ނޮވެލްޓީ ބުކްފެއާ ފަށައިފި

ރާއްޖޭގައި ބާއްވާ އެންމެ ބޮޑު ބުކް ފެއާ، ނޮވެލްޓީ ބުކްފެއާ މިއަދު ފަށައިފި އެވެ.

މިއަދު ހަވީރު މި ފެއާ ހުޅުވައިދިނީ ކުޑަކުދިންގެ ހިޔާ، ފިޔަވަތީގެ ކުދިންނާއި ޖަމާލުއްދީން ސްކޫލްގެ، އިވުމުގެ ދަތިކަން ހުންނަ ކުދިންނަށް ހާއްސަ ކްލާސް (ސީއެޗްއައިސީ)ގެ ދަރިވަރުންނެވެ.

މި ފެއާ ބާއްވާތާ 13 އަހަރު ވެފައިވާއިރު މި އަހަރުގެ ފެއާ އަށް ޒިޔާރަތްކުރާ މީހުންނަށް ވެސް ގިނަ އިނާމުތަކެއް ހުށަހަޅާފައިވެ އެވެ. އެގޮތުން ގުރުއަތުން ހޮވޭ ފަރާތަކަށް، ބޮޑު އިނާމުގެ ގޮތުގައި 200،000ރ ކަނޑައަޅާފައިވެ އެވެ.

ނޮވެލްޓިން ވަނީ ފެއާ ހުޅުވުމުގެ ރަސްމިއްޔާތުގައި 10،000ރ ގެ ފޮތް ފިޔަވަތީގެ ކުދިންނަށް ހަދިޔާކޮށްފަ އެވެ.

ދަރުބާރުގޭ ރަންނަބަނޑޭރި މާލަމާއި ބިއްލޫރި މާލަމުގައި ކުރިއަށްގެންދާ މި ފެއާގައި އަގުހެޔޮކޮށް ފޮތާއި ސްޓެޝަނަރީ ވެސް ލިބެން ހުންނާނެ އެވެ. މި ތަކެތިން 70 ޕަސެންޓާ ހަމަ އަށް ޑިސްކައުންޓް ލިބޭނެ އެވެ.

މި ފެއާގައި ކުރާ ކޮންމެ 100ރ. ގެ ވިޔަފާރިއަކަށް ފަސް ރުފިޔާގެ "ނޮވެލްޓީ ބުކްޝޮޕް މަނީ" ލިބެ އެވެ. ނޮވެލްޓީ ބުކްޝޮޕާއި ޕޭޕާ ވާލްޑުން، އެ "ފައިސާ" ބޭނުންކޮށްގެން ވިޔަފާރިކުރެވޭނެ އެވެ. ކުރިން ލިބިފައިވާ "ނޮވެލްޓީ ބުކްޝޮޕް މަނީ" ބޭނުންކޮށްގެން ފެއާގައި ވެސް ތަކެތި ގަނެވޭނެ ކަމަށް، އެ ބުކްޝޮޕުން ބުންޏެވެ.

މި ފެއާ ކުރިއަށްދާނީ އަންނަ މަހުގެ 10 ގެ ނިޔަލަށެވެ.

ބުކްފެއާ އޮންނާނެ ގަޑިތައް

ހޯމަ-ބުރާސްފަތި: މެންދުރު 2:00 އިން ރޭގަނޑު 12:00 އަށް. ހުކުރު: މެންދުރު 2:30 އިން ރޭގަނޑު 12:00 އަށް. ހޮނިހިރު: ހެންދުނު 10:30 އިން ރޭގަނޑު 12:00 އަށް.