މޫސަލްގައި ހަ ލައްކަ ކުޑަ ކުދިން ތާށިވެފައި

ބަޣުދާދު (ނޮވެމްބަރު 2) - އިސްލާމިކް ސްޓޭޓް (އައިއެސް) ގެ އަތް ދަށުން އިރާގުގެ މޫސަލް ހިފުމަށް މިހާރު ފަށާފައިވާ ހަނގުރާމައިގައި އެ ސިޓީގައި ތާށިވެފައި ތިބި އާއްމުންގެ ތެރޭގައި ހަ ލައްކަ އަށް ވުރެ ގިނަ ކުޑަ ކުދިން ހިމެނޭ ކަމަށް ސޭވް ދަ ޗިލްރަން އިން ބުނެފި އެވެ.

"މިއީ މޫސަލްގެ ކުޑަ ކުދިން ހިމާޔަތްކޮށް އެ ކުދިންނަށް އެ ސިޓީން ނުކުމެވޭނެ ގޮތެއް ހޯދައިދޭން ވަރަށް މުހިންމު ދަނޑިވަޅެއް،" ސޭވް ދަ ޗިލްރަން އިން ބުނެފައިވެ އެވެ.

މޫސަލްގައި އާއްމުންގެ 1.5 މިލިއަން މީހުން މިހާރު ތިބި ކަމަށްވެ އެވެ. އެ ސިޓީ އަށް ދޭ ހަމަލާތަކާ ގުޅިގެން އެ މީހުންނަށް ވަނީ ނުކުމެވޭނެ ގޮތް ނުވެފަ އެވެ.

"ސީރިއާގެ ހަލަބް ސިޓީ އަށް ވީގޮތަށް މޫސަލް އަށް ވާން ދޫކޮށްލަން ތިބެވޭކަަށް ނެތް. ހަނގުރާމައިގެ ސަރަހައްދުން ކުޑަ ކުދިން ސަލާމަތް ކުރުމުގެ ފުރުސަތު އަދިވެސް އެބައޮތް،" ސޭވް ދަ ޗިލްރަންގެ އިރާގުގެ ޑިރެކްޓާ މައުރީޒިއޯ ކްރިވެއްލާރޯ ވިދާޅުވި އެވެ.

ސީރިއާގެ ހަލަބަށް ދޭން ފެށި ވައިގެ ހަމަލާތަކާ ގުޅިގެން އެ ސިޓީގައި އާއްމުންގެ 250،000 އަށް ވުރެ ގިނަ މީހުން ތިން މަހަށް ވުރެ ގިނަ ދުވަހު ތާށިވެފައި ތިބެން ޖެހުނެވެ.

މޫސަލް ހިފަން ދޭ ހަމަލާތަކުގައި އިރާގު ސިފައިން އިއްޔެ ވަނީ އެ ސިޓީ އަށް ވަދެފަ އެވެ. އިރާގުގެ ލަޝްކަރު ވަން އިރު އެ ގައުމުގެ ބޮޑު ވަޒީރު ހައިދަރު އަލް އަބާދީ ވަނީ އައިއެސް އަށް ވަރުގަދަ އިންޒާރެއް ދެއްވައިފަ އެވެ.