އިޝާނާއި އަނަންޔާގެ "ކާލީ ޕީލީ" ގެ ޓީޒާ ވަރަށް ޝައުގުވެރި

ޒުވާން ދެ ތަރިން ކަމަށްވާ އިޝާން ޚައްތަރާއި އަނަންޔާ ޕާންޑޭގެ ޖޯޑު އެކީގައި ފެންނަ ފުރަތަމަ ފިލްމު "ކާލީ ޕީލީ" ގެ ޓީޒާ ޓްރެއިލާ ދައްކާލައިފި އެވެ.

"ބާރަތު" އާއި "ޓައިގާ ޒިންދާ ހޭ" ފަދަ ފިލްމުތައް ގެނެސްދިން އަލީ އައްބާސް ޒަފަރުގެ ފިލްމު ކުންފުނި އޭއޭޒީ އާއި ޒީ ސްޓޫޑިއޯސް ގުޅިގެން ގެނެސްދޭ މި ރޮމޭންޓިކް-އެކްޝަން ފިލްމު ޑައިރެކްޓްކޮށްފައި ވަނީ މަގްބޫލް ޚާނެވެ. "ކާލީ ޕީލީ" ގެ ޓީޒާއިން މި ފިިލްމަކީ ވަރަށް ޝައުގުވެރި ފިލްމަކަށްވާނެ ކަމުގެ އުންމީދު ބޮޑުކޮށްދޭ އިރު، އިޝާނާއި އަނަންޔާގެ ކެމިސްޓްރީ އަކީ ވެސް ގިނަ ބަޔަކު ބަލައިލަން ބޭނުންވާނެ ކަމެކެވެ. އަދި މި ފިލްމުގެ އެންމެ ހާއްސަ އެއް ކަމަކީ މުމްބާއީގައި މަޝްހޫރު ކަޅާއި ރީނދޫ ކުލައިގެ ޓެކްސީ "ކާލީ ޕީލީ" ގެ ޕްލޮޓްގެ ވަރަށް ބޮޑު ހިއްސާއަކަށްވުމެވެ. ޓީޒާ އިން ވެސް ކާރު ޓެކްސީއެއްގެ ތެރޭގެ ގިނަ މަންޒަރުތަކެއް ފެނިގެންދެ އެވެ.

ފިލްމަށް ނަން ދީފައި ވަނީ ވެސް ޓެކްސީގެ ކުލަތަކާ ގުޅުވައިގެންނެވެ.

"ކާލީ ޕީލީ" ގެ ކާސްޓުންގެ ތެރޭގައި ސަތިޝް ކޯޝިކާއި ޖައިދީޕް އަހުލުވާތު ވެސް ހިމެނެ އެވެ. ޔާޝް-ސީމާގެ ސްކްރީންޕްލޭއަކަށް ހަދާފައިވާ ފިލްމުގެ މިއުޒިކް ތައްޔާރުކޮށް ދިފައި ވަނީ ވިޝާލް-ޝޭކަރެވެ.

"ކާލީ ޕީލީ" އަކީ ކުރިން މިދިޔަ ޖޫން މަހުގެ 12 ގައި ސިނަމާތަކަށް ގެންނަން ރޭވި ފިލްމެކެވެ. އެކަމަކު އިންޑިއާގެ ލޮކްޑައުންއާ އެކު ފިލްމުގެ ޝޫޓިން ހުއްޓި، ސިނަމާތައް ވެސް ބަންދުކުރުމުން އެ ފުރުސަތު ގެއްލުނީ އެވެ. މީގެ ޓީޒާ ދައްކައިލި އިރު، ފިލްމު ބެލުންތެރިންނާ ހަމައަށް އަންނާނެ އިރެއް އަދިވެސް ނޭނގެ އެވެ. ޓީޒާ ނިންމައިލަނީ ވަރަށް އަވަހަށް ފިލްމު އަންނާނެ ކަމަށް ބުނަމުންނެވެ.

މިދިޔަ ހަފުތާގައި ފިލްމީ ޚަބަރުތައް ގެނެސްދޭ ބައެއް ނޫސްތަކުން ބުނިގޮތުގައި "ކާލީ ޕީލީ" ސިނަމާތަކަށް ގެނައުމުގެ ބަދަލުގައި މިހާރު ވަނީ ޒީ ނެޓްވޯކްގެ ޑިޖިޓަލް ޕްލެޓްފޯމް ޒީ5 އިން ޕްރިމިއާކުރަން ނިންމައިފަ އެވެ. އެކަމަކު އެކަން އަދި ކަށަވަރެއް ނުވެ އެވެ.

އަލީ ކުރިން ބުނެފައިވާ ގޮތުގައި އެ ފިލްމު އަޅުވަން އެންމެ ބޭނުން ވަނީ ސިނަމާތަކުގަ އެވެ. އެކަމަކު އެ ފުރުސަތު ނެތް ކަމަށްވާ ޑިޖިޓަލްކޮށް ރިލީޒްކުރުމާ ދޭތެރޭ ވިސްނާނެ ކަމަށް ބުނެފައިވެ އެވެ.