ކުރީގެ ރައީސް ޖޯޖް ބުޝްގެ ވޯޓު ވެސް ހިލަރީ އަށް

ވޮޝިންޓަން (ސެޕްޓެމްބަރު 21) - ނޮވެމްބަރު މަހު އޮންނަ ރިޔާސީ އިންތިޚާބުގައި އެމެރިކާގެ ކުރީގެ ރައީސް ޖޯޖް ބުޝް ވެސް ވޯޓު ދެއްވާނީ ޑިމޮކްރެޓިކް ޕާޓީގެ ކެންޑިޑޭޓް ހިލަރީ ކްލިންޓަން އަށް ކަމަށް ވިދާޅުވި އެވެ.

އަމިއްލަ ޕާޓީގެ ކެންޑިޑޭޓުގެ ބަދަލުގައި އިދިކޮޅު ޕާޓީގެ ކެންޑިޑޭޓް އެމެރިކާގެ 41 ވަނަ ރައީސް އިޚްތިޔާރު ކުރެއްވިކަން ހާމަކުރެއްވީ ގާތް ބައެއް ބޭފުޅުން މެދުވެރި ކުރައްވަ އެވެ. ޕޮއިންޓް އޮފް ލައިޓް ފައުންޑޭޝަނުގެ ބޯޑު މެންބަރުންނާ އެކު ބޭއްވި ބައްދަލުވުމެއްގައި ރޮބާޓް އެފް. ކެނެޑީގެ ދަރިކަނބަލުން ކެތުލީން ހާޓިންޓަން ކެނެޑީ އަރިހު ބުޝް ވަނީ ހިލަރީ އަށް ވޯޓު ދެއްވާނެ ކަމަށް ވިދާޅުވެފަ އެވެ. އެކަމަނާ ވަނީ ފޭސްބުކް މެދުވެރި ކުރައްވާ މިކަން އިއުލާން ކުރައްވައިފަ އެވެ.

ރިޕަބްލިކަން ކެންޑިޑޭޓް ޑޮނަލްޑް ޓްރަމްޕުގެ ކެމްޕޭން މެނޭޖަރު ވިދާޅުވީ 92 އަހަރުގެ ކުރީގެ ރައީސްގެ ނިންމުމަށް އިހްތިރާމް ކުރައްވާ ކަމަށެވެ.

ބުޝްގެ އޮފީހުން އެކަން ޔަގީންކޮށްދީފައެއް ނުވެ އެވެ.

ޓްރަމްޕަށް ވޯޓު ދިނުމަށް ރިޕަބްލިކަން ޕާޓީގެ ކުރީގެ ކެންޑިޑޭޓުން ކަމަށްވާ މިޓް ރޮމްނީ، ޖޯން މެކް ކޭން ވެސް ވަނީ ދެކޮޅު ހައްދަވައިފަ އެވެ. އަދި ޖޯޖް ބުޝްގެ ވަޒީރުންގެ ތެރޭން ގިނަ ބަޔަކު ވެސް ވަނީ ހިލަރީ އަށް ތާއީދު ކުރައްވާނެ ކަމަށް ވިދާޅުވެފަ އެވެ. ބުޝްގެ ދަރިކަލުން އަދި ޕްރައިމަރީގައި ޓްރަމްޕާ ވާދަކުރެއްވި ޖެބް ބުޝް ވަނީ ހިލަރީ ނުވަތަ ޓްރަމްޕަށް ވެސް ވޯޓު ނުދެއްވާނެ ކަމަށް ވިދާޅުވެފަ އެވެ.

އެމެރިކާގައި ވެރިކަން ކުރެއްވި ބޭފުޅުންގެ ތެރޭން މިހާރު ދުނިޔޭގައި ތިއްބެވި ރައީސުންގެ ތެރޭން ހަތަރު ބޭފުޅުން ވަނީ ހިލަރީ އަށް ތާއީދު ކުރައްވަން ނިންމަވައިފަ އެވެ. ހިލަރީ އަށް ވޯޓު ދެއްވާނެކަން ވިދާޅުވެފައި ނުވަނީ ބުޝްގެ ދަރިކަލުން ޑަބްލިއު. ބުޝް އެވެ.

ހިލަރީގެ ފިރިކަލުން ބިލް ކްލިންޓަން ވެރިކަމަށް ވަޑައިގެންނެވީ 1992 ވަނަ އަހަރުގެ އިންތިޚާބުގައި ބުޝް ބަލި ކުރައްވައިފަ އެވެ. ކްލިންޓަނުގެ ދެ ދައުރުގެ ވެރިކަމަށް ފަހު ދެން ވެރިކަމަށް ވަޑައިގެންނެވީ ބުޝްގެ ދަރިކަލުން ޑަބްލިއު. ބުޝް އެވެ.

ވެރިކަމުގެ ދައުރަށް ފަހު ކްލިންޓަނާއި ބުޝްގެ އާއިލާއާ ވަނީ ގުޅުން ބޮޑުވެފަ އެވެ. ޖޯޖް ބުޝް އަދި ޑަބްލިއު. ބުޝްއާ އެކު ކްލިންޓަން ވަނީ ހިލޭ ސާބަހަށް މަސައްކަތް ކުރުމުގައި ބައިވެރިވެވަޑައިގެންފަ އެވެ.