ރިތިކް ރޯޝަން ވެސް ޑިޖިޓަލް ކޮންޓެންޓަށް

އިންޑިއާގައި ވެބް ސީރީޒްތަކާއި ވެބް ފިލްމުތަކަށް ވަރަށް ބޮޑު މާކެޓެއް ހުޅުވި، ބޮލީވުޑްގެ މަޝްހޫރު ތަރިން ވެސް މިހާރު އެ ދިމާއަށް މިސްރާބު ޖަހަމުން އަންނަ އިރު، އެކްޓަރު ރިތިކް ރޯޝަން ވެސް ދެން މާ ގިނަ ދުވަސްތަކެއް ނުކޮށް ވެބް ސީރީޒަކުން ފެނިދާނެ ކަމަށް ރިޕޯޓްތައް ބުނެފި އެވެ.

ފިލްމުފެއާއިން ބުނި ގޮތުގައި މިހާރު ދެ ޕްރޮޖެކްޓެއް އޭނާ އަށް ވަނީ ހުށަހަޅައިފަ އެވެ. އަދި ރިތިކްގެ ޑިޖިޓަލް ކޮންޓެންޓް ގެނެސްދޭނީ ޑިޒްނީ ޕްލަސް ހޮޓްސްޓާއިންނެވެ.

އޭނާ އަށް ހުށަހަޅާފައިވާ ދެ ޕްރޮޖެކްޓުގެ ތެރެއިން އެކައްޗަކީ އިނގިރޭސިވިލާތަށް އުފަން ހޮލީވުޑްގެ އެކްޓަރު ޓޮމް ހިޑެލްސްޓަން 2016 ގައި ކުޅުނު ބީބީސީ ވަންގެ ޑްރާމާ ސިލްސިލާ "ދަ ނައިޓް މެނޭޖާ" އަސްލަކަށް ބަލައިގެން ހަދާ އެއްޗަކާއި 1983 ގައި ބީބީސީން ގެނެސްދިން މިނީސީރީޒް "ދަ ސިޓެލް" އަށް ބިނާކޮށް ހަދާ އެއްޗެކެވެ.

ފިލްމުފެއާ އިން ބުނި ގޮތުގައި "ދަ ނައިޓް މެނޭޖާ" ރިތިކާ އެކު ޑިޝާ ޕަޓާނީ އާއި ތައްބޫ ވެސް ފެންނާނެ އެވެ. އެގޮތުން ޑިޝާ ފެންނާނީ އެލިޒަބަތު ޑެބީކީގެ ކެރެކްޓާއިން ކަމަށާއި ތައްބޫ އަށް ލިބުނީ އޮލީވިއާ ކޮލްމަންގެ ކެރެކްޓާ ކަމަށް ބުންޏެވެ.

ނަމަވެސް މި ދެ ޕްރޮޖެކްޓާ ބެހޭ އެއްވެސް ވާހަކައެއް އަދި ރިތިކާއި ޑިޒްނީ ޕްލަސް ހޮޓްސްޓާ އިން ރަސްމީކޮށް ހިއްސާކޮށްފައެއް ނުވެ އެވެ.

މިދިޔަ އަހަރުގެ "ވޯ" އާއި "ސުޕަ 30" އިން ފެނިގެން ދިޔަ ރިތިކް ދެން އެންމެ އަވަހަށް ފެންނާނެއް ފިލްމެއް ނޭނގެ އެވެ. އަދި އޭނާ ރަސްމީކޮށް އެއްވެސް ފިލްމަކަށް ސޮއިކޮށްފައެއް ވެސް ނުވެ އެވެ. އެކަމަކު ބައްޕަ ރާކޭޝް ގެނެސްދޭ ސުޕަހީރޯ ފްރެންޗައިޒްގެ ހަތަރު ވަނަ ބަޔަކީ ރިތިކް ފެންނާނެކަން ކަށަވަރު ފިލްމެކެވެ. އޭގެ ތައްޔާރީތައް އަންނަނީ ވަމުންނެވެ

ކުރިން އަޑުއަރާފައިވާ ގޮތުން ފަރާ ޚާން ހަދާ "ސައްތޭ ޕޭ ސައްތާ" ގެ ރިމެކާއި ޕޫޖާ އެންޓަޓައިންމަންޓުން އިއުލާންކޮށްފައިވާ ކުރީގެ ފިލްމު "ދަ ބާނިން ޓްރެއިން" ގެ ރިމެކް ވެސް ރިތިކަށް ހުށަހަޅާފައިވެ އެވެ. އެކަމަކު މިއީ ކަށަވަރު ވާހަކަތަކެއް ނޫނެވެ.