާކަން ކަމަށެވެ.

ރޭގެ މެޗަށް ފަހު ސަލާހު ވަނީ އެ ފަދަ ވާހަކަތަކަށް ޖަވާބުދޭން ބޭނުންނުވާ ކަމަށާއި އޭނާގެ ފޯކަސް ހުރީ 2011 ވަނަ އަހަރަށް ފަހު ފުރަތަމަ ފަހަރަށް މިސްރަށް މި މުބާރާތް ކާމިޔާބު ކޮށްދިނުމަށް ކަމަށެވެ.

މި ގްރޫޕްގެ އަނެއް މެޗުގައި ކޮންގޯ ވަނީ ރޭ 4-0 އިން ޒިމްބާބްވޭ ބަލިކޮށްފަ އެވެ. މި ނަތީޖާއާ އެކު ކޮންގޯ އަށް ދެ ވަނަ ބުރުން ފުރުސަތު ލިބުނުއިރު، މިއީ 1978 ވަނަ އަހަރަށް ފަހު އެ ޓީމުން މި މުބާރާތުގެ ދެ ވަނަ ބުރުގައި ކުޅޭ ފުރަތަމަ ފަހަރެވެ. އެ ފަހަރު އެ ޓީމު ފައިނަލުގައި ބަލިވީ ގާނާ އަތުންނެވެ.