ރިތިކްގެ އަލަތު ވެބް ސީރީޒްގެ ޕްރޮޑިއުސަރަކީ ޕްރިތީ

ރިތިކް ރޯޝަންގެ އަލަތު ވެބް ސީރީޒްގެ ޕްރޮޑިއުސަރަކީ ކުރީގެ ބަތަލާ ޕްރިތީ ޒިންތާ ކަމަށް ރިޕޯޓްތައް ބުނެފި އެވެ.

ރިތިކް ދެ ވެބް ސީރީޒަކަށް ފެހި ސިގްނަލް ދިން ވާހަކަ މީޑިއާތަކުން ރިޕޯޓްކޮށްފައި ވަނީ މިދިޔަ އަހަރުގެ އޮގަސްޓް މަހުގެ ތެރޭގަ އެވެ. އެ ދެ ޕްރޮޖެކްޓުގެ ތެރެއިން އެކައްޗަކީ އިނގިރޭސި އެކްޓަރު ޓޮމް ހިޑެލްސްޓަން 2016 ގައި ކުޅުނު ބީބީސީ ވަންގެ ޑްރާމާ ސިލްސިލާ "ދަ ނައިޓް މެނޭޖާ" އަސްލަކަށް ބަލައިގެން ހަދާ ސީރީޒަކާއި 1983 ގައި ބީބީސީން ގެނެސްދިން މިނީ-ސީރީޒް "ދަ ސިޓެލް" އަށް ބިނާކޮށް ހަދާ ސީރީޒެކެވެ. ފިލްމުފެއާ އިން ބުނެފައިވާ ގޮތުގައި "ދަ ނައިޓް މެނޭޖާ" އިން ރިތިކާ އެކު ޑިޝާ ޕަޓާނީ އާއި ތައްބޫ ވެސް ފެންނާނެ އެވެ. އެގޮތުން ޑިޝާ ފެންނާނީ އެލިޒަބަތު ޑެބީކީގެ ކެރެކްޓާއިން ކަމަށާއި ތައްބޫ އަށް ލިބުނީ އޮލީވިއާ ކޮލްމަންގެ ކެރެކްޓާ ކަމަށް ބުންޏެވެ.

ބޮލީވުޑް ހަންގާމާ އިން މިހާރު ބުނާގޮތުން "ނައިޓް މެނޭޖާ" ހިންދީ އޯޑިއަންސަށް ގެނެސްދޭން އޭގެ ރައިޓްސް ހޯދީ ޕްރިތީ އެވެ. އެހެންވެ ރިތިކްގެ އަލަތު ވެބް ސީރީޒް އޭނާ ޕްރޮޑިއުސްކޮށް، ގެނެސްދޭނީ ޑިޒްނީ ޕްލަސް ހޮޓްސްޓާއިންނެވެ.

ޕްރިތީ އާއި ރިތިކަކީ ކުރިން އެކީގައި ފިލްމުތަކެއް ވެސް ކުޅެފައިވާ ތަރިންނެވެ. އެ ފިލްމުތަކަކީ 2000 ވަނަ އަހަރުގެ "މިޝަން ކަޝްމީރު" އާއި 2003 ގެ "ކޮއި...މިލް ގަޔާ" ގެ އިތުރުން 2004 ގެ "ލަކްޝަޔާ" އެވެ.

"ދަ ނައިޓް މެނޭޖާ" ގެ ވާހަކަ ރިތިކާއި ޕްރިތީ އަދި ރަސްމީކޮށް ހާމައެއްނުކުރެ އެވެ. އެކަމަކު މިދިޔަ އަހަރު "ވޯ" އާއި "ސުޕަ 3" އިން ފެނިގެން ދިޔަ ރިތިކް ވަނީ އެނބުރި އަލުން ފިލްމީ މަސައްކަތްތަކަށް ނުކުތް ވާހަކަ އިންސްޓަގްރާމްގައި ހިއްސާކޮށްފަ އެވެ.

ފޮޓޯއަކާ އެކު އޭނާ ބުނީ "ބެކް އޮން ސެޓް" ކަމަށެވެ. އެކަމަކު އެއީ ކޯޗެއްގެ ޝޫޓިންއެއް ކަމެއް ނުބުނެ އެވެ.