ފެނާއި ނަރުދަމާގެ ޚިދުމަތް ދޭނެ އޮތޯރިޓީއެއް އުފައްދަން ފާސްކޮށްފި

ފެނާއި ނަރުދަމާގެ ޚިދުމަތް ދިނުމަށް ހާއްސަ ކޮށްގެން އޮތޯރިޓީއެއް އުފައްދަން ލާޒިމުކޮށް، ފެނާއި ނަރުދަމާގެ ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.

ސަރުކާރުގެ ފަރާތުން ގެމަނަފުށީ ދާއިރާގެ އެމްޑީޕީގެ މެމްބަރު އަހުމަދު ސައީދު ހުށަހެޅުއްވި އެ ބިލް މަޖިލީހުން ފާސްކުރީ 14 އިސްލާހަކާއެކު އެވެ. ބިލް ފާސްކުރީި ވޯޓްގައި ބައިވެރިވި 67 މެމްބަރުންގެ އިއްތިފާގުންނެވެ.

ބިލުގައި ނުވަ ބާބާއި 62 މާއްދާ ހިމެނެ އެވެ. އޭގެ ތެރޭގައި ފެނާއި ނަރުދަމާގެ ހައްގާއި މުއައްސަސާތަކުގެ ދައުރާއި ތިމާވެށި ހިމާޔަތް ކުރުމަށް ކުރަންޖެހޭ ކަންކަމާއި ފެނާއި ނަރުދަމާގެ ހިދުމަތް ދޭ ކުންފުނިތައް ރަޖިސްޓަރީ ކޮށް، ލައިސަންސް ދިނުމާ ބެހޭ އުސޫލުތައް ހިމެނެ އެވެ. ފެނާއި ނަރުދަމާގެ ކަމަކާ ގުޅިގެން ތަހުގީގެއް ހިންގަން ޖެހޭ ނަމަ އެކަން ކޮށް، ފިޔަވަޅު އަޅާނެ ގޮތުގެ ތަފްސީލްތައް ވެސް ހިމެނެ އެވެ.

މުހިންމު ބައިތައް:

• ޔޫޓިލިޓީ ރެގިއުލޭޓަރީ އޮތޯރިޓީގެ ނަމުގައި މުއައްސަސާއެއް އުފައްދައި ބާރުތަކެއް ދިނުން.

• ފެނާއި ނަރުދަމާގެ ހިދުމަތަށް ސަބްސިޑީ ދޭން ޖެހޭ ހާލަތްތަކުގައި ސަބްސިޑީ ދޭނެ ގޮތުގެ ގަވައިދު އެކުލަވައިލާނެ އުސޫލު.

• އެ ހިދުމަތް ދިނުމުގައި ކައުންސިލްތަކުގެ ބާރުވެރިކަން އިތުރު ކުރުން ލާޒިމު ކުރުން.

• ފެނާއި ނަރުދަމާގެ ޚިދުމަތް ދިނުމަށް ހޯދަންޖެހޭ މާލީ އަދި ފަންނީ އެހީ ހޯދުމަށް ކައުންސިލްތަކުގެ ދައުރެއް އޮތުން.

• ފެނާއި ނަރުދަމާގެ އަގު ކަނޑައެޅުމުގައި ކައުންސިލްގެ ބަހެއް ހޯދަން ޖެހޭނެ ކަމަށް ކަނޑައެޅުން.

• ރަށްރަށުގެ ގުދުރަތީ ފެން ފަށަލަ ހިމާޔަތް ކުރުމަށް ފިޔަވަޅުތަކެއް އެޅުން ލާޒިމު ކުރުން.

• ފެނާއި ނަރުދަމާގެ ހިދުމަތް ނިކަމެތިންނަށް ދިނުމުގައި ލުއިގޮތްތަކެއް ހަމަޖައްސަން ޖެހޭނެ ކަމަށް ލާޒިމު ކުރުން.

• ފެނާއި ނަރުދަމާގެ ހިދުމަތުގެ ޔަގީންކަމާއި ފެންވަރު ކަށަވަރު ކުރަން ޖެހޭ.

• ފެނާއި ނަރުދަމާގެ ހިދުމަތް ގެތަކަށް ގުޅައިދިނުމުގެ ހިދުމަތް ހިލޭ ދިނުން.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ހިދުމަތް ދިނުމަކީ ގާނޫނުއަސާސީ ބުނާގޮތުން އަސާސީ ހިދުމަތެކެވެ. ނަމަވެސް މިހާތަނަށް އެކަމަށް ވަކި ހާއްސަ ގާނޫނެއް ހަދާފައެއް ނުވެ އެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ހިދުމަތް ދިނުމަކީ މި ސަރުކާރުގެ ރިޔާސީ ވައުދެކެވެ. އެ ވައުދު ފުއްދުމަށް ގިނަ ރަށްތަކެއްގައި ޕްރޮޖެކްޓްތައް އަންނަނީ ހިންގަމުންނެވެ.