އިތުބާރެއް ނެތް، އިންތިޚާބުގެ ކުރިން އީސީ ބަދަލުކުރާނަން: އިދިކޮޅު

08 ނޮވެމްބަރ 2020

ލޯކަލް ކައުންސިލް އިންތިޚާބު ބޯމަތިވެފައި އޮތް އިރު އިލެކްޝަންސް ކޮމިޝަނުގެ އަމަލުތައް ހުރީ ވެރިކަން ކުރާ އެމްޑީޕީ އަށް ކެމްޕޭންގެ ފުރުސަތު ފަހިކޮށްދީ، އިދިކޮޅަށް ހުރަސްއެޅުން ކަމުގެ ތުހުމަތާ އެކު އިންތިޚާބުގެ ކުރިން ކޮމިޝަން ބަދަލުކުރާނެ ކަމުގެ އިންޒާރު އިދިިކޮޅުން ދީފި އެވެ.

ފަޒީނާ އަހުމަދު

ޕީއެންސީގެ ނައިބު ރައީސް އަދި ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ސުޖާއު ވިދާޅުވީ އިލެކްޝަންސް ކޮމިޝަނަށް އިތުބާރެއް ނެތް ކަމަށެވެ. މިއީ، 2018 ގެ ރިޔާސީ އިންތިޚާބާއި 2019ގެ ރައްޔިތުންގެ މަޖިލީހުގެ އިންތިޚާބުގައި ވެސް އިދިކޮޅުން އިލެކްޝަންސަށް ކުރި ތުހުމަތެކެވެ.

ކޮމިޝަންގެ ރައީސަކަށް ހުންނެވި އަހްމަދު ޝަރީފަށް އިދިކޮޅުގެ ނުރުހުން އަމާޒުވެފައި ވަނީ ރިޔާސީ އިންތިޚާބު އޮޅުވާލި ކަމުގެ ތުހުމަތާ އެކުގަ އެވެ. އޭނާއަކީ، ކުރީގެ ރައީސް އަބްދުﷲ ޔާމީނާ އެކު ސިޔާސީ މަސައްކަތް ކުރެއްވި އަދި އެމަނިކުފާނުގެ ވެރިކަމުގައި ކޮމިޝަނަށް އައްޔަން ކުރެއްވި ބޭފުޅެކެވެ. އެކަމަކު ރިޔާސީ އިންތިޚާބުގެ ނަތީޖާއާ ހިސާބުން އިދިކޮޅުގެ ނުރުހުން ޝަރީފަށް އަމާޒުވުމުން، ދިފާއުގައި ޕީޕީއެމަށް ޝަރީފް ވެސް ފާޑުވިދާޅުވި އެވެ.

Local Council Inthihaabaa Bahdhalu kuraa iru,@ElectionsMv ge Mahchah Evves Ithubaareh neiy.Thafaathu kurun thah Inthihaa!MDP Ah Campaign kurevey.Idhikolhu Rashu Bandhuga!Local Council Inthihaabuge Kurin @ElectionsMv Badhalu kuraanan.Insha Allah☝?
— Ibrahim Shujau ? (@shuja3831) November 7, 2020

ސުޖާއު ވިދާޅުވި ގޮތުގައި ކައުންސިލް އިންތިޚާބުގެ ތައްޔާރީތަކުގައި ވެސް އިލެކްޝަންސް ކޮމިޝަނުން ފެންނަނީ އިންތިހާ އަށް ތަފާތުކުރާ ތަނެވެ.

"އެމްޑީޕީ އަށް ކެމްޕޭން ކުރެވޭ. އިދިކޮޅު ރަށު ބަންދުގައި،" ސުޖާއު ވިދާޅުވި އެވެ.

އިންތިހާބުގެ ކުރިން އިލެކްޝަންސް ކޮމިޝަން ބަދަލުކުރާނެ ކަމަށް ސުޖާއު ވިދާޅުވި ނަމަވެސް އެއީ ކިހިނެއް ކަން ސާފުކޮށެއް ނުދެއްވަ އެވެ. މިނިވަން މުއައްސަސާތަކުގެ މެމްބަރުން ވަކިކުރެވޭނީ މަޖިލީހުން ނުވަތަ އެ މެމްބަރަކު އިސްތިއުފާ ދެއްވުމުންނެވެ.

ލޯކަލް ކައުންސިލް އިންތިޚާބު ބާއްވަން އިލެކްޝަންސުން ނިންމާފައި ވަނީ އަންނަ އަހަރުގެ މާޗު މަހުގެ ކުރީކޮޅެވެ. ރަސްމީކޮށް ކެމްޕޭން ކުރަން ފުރުސަތު ހުޅުވާ ނުލި ނަމަވެސް ޕާޓީތަކަށް މިހާރު ވެސް ކެމްޕޭން ކުރެވޭނެ ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.

ކައުންސިލް އިންތިޚާބަށް 4،172 އަށް ވުރެން ގިނަ މީހުން ކުރިމަތިލާފައިވާއިރު، މި އިންތިޚާބުގެ ވާދަވެރިކަން އޮތީ އެމްޑީޕީ އާއި ޕީޕީއެމާ ދެމެދެވެ. މި އިންތިޚާބު ކާމިޔާބު ކުރާނެ ކަމަށް އެމްޑީޕީން ބުނާއިރު، އިދިކޮޅުން އެދެނީ ރިޔާސީ އިންތިޚާބާއި މަޖިލީސް އިންތިޚާބު ދިން ގޮތަށް ކައުންސިލް އިންތިޚާބު އެ ޕާޓީއަށް ދޫނުކުރުމަށެވެ. އިންތިޚާބުގައި ބޮޑު އަޣުލަބިއްޔަތެއް ހޯދާނެ ކަމަށް ވެސް ޕީޕީއެމުން ވަނީ ބުނެފަ އެވެ.

Comments