މަސައްކަތުގައި އުޅޭއިރު ޗޮކްލެޓް ކެއުން ރަނގަޅު

ޗޮކްލެޓާ ގަޔާނުވާ މީހަކު މަދުވާނެ އެވެ. އަނގަ ފޮނިކޮށްލަދީ މީހާގެ މޫޑު ވެސް އުފާވެރިކޮށް ދޭ ޗޮކްލެޓްގެ ފައިދާތައް ވެސް ގިނަ އެވެ.

ފަހުގެ ދިރާސާއެއްގައި ބުނާ ގޮތުން މަސައްކަތު ގަޑީގައި ޗޮކްލެޓް ކެއުމަކީ ވެސް އެތައް ގޮތަކުން ފައިދާކުރާނެ ކަމެކެވެ. އެގޮތުން ވަޒީފާ އަދާކުރާ ދުވަސްތަކުގައި ކޮންމެ ދުވަހަކު ޗޮކްލެޓް ކާ ނަމަ ލިބޭ ފައިދާތަކުގެ ވާހަކަ އިންސްޓިޓިއުޓް އޮފް ބޭކަރީ އެންޑް ޕޭސްޓްރީ އާޓްސްގެ ބާނީ ބަލެންދުރަ ސިންގް ވަނީ ހިއްސާ ކުރައްވައިފަ އެވެ.

އޭނާ މިކަން ބައްސަވަނީ ހަތަރު ކެޓަގަރީއަށެވެ. އެއީ މޫޑު ރަނގަޅުކޮށް ދިނުމާއި މަސައްކަތުގެ ފެންވަރު ރަނގަޅުވުމާއި ފިކުރުތަކާއި ހާސްކަމުން ދުރުކޮށް ދިނުމާއި މީހާ ސްމާޓްކޮށް ދިނުމެވެ.

ސިންގް ވިދާޅުވި ގޮތުގައި ޗޮކްލެޓް ކެއުމުން މޫޑަށް އަންނަ ޕޮޒިޓިވް ބަދަލުތަކާ އެކު، ޖޯޝާއި ރޫހު އިތުރުކޮށްދެ އެެވެ. އެގޮތުން މީހާގެ ހިތާއި ސިކުނޑި އާއި ހިތަށް، ޗޮކްލެޓުން ހާއްސަ އުފާވެރިކަމާއި ފޮނިކަމެއް އިހުސާސް ކުރެވޭ ކަމަށް ވިދާޅުވި އެވެ.

މަސައްކަތްކުރާ ވަގުތު ޗޮކްލެޓް ކެއުމުން ހަށިގަނޑަށް ގެނުވާ ޕޮޒިޓިވް އިހުސާސްތަކާ އެކު، މީހާގެ ހަރަކާތްތެރިކަން ވެސް އިތުރުކޮށްދެ އެވެ. ނަތީޖާ އަކީ ކުރާ މަސައްކަތުގެ ފެންވަރު ރަނގަޅުވެ، ހަވާލުކުރާ މަސައްކަތެއް ފުރިހަމަ އަށް ބަރާބަރަށް އަދި ކަނޑައެޅިފައިވާ ސުންގަޑިއަކަށް ނިންމަން ވެސް ހިތްވަރު ލިބުމެވެ.

ސިންގް ވިދާޅުވި ގޮތުގައި އޮފީހެއްގައި މަސައްކަތް ކުރާ އިރު، ޗޮކްލެޓަކުން އަނގަ ފޮނިކޮށްލައިގެން މަސައްކަތަށް އެނބުރިއްޖެ ނަމަ، އަމިއްލަ އަށް ބަދަލުތައް އިހުސާސް ވެސް ކުރެވޭނެ އެވެ.

ކުރިން ހަދާފައިވާ ދިރާސާއެއްގައި ފާހަގަކޮށްފައިވާ ގޮތުގައި ޕޮލިފެނޯލް އިން މުއްސަނދިވެފައިވާ ޗޮލްކެޓް ކޮންމެ ދުވަހަކު ކެއުމަކީ މީހާގެ ނަފުސަށް ވެރިވާ ބޭކާރު ވިސްނުންތައް މައިތިރިކޮށްދީ، ހިމޭންކަން ވެރިކުރުވާ ކަމެކެވެ.

އެތަކެއް ދިރާސާތަކުން ދައްކާ ގޮތުގައި ޗޮކްލެޓް ކެއުމަކީ މީހާ ވަށާލާފައިވާ ނުތަވަސްކަމާއި ފިކުރުތަކާއި އުދާހާއި ހާސްކަމާއި ކަންބޮޑުވުންތަކުން މިންޖުކޮށް ދޭން ބާރު އަޅާ އެއްޗެކެވެ. ވަކިން ހާއްސަކޮށް ގިނަ ވަގުތު މަސައްކަތުގައި ބިޒީކޮށް އުޅޭ މީހުންގެ ސިކުނޑި އާއި ހިތަށް ކުރާ ބާރު ބޮޑު ވާނެ އެވެ. އެހެންވެ މިކަމަށް އޮތް އެންމެ ލުއި އެއް ފަރުވާއަކީ ޗޮކްލެޓެއް ކައިލުން ކަމަށް ސިންގް ވިދާޅުވި އެވެ.

ވެސްޓް ވާޖިނިއާ ޔުނިވަސިޓީގެ ދިރާސާއެއްގައި ބުނެފައިވާ ގޮތުގައި ޗޮކްލެޓް ކެއުމުން ކަންކަމަށް ދެވޭ ފޯކަސް ބޮޑުވެ، މައްސަލަތައް ހައްލު ކުރުމުގެ ބާރު އިތުރުކޮށްދީ ހަނދާން ވެސް ގަދަކޮށް ދޭން ބާރު އަޅަ އެވެ.

ދިރާސާއެއްގައި ފާހަގަކޮށްފައިވާ ގޮތުގައި ވަކިން ހާއްސަކޮށް މެގްނީޒިއަމުން މުއްސަނދިވެފައިވާ ޑާކް ޗޮކްލެޓް ކެއުމަކީ ސްޓްރެސް ހޯމޯން ކޯޓިސޯލް ބޭރުކޮށްލަ ދޭނެ ކަމެކެވެ. އެހެންވެ މެގްނީޒިއަމް މަޝްހޫރުވެފައި ވަނީ ވެސް "އޮރިޖިނަލް ޗިލް ޕިލް" ގެ ގޮތުގަ އެވެ.

މީހާގެ މޫޑު ރަނގަޅުވުމާއި ހަނދާން ގަދަވުމާއި ކަންކަމަށް ދެވޭ ޝައުގުވެރިކަމާއި ޒިންމާތަކަށް ފަރުވާތެރިވާ މީހުންނަކީ ހަމަ ޔަގީނުން ވެސް ސްމާޓް މީހުންގެ ގޮތުގައި ސިފަ ކުރެވޭނެ އެވެ. މި ސިފަތައް ދަމަހައްޓަން ބޭނުންވާ ނަމަ ޗޮކްލެޓް މުހިއްމު ދައުރެއް އަދާ ކުރާނެ އެވެ. ސްމާޓް މީހުންނަކީ އެ މީހުންނާ ހަވާލު ކުރާ ކޮންމެ ކަމަކާ ވެސް ވަރަށް ކެރިގެން، އިތުބާރާ އެކު ކުރިމަތިލާ މީހުންނެވެ.

ބައެއް މީހުން އާންމުކޮށް ބޭނުން ކުރާ ބަހެއްގައި ވެސް އޮވެ އެވެ؛ ޗޮކްލެޓް ކާ މީހުން ގިނަ ގައުމުތަކަކީ ނޯބެލް ޕްރައިޒް ހޯދާ މީހުންގެ ނިސްބަތް ވެސް ގިނަ މީހުން އުޅޭ ގައުމުތަކެވެ. އެހެން ނުވާންވީ ސަބަބެއް ނެތެވެ. ދިރާސާތަކުން ދައްކާ ގޮތުގައި ކޮންމެ ދުވަހަކު ޗޮކްލެޓް ކާ މީހުންނަކީ ވިސްނުން ރަނގަޅު އަދި އާ ހިޔާލުތައް ބިނާ ކުރާ މީހުންނެވެ.