މަސްލަހަތު ގެއްލޭ ފަދަ ކަންކަން ޕާޓީތަކުން ނުކުރަން އެދެފި

ގައުމުގެ މަސްލަހަތު ގެއްލޭ ފަދަ ކަންކަމަށް ސިޔާސީ ޕާޓީތަކުން އެއްބާރުލުން ނުދިނުމަށް، ޕާޓީތަކުގެ ބެލެނިވެރި ފަރާތްކަމަށްވާ، އިލެކްޝަންސް ކޮމިޝަން (އީސީ) ގެ ރައީސް އަހުމަދު ޝަރީފް ރޭ ގޮވާލައްވައިފި އެވެ.

ޗެނަލް-13 އިން ގެނެސްދިން ލައިވް ޕްރޮގްރާމެއްގައި ވާހަކަ ދެއްކި މީހަކު، ރައީސް އިބްރާހިމް މުހައްމަދު ސޯލިހުގެ ހަށިކޮޅަށް ގެއްލުން ދޭން ގޮވި މައްސަލައާ ގުޅިގެން އާއްމުންގެ މީހަކު ކަންބޮޑުވުން ފާޅުކޮށް ކުރި ޓްވީޓަކަށް ރިޕްލައި ކުރައްވައި ޝަރީފް ވިދާޅުވީ ސިޔާސީ ޕާޓީތަކުން ގައުމުގެ މަސްލަހަތު ގެއްލޭ ފަދަ ކަންކަމަށް އެއްގޮތަކަށް ވެސް ހިތްވަރު ނުދިނުމަށް ގޮވާލައްވާ ކަމަށެވެ.

ރައީސްގެ ހަށިކޮޅަށް ގެއްލުން ދޭން ގޮވި މައްސަލާގައި ގިނަ ބަޔަކު އަންނަނީ ކަންބޮޑުވުން ފާޅު ކުރަމުންނެވެ. އޭގެ ތެރޭގައި ސަރުކާރުގައި އިސް މަގާމުތަކުގައި ތިއްބެވި ބޭފުޅުން ވެސް ހިމެނެ އެވެ.

އެފަދަ ގޮވާލުމެއް ޗެނަލް-13 އިން ގެނެސް ދީފައިވާތީ އެ މައްސަލަ ބްރޮޑްކާސްޓިން ކޮމިޝަންސް އިން އަންނަނީ ބަލަމުންނެވެ.

"ރައްޔިތުންގެ އަޑު"ގެ ނަމުގައި ބުރާސްފަތި ދުވަހު ޗެނަލް-13 އިން ގެެނެސްދިން ޕްރޮގްރާމުގައި އެހެން ބުނީ، ސަރުކާރުން އަމަލު ކުރަމުންދާ ގޮތާ ގުޅޭގޮތުން ޕްރެޒެންޓަރު ސުވާލު ކުރުމުން ވާހަކަ ދެއްކި ތ. ވިލިފުށީ މީހެކެވެ. ސަރުކާރަށް ފާޑުކިޔައި ވާހަކަ ދެއްކި އެ މީހާ ބުނީ ވެރިކަން އަވަހަށް ނައްތާލަން ބޭނުންވާ ކަމަށާއި "މިހާރުން މިހާރަށް އިބްރާހިމް މުހައްމަދު ސޯލިހު ގައިގާ (ކަނޑާލާފައި) " ކަމަށެވެ.

މި މައްސަލަ ފުލުހުން ވެސް މިހާރު އަންނަނީ ތަހުގީގުކުރަމުންނެވެ.

ޗެނަލް-13 އިން ބުނީ ރައީސްގެ ހަށިކޮޅަށް ގެއްލުން ދޭން އެ މީހާ ބުނީ އޭނާގެ އަމިއްލަ ހިޔާލުގެ މައްޗަށް ބިނާކޮށް ކަމަށާއި އެހެން ބުނާ އަޑު ބްރޯޑްކާސްޓް ކުރެވިފައިވާތީ އެކަމަށް މާފަށް އެދޭ ކަމަށެވެ.